கதிர்வீச்சு தகவலை மறைக்கிறது ஜப்பான் அரசு: ஜப்பானியர்கள் அச்சம்!

டோக்கியோ: அணுஉலைகள் வெடித்து கதிர்வீச்சு வெளியேறுவது குறித்த உண்மையான தகவலை ஜப்பான் அரசு மறைப்பதாக மக்கள் அச்சம் அடைந்துள்ளனர். ஜப்பானில் ஏற்பட்ட பயங்கர பூகம்பத்தால், வடகிழக்கு நகரங்களை சுனாமி பேரலைகள் கடுமையாக தாக்கியது. அதில் ஏற்பட்ட மின் துண்டிப்பால் பியூகுஷிமா டைச்சி அணு மின் நிலைய அணுஉலை பாதுகாப்பு கான்கிரீட் சுவர் வெடித்தது. மேலும், 3 அணுஉலைகள் வெடிக்க வாய்ப்புள்ளதாக எச்சரிக்கப்பட்டது. இதையடுத்து 30 கிலோ மீட்டர் சுற்றளவில் வசித்த 1.4 லட்சம் மக்கள் பாதுகாப்பு கருதி வெளியேறினர்.

பூகம்பம் மற்றும் சுனாமியால் ஆயிரக்கணக்கானோர் பலியான நிலையில், அடுத்தடுத்து அணுஉலைகள் வெடித்து கதிர்வீச்சு பரவும் அபாயம் ஏற்பட்டுள்ளதால் மக்கள் பெரும் துன்பத்தில் ஆழ்ந்துள்ளனர். இந்நிலையில், அணுஉலைகளில் தீ பற்றியுள்ளதால், சக்தி வாய்ந்த கதிர்வீச்சு வெளியாகும் என கூறப்படுகிறது. ஆனால், கதிர்வீச்சு அபாயம் குறித்த உண்மையான தகவலை அரசு மறைப்பதாக மக்கள் அச்சம் அடைந்துள்ளனர் என்று கூறப்படுகிறது.

அணுமின்நிலையத்தில் இன்று காலையில் மீண்டும் லேசான தீ விபத்து ஏற்பட்டுள்ளது. மொத்தம் உள்ள 6 அணு உலையில் 3 வெடித்து சிதறியது. இதனையடுத்து இன்று காலையில் ஒரு அணு உலையில் தீ விபத்து ஏற்பட்டிருப்பதால் அங்கிருக்கும் ஊழியர்கள் அனைவரையும் வெளியேறுமாறு அறிவுறுத்தப்பட்டுள்ளது.

இந்நிலையில் பரிதவிக்கும் ஜப்பான் அரசு, சர்வதேச உதவியை கேட்டுள்ளது. கடுமையான பாதிப்பில் சிக்கியுள்ள ஜப்பானியர்கள் வெளியே வர முடியாமல் வீடுகளுக்குள் முடங்கிக் கிடக்கின்றனர். அவர்களை வெளியே வரவேண்டாம் என்று பிரதமர் நவ்டோ கானும் கேட்டுக் கொண்டுள்ளார்.

நேற்றும் 2 நிலநடுக்கம்

ஜப்பானில் பூகம்பத்துக்குப் பிறகு நூற்றுக்கணக்கான அதிர்வுகள் பதிவாகி உள்ளன. நேற்றும் இரண்டு முறை சக்தி வாய்ந்த நிலநடுக்கம் ஏற்பட்டது. தலைநகர் டோக்கியோவின் வடகிழக்கில் 325 கி.மீ. தொலைவில் உள்ள பியூகுஷிமா மாநில கடற்கரைப் பகுதியில் முதல் நிலநடுக்கம் ஏற்பட்டது. ரிக்டரில் இது 6.2 ஆக பதிவானது. அடுத்த மூன்று நிமிடங்களில் டோக்கியோவின் தென்கிழக்கில் 90 கி. மீ. தூரத்தில் உள்ள ஷிசூகா மாநிலத்தில் அடுத்த நிலநடுக்கம் ஏற்பட்டது. இது ரிக்டரில் 6 ஆக பதிவானது. இதனால், மக்கள் பீதியில் உறைந்துள்ளனர்.




தினகரன்

உண்மையை சொன்னாலும் ஆபத்து ,சொல்லாவிட்டாலும் ஆபத்து ,,பாவம் ஜப்பானியர்கள்