பெண்களுக்குப் பாதுகாப்பு

என்றைக்கு ஒரு பெண் நள்ளிரவில் தன்னந்தனியே பயம் இல்லாமல் நடந்து செல்ல முடிகிறதோ, அன்றுதான் இந்தியா உண்மையிலேயே சுதந்திரம் பெற்ற நாடு என்று, மகாத்மா காந்தி கூறினார். ஆனால், சாலைகளில் அல்ல, ஓடும் ரெயிலிலேயே தன்னந்தனியாக ஒரு பெண் பயணம் செய்ய முடியாத ஒரு அவமானமான நிலை சமீபத்தில் நடந்துள்ளது. முன்பெல்லாம் ரெயில் பயணம் என்றால், மிகவும் வசதிமிக்க, பாதுகாப்புள்ள பயணமாக இருந்தது. பெண்கள் தனியாக பயணம் செய்ய ரெயில் பயணம்தான் பொருத்தமானது என்று கருதப்பட்டது. ஆனால் இப்போது ரெயில் பயணங்களில் எந்தவிதமான வசதியும் இல்லை என்பது ஒருபக்கம். அதுவும் தெற்கு ரெயில்வே என்றால் இன்னும் பழையகாலத்து ரெயில் பெட்டிகளிலேயே ஓடிக்கொண்டிருக்கிறது. எலிகள், கரப்பான் பூச்சிகள் என்று மற்றொரு பக்கம். எத்தனையோ பேர் எலிகளுக்கு தங்கள் உணவு பொருட்களை எல்லாம் இழந்தாலும், ரெயில்வே நிர்வாகம் அதையெல்லாம் கவனிப்பதாக தெரியவில்லை.

இப்போது பெண்களுக்கே பாதுகாப்பு இல்லாத ஒரு நிலை ஏற்பட்டுள்ளது. சில நாட்களுக்கு முன்பு கொச்சியில் ஒரு வணிக வளாகத்தில் வேலைபார்க்கும் 23 வயது பெண், ஷோரனூர் அருகேயுள்ள தன் வீட்டுக்கு செல்வதற்காக ரெயிலில் பயணம் செய்தார். தனது திருமணம் பற்றி முடிவு செய்வதற்காக அவர் ஆயிரம் கனவுகளோடு எர்ணாகுளம்-ஷோரனூர் பாசஞ்சர் ரெயிலில் இரவில் பெண்கள் பெட்டியில் பயணம் செய்தார். திருச்சூர் தாண்டியவுடன் அந்த பெட்டியில் இருந்த எல்லோரும் இறங்கிவிட்டனர். வள்ளத்தோல் நகர் ரெயில் நிலையத்தில் இருந்து ரெயில் புறப்பட்டவுடன் ஒற்றைக்கை உள்ள ஒருவன் ஓடிப்போய் அநëத ரெயில் பெட்டியில் ஏறினான். சற்று நேரத்தில் அந்த பெண்கள் பெட்டியில் பயணம் செய்த பெண்ணின் கூக்குரல் பக்கத்து பெட்டிகளுக்கு கேட்டது. அடுத்தவருக்கு ஆபத்து என்றால் முடங்கி படுத்துக்கொள்ளும் குணமுடைய அடுத்த பெட்டியில் பயணம் செய்தவர்கள் யாரும் ரெயிலை இடையில் நிறுத்தவோ, அந்த பெண்ணை காப்பாற்றவோ முயற்சி செய்யவில்லை. வெட்டிக்கத்திரி ரெயில் நிலையத்துக்கும், செருதுருத்தி ரெயில் நிலையத்துக்கும் இடையே அந்த ஒற்றைக்கை மனிதன், அந்த பெண்ணை ஓடும் ரெயிலில் இருந்து கீழே தள்ளிவிட்டு, தானும் குதித்துவிட்டான். ரெயிலில் இருந்து விழுந்த அந்த பெண்ணுக்கு தலையில் காயங்கள் ஏற்பட்டது. மண்டை ஓட்டில் முறிவு ஏற்பட்டிருந்தது. மூளையில் இருந்தும் ரத்தம் கசிந்தது. பாவி பயல் காயம் அடைந்த அந்த பெண்ணை அதோடு விட்டுவிடாமல், வெறித்தனமாக கற்பழித்திருக்கிறான். இந்த ஒற்றைக்கை மனிதனின் கொடூர செயல் நாட்டையே உலுக்கிவிட்டது.

இந்த கொடூர செயலை செய்த ஒற்றைக்கை மனிதன் விருத்தாசலத்தை சேர்ந்த கோவிந்தசாமி என்பதை போலீசார் கண்டுபிடித்து கைது செய்தனர். பொதுவாக முன்பெல்லாம் ரெயில் பெட்டிகளில் அதுவும், 2-ம் வகுப்பு ரிசர்வேஷன் பெட்டியில் பெண்களுக்கு தனியாக 6 பெர்த்துகள் ஒதுக்கப்பட்டு, அதை மூடிக்கொள்ளும் வசதியும் இருக்கும். தனியாக பயணம் செய்யும் பெண்களுக்கு இது மிகவும் பாதுகாப்பாக இருக்கும். இப்போது அந்த வசதிகளை எடுத்துவிட்டார்கள். மீண்டும் அனைத்து ரெயில் பெட்டிகளிலும் பெண்களுக்கு என சில பெர்த்துகளை ஒதுக்க வேண்டும். ரெயில்வே போலீசிலும், ரெயில்வே பாதுகாப்பு படையிலும் ஏராளமான பெண் போலீசார் இருக்கிறார்கள். அவர்களை பெண்கள் பெட்டியிலும், பெண்கள் அதிகம் பயணம் செய்யும் பெர்த்துகளிலும் பாதுகாப்புக்காக நியமிக்க வேண்டும். பயணிகளின் பாதுகாப்புக்கு இனி அதிக முன்னுரிமை கொடுக்க வேண்டும்.

ரெயில் பெட்டிகளில் தேவையில்லாமல் பொருட்களை விற்க வருகிறவர்கள், பிச்சைக்காரர்களை தடை செய்யவேண்டும். இந்த ஈன செயலை செய்தவர் ஒரு கை உள்ளவன். எனவே பாதுகாப்பு என வரும்போது பாவம் பரிதாபம் பார்க்கவே கூடாது. ஓடும் ரெயில்களில் குறிப்பாக, இரவு ரெயில்களில் பாதுகாப்பை பலப்படுத்த வேண்டும். இரவு நேரங்களில் ரெயில் நிலையங்களிலும் சந்தேகத்துக்கிடமான யாரையும் நடமாவிடக்கூடாது. மொத்தத்தில் ரெயில் பயணம் என்பதை பாதுகாப்பான, வசதியான பயணமாக்க நடவடிக்கைகளை ரெயில்வே துறை எடுக்க வேண்டும்.

தினதந்தி தலையங்கம்

இந்த ஈன செயலை செய்தவன் ஒரு மனிதனே இல்லை.காயம்பட்ட பெண்ணை கற்பழிச்சு இருக்கானே,அவன எல்லாம் கல்லால் அடிச்சே சாகடிக்கணும்.