எகிப்து: எம்எஎஸ், ஏர் ஏசியா மாணவர்களை வெளியேற்றத் தொடங்கியுள்ளன

கலவரம் சூழ்ந்துள்ள எகிப்திலிருந்து மலேசிய மாணவர்களை எம்எஎஸ், ஏர் ஏசியா விமானங்கள் வெளியேற்றத் தொடங்கியுள்ளன.

மலேசிய நேரப்படி இன்று பிற்பகல் மூன்று மணிக்கு எம்எஎஸ் விமானம் முதல் தொகுதியைச் சேர்ந்த 350 மாணவர்களை கெய்ரோவிலிருந்து சவூதி அரேபியாவில் உள்ள ஜெட்டாவுக்குக் கொண்டு சென்றது. அடுத்து ஏர் ஏசியா விமானம் ஒன்று விரைவில் 300 மாணவர்களை கெய்ரோவிலிருந்து கொண்டு செல்லவிருக்கிறது.

அந்த விவரங்களை கெய்ரோவில் வெளியுறவுத் துணை அமைச்சர் எ கோகிலன் பிள்ளை இன்று பெர்னாமாவிடம் வெளியிட்டார்.

அந்த மாணவர்கள் அனைவரும் ஜெட்டாவில் உள்ள தாபோங் ஹாஜி தங்கும் விடுதியில் தங்க வைக்கப்படுவார்கள் என்றும் அவர் சொன்னார்.

ஜெட்டாவில் உள்ள அந்தத் தங்கும் விடுதியில் மாணவர்களைத் தங்க வைக்கும் பொறுப்பு 35 தாபோங் ஹாஜி ஊழியர்களிடம் வழங்கப்பட்டுள்ளதாக தாபோங் ஹாஜி தலைமை நிர்வாக அதிகாரி இஸ்மி இஸ்மாயில் கூறினார்.

இன்னும் அதிகமான மாணவர்களை கெய்ரோவிலிருந்து வெளியேற்றுவதற்கு எகிப்திய வான் போக்குவரத்து அதிகாரிகளிடமிருந்து அனுமதிக்காக ஏர் ஏசியா காத்திருப்பதாக அதன் குழுமத் துணைத் தலைமை நிர்வாகி கமாருதீன் மெரானுன் தெரிவித்தார்.

இதனிடையே அபு டாபியில் நிறுத்தப்பட்டுள்ள அரச மலேசிய ஆகாயப் படையின் சி130 ரக ஹெர்குலிஸ் விமானம் ஜெட்டாவில் தரையிறங்குவதற்கு சவூதி அரேபிய வான் போக்குவரத்து அதிகாரிகளின் அனுமதிக்காகக் காத்திருப்பதாக அறிவிக்கப்பட்டுள்ளது.

அந்த விமானம் நேற்றிரவு சுபாங் அரச மலேசிய ஆகாயப் படைத் தளத்திலிருந்து புறப்பட்டு அபு டாபி விமான நிலையத்தை மலேசிய நேரப்படி இன்று பிற்பகல் சென்றடைந்தது.

அந்த விமானம் மாணவர்களுக்கு உணவுப் பொருட்களைக் கொண்டு சென்றுள்ளது. கெய்ரோவிலிருந்து ஜெட்டாவுக்கு மாணவர்களை கொண்டு வருவதற்கும் அந்த விமானம் பயன்படுத்தப்படும்.

கெய்ரோவிலிருந்து ஜெட்டாவுக்குக் கொண்டு செல்லும் மாணவர்கள் மற்றும் மலேசியர் எண்ணிக்கையை அதிகரிப்பதற்கு எம்எஎஸ் முயலுவதாக அதன் நிர்வாகத் துணைத் தலைவர் கேப்டன் முகமட் நவாவி அவாங் கூறியிருக்கிறார்.

“நாள் ஒன்றுக்கு அந்த விமானம் மூன்று முறை அந்த இரண்டு மாநகரங்களுக்கும் இடையில் பயணம் செய்ய முடியும். முதல் நாளன்று கெய்ரோவில் திட்டமிட்டபடி நிகழ்ந்ததால் எல்லாம் சுமுகமாக இருந்தது”, என அவர் சொன்னார்.

மலேசியாஇன்று