நெறிகட்டி ஏறுகிறது உணவு பொருட்கள் விலை: மத்திய அரசு தலையிடுமா?

புதுடில்லி : காய்கறிகள், வெங்காயம் ஆகியவற்றின் கடுமையான விலை உயர்வு காரணமாக, உணவு பொருட்களுக்கான பணவீக்கம் 4 சதவீதம் அதிகரித்து, 18.32 சதவீதத்தை எட்டியுள்ளது. இதனால், மத்திய அரசும், ரிசர்வ் வங்கியும் இதில் தலையிட வேண்டிய கட்டாயம் ஏற்பட்டுள்ளது.

உணவு பொருட்களின் விலை, இப்படியே உயர்ந்து கொண்டிருந்தால், மத்திய ரிசர்வ் வங்கி, வட்டி விகிதங்களை மாற்றியமைக்கும் வகையில், நிதி கொள்கையை மாற்ற வேண்டிய கட்டாயம் ஏற்படும் என, பொருளாதார வல்லுனர்கள் கருத்து தெரிவித்துள்ளனர். கடந்த டிசம்பரில் வெங்காயம் மற்றும் காய்கறிகளின் விலை, ஏழை மற்றும் நடுத்தர மக்களை பாதிக்கும் வகையில் இருந்தது. இதனால், நவம்பர் வரை கட்டுக்குள் இருந்த உணவு பொருள் பணவீக்கம் தொடர்ந்து மேலே ஏற துவங்கியது. கடந்த டிசம்பர் 18ம் தேதியுடன் முடிந்த வாரத்தில் உணவு பொருள் பணவீக்கம் 14.44 சதவீதமாக இருந்தது. இதன்பின் ஒரு வார காலத்தில் தான் அனைத்து விலைகளும் கூடின. வெங்காயத்தில் துவங்கி, பூண்டு, புளி என சகட்டுமேனிக்கு விலைகள் ஏறின. குறிப்பாக வெங்காயத்தின் விலை 82 சதவீதமும், காய்கறிகள் விலை 59 சதவீதமும் உயர்ந்து, பால் உட்பட அத்தியாவசிய பொருட்களின் விலை உயர்ந்தன. இதனால், டிசம்பர் 25ம் தேதியுடன் முடிந்த வாரத்தில் பணவீக்கம் 18.32 சதவீதமாக உயர்ந்தது. தொடர்ந்து ஐந்து வாரமாக உணவு பொருட்கள் பணவீக்கம் இரட்டை இலக்கத்திலேயே உயர்ந்து கொண்டிருக்கிறது.

உணவு பொருள் பணவீக்கம் உயர்வது, வேகமான பொருளாதார வளர்ச்சியை நோக்கி நகரும் இந்தியாவுக்கு தடையாக இருக்கும் என, சர்வதேச நிதியம் எச்சரிக்கை விடுத்துள்ளது. கடந்தாண்டில் மட்டும், பணவீக்கத்தை கட்டுப்படுத்தும் நோக்கில் மத்திய ரிசர்வ் வங்கி, ஆறு முறை வட்டி விகிதங்களை மாற்றியமைத்தது. தற்போதுள்ள நிலையில் 18 சதவீதத்திற்கு மேல் சென்றுள்ள உணவு பொருட்கள் பணவீக்கம், ஒட்டுமொத்த பணவீக்கத்தை ஆட்டம் காண செய்யலாம். எனவே, வரும் 25ம் தேதி, மத்திய ரிசர்வ் வங்கி அறிவிக்கவுள்ள நிதி கொள்கையில் பல அதிரடி மாற்றங்கள் அறிவிக்கப்படும் என தெரிகிறது. மத்திய நிதியமைச்சர் பிரணாப் முகர்ஜி கூறுகையில், "இது வாராவாரம் உள்ள பொருட்களின் விலை நிலவரத்திற்கு ஏற்பவுள்ள புள்ளி விவரம். வாரம்தோறும் சில மாறுபாடுகள் இருக்க தான் செய்யும். மாதந்தோறும் வெளியாகும் பணவீக்கம் புள்ளி விவரத்தை தான் எதிர்பார்த்துள்ளோம்' என்றார்.

நிதி அமைச்சகத்திற்கான முதன் மை பொருளாதார ஆலோசகர் கவுசிக் பாசு கூறுகையில், "உணவு பொருட்களுக்கான பணவீக்கம் இந்த அளவில் உயரும் என்று எதிர்பார்த்தது தான். இருப்பினும் இதற்கு மேல் செல்ல வாய்ப்பு இல்லை. வெங்காயத்தின் விலை உயர்வு தான், உணவு பொருட்கள் பணவீக்கம் அதிகரிப்பதற்கு காரணம். இதன் விலையை குறைக்க நடவடிக்கை எடுக்கப்பட்டு வருகிறது. வெங்காயம் அனைத்து மாநிலங்களுக்கும் தட்டுப்பாடு இன்றி சென்று சேருவதற்கு நடவடிக்கை எடுக்கப்பட்டுள்ளது' என்றார்.