ரமலான் முபாரக்!

**Tamilzhan** · **Tamilzhan** Wed Aug 19, 2009 11:52 pm

ரமலான் முபாரக்!

சிலருக்கு பொருளீட்டல், வேறு சிலருக்குப் புகழீட்டல்,மற்றுஞ் சிலருக்கு இடையறா உழைத்தல், நாள்தோறும் அல்லாடல், வறியோர் பலருக்கு வாழ்க்கையே தள்ளாடல் எனக் காட்டுவெள்ளக் கதியாகக் கரைபுரண்டு ஓடிக் கொண்டிருந்த மனித இனக் குதிரைகளுக்கு ஒரு கடிவாளம் இடப்படுகிறது. அல்லது இட்டுக்கொள்கின்றனர்.
ஆம், நோன்பின் வருகை, மனித குல மல்லாடலை அமைதிப்படுத்தி,ஆசுவாசங்கொள்ள வைத்திருக்கிறது.
அதிகார அதட்டலுக்கும் மிரட்டலுக்கும் அடிபணியாத மனித மனம்,தன்னைத்தானே அடக்கியும், அடங்கியும்,ஐம்புலன்கள் ஒடுங்கியும் ஒரு சுதந்திர கட்டுப்பாட்டிற்குள் தன்னைச் சுருக்கிக் கொள்ளவும் தூண்டிய ரமலான் மாத நோன்பின் மகத்துவமே மகத்துவம்!
இஸ்லாமியத் தத்துவத்திற்குத் தமது அறியாமையின் காரணமாக முரண்பாடு கற்பிக்கும் துவேஷிகளைக் கூட-வியந்து,விழிப்புருவத்தை உயர்த்திப் பார்க்க செய்வது இந் நோன்பேயாகும்.
'(பிறருக்கு) நன்மை செய்யுங்கள்,ஏனென்றால் நன்மை செய்வோரை இறைவன் நேசிக்கிறான்"(2:195) எனும் திருக்குர்ஆன் திரு வசனம்-பவுர்ணமி இரவின் பளிங்கு வெளிச்சம்போல்-அனைவர் கவனத்தையும் கவர்ந்தீர்க்கும் காலம்-ரமலான் மாதத்தின் சீலம்!
தன் வீட்டு உணவை உண்ணத் தானே தடை விதித்துக் கொள்ளவும், தான் ஈட்டிய பொருட்செல்வத்தைத் தானே மனமுவந்து தர்மம் (ஜகாத்) கொடுக்கவும், தனக்குள் தானே ஒரு அரசாங்கத்தை அமைத்துக் கொள்ளும் சுயாதிகாரத்தைகப் புனித ரமலான் போதிக்க வந்துள்ளது.
பாலிஸ்டர் உடைப் பணக்காரர்களே, அதோ கந்தல் துணிகளைக் கொஞ்சமேனும் கவனியுங்கள்.
மாடிகள் மீது மலர்காவை அமைக்கத் துடிப்போரே, அதோ ஒழுகும் குடிசைகளுக்கு ஓலைவேய வசதியில்லாதாரைச் சற்றேனும் உற்றுப் பாருங்கள்!
'அரசியலுக்கு வருவது பணம் சம்பாதிக்க" என்றும்- 'பணவசதியுள்ளவர்களுக்கே அரசியல் கட்சிகளில் முக்கியப் பதவிகள்" என்றும் மாறிவிட்டப் பணநாயகக் காலத்தில், நாம் ஜனநாயகம் காக்க ஷஹீதுக்கும் தயாராவோம்!

கண்ணியமிகு புண்ணிய ரமலான் நமக்குப் புத்தியும் புதிய சக்தியும் வழங்குமாக!

ரமலான் முபாரக்!

ரமலான் முபாரக்!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக