அமெரிக்க படை வருவதால் கொரியாவில் பதட்டம், போர் வெடிக்குமா?

தென்கொரியா-வட கொரியா நாடுகள் பரம்பரை எதிரி நாடுகளாக உள்ளன. தென் கொரியாவுக்கு ஆதரவாக அமெரிக்கா செயல்பட்டு வருகிறது. இதற்காக அமெரிக்காவின் படை பிரிவுகள் ஏற்கனவே தென் கொரியாவில் முகாமிட்டு உள்ளன.

இந்த நிலையில் தென் கொரியாவுக்கு சொந்தமான பியோன் பியோங் தீவு மீது வடகொரியா திடீ ரென பீரங்கி தாக்குதல் நடத்தியது. இதில் 2 ராணுவ வீரர்கள் உள்பட 4 பேர் கொல்லப்பட்டனர். வடகொரியா தாக்கியதை அடுத்து தென்கொரியாவும் எதிர் தாக்குதல் நடத்தியது. இதனால் இரு நாடுகளுக்கும் இடையே போர் மூளும் சூழ்நிலை உருவானது.

இதற்கிடையே தென் கொரியாவை காப்பாற்றும் நோக்கத்துடன் அமெரிக்கா கூடுதல் படைகளை தென் கொரியாவுக்கு அனுப்பி வைக்கிறது. முதலில் யு.எஸ்.எஸ். வாஷிங்டன் என்ற நாசகார விமானத்தாங்கி கப்பலை அனுப்பி வைக்கிறது. இந்த கப்பலில் 75 போர் விமானங்களும் 6 ஆயிரம் ராணுவ வீரர்களும் உள்ளனர்.

இந்த கப்பல் வருவதால் கொரியா பிராந்தியத்தில் பதட்டம் ஏற்பட்டுள்ளது. வடகொரியா தாக்குதலுக்கு பதிலடி கொடுக்கும் வகையில் தென்கொரியா அமெரிக்கா உதவியுடன் ஏதாவது தாக்குதலை நடத்தலாம் என எதிர்பார்க்கப்படுகிறது. இதனால் இரு நாட்டுக்கும் இடையே போர் வெடிக்கலாம் என்ற அச்சம் நிலவுகிறது.

வடகொரியாவுக்கு ஏற்கனவே சீனா, ரஷியா ஆகியவை ஆதரவாக உள்ளன. இப்போது அமெரிக்கா தென்கெரியாவுக்கு ஆதரவாக களம் இறங்குவதால் சீனாவும், ரஷியாவும் வட கொரியாவுக்கு ஆதரவாக இறங்க வாய்ப்பு உள்ளது. அப்படி ஒரு சம்பவம் நிகழ்ந்தால் பெரும் போராக மாறும் வாய்ப்பாக அமைந்து விடும்.

இதற்கிடையே தென் கொரியா மீது தாக்குதல் நடத்தியதற்கு அமெரிக்காவே காரணம் என்று வட கொரியா கூறியுள்ளது.

இதுபற்றி வடகொரியா ராணுவ அதிகாரபூர்வ ஏஜென்சி வெளியிட்டுள்ள செய்தியில் தென்கொரி யாவுக்கு ஆதரவாக முகாமிட்டுள்ள அமெரிக்க படைகள் எங்கள் கடல் எல்லை பகுதிக்குள் பல தடவை அத்துமீறி நுழைகின்றன. இதற்காகவே நாங்கள் தாக்கினோம். இந்த தாக்குதலுக்கு அமெரிக்காத்தான் காரணம் என்று கூறி உள்ளது.