ரேகிங் செய்த கல்லூரி மாணவர்கள் கைது! கல்லூரியை விட்டும் நீக்கம்

துறையூர்:

புத்தனாம்பட்டி தனியார் கல்லூரி ஒன்றில் முதலாம் ஆண்டு மாணவரை ராக்கிங் செய்து துன்புறுத்திய மூன்றாம் ஆண்டு மாணவர்கள் 6 பேர் கல்லூரியில் இருந்து நீக்கப்பட்டுள்ளனர். மேலும் மாணவனின் பெற்றோர் காவல்துறையிடம் கொடுத்த புகாரின் அடிப்படையில் காவல்துறையினர் அவர்களை கைது செய்துள்ளனர்.

புத்தனாம்பட்டியில் உள்ள நேரு நினைவுக்கல்லூரியில் தினேஷ்குமார் என்ற மாணவர், முதலாம் ஆண்டு பி.எஸ்.சி., பட்டயப் படிப்பில் சேர்ந்துள்ளார். கல்லூரி விடுதியில் தங்கியிருந்த திணேஷ்குமாரை, மூன்றாம் ஆண்டு மாணவர்கள் ஆடைகளை கழற்றுமாறு ராக்கிங் செய்துள்ளனர். இதற்கு மறுத்த தினேஷ்குமாரை, மாணவர்கள் பிரபு, கணேஷ் உள்ளிட்டோர் தாக்கியுள்ளனர். இதில் கடுமையான காயம் அடைந்த தினேஷ்குமார் அங்குள்ள தனியார் மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்த சம்பவத்தை தொடர்ந்து விசாரணை நடத்திய கல்லூரி நிர்வாகம், 6 மாணவர்களையும் கல்லூரியில் இருந்து நீக்கி உத்தரவிட்டது. இந்த 6 பேரும் தினேஷ்குமார் அளித்த புகாரின் பேரில், துறையூர் காவல்துறையினரால் கைது செய்யப்பட்டுள்ளனர். மேலும் கல்லூரியில் இருந்து நீக்கப்பட்ட மாணவர்களின் பெற்றோரை வரவழைத்து, மாணவர்களின் டிசியை வழங்க கல்லூரி நிர்வாகம் நடவடிக்கை எடுத்து வருகிறது.

தினேஷ்குமார் நாமக்கல் மாவட்டம் ராசிபுரம் அருகே நாரைகிணறைச் சேர்ந்தவர். எல்.ஐ.சி., அலுவலகத்தில் பணியாற்றி வரும் இவரது தந்தை சுந்தர்ராஜன் கூறுகையில், எனது மகன் தாக்கப்பட்டது பற்றி உரிய விசாரணை நடத்தி சரியான தண்டனை கொடுக்க வேண்டும் இனி என் மகனைப் போல் வேறு எந்த ஒரு மாணவனும் பாதிக்கப்படக் கூடாது என்றும் கூறினார்.