வாடகை வீட்டில் வாடும் தியாகியின் குடும்பம்: வீடு கட்டித்தர இழுத்தடிப்பு

திருப்பூர் :

திருப்பூர் நகராட்சியின் முதல் தலைவர் விட்டல்தாஸ்
ஆனந்த்ஜி சேட் குடும் பத்தை சேர்ந்த, தியாகி கோவிந்ததாஸ் மனைவி ரமாபாய்,
வாடகை வீட்டில் வசிக்கிறார்.
திருப்பூர் மாநகராட்சி அலுவலகத்திற்கு இடமும், கால்நடை
மருத்துவமனைக்கும் 100 கோடி ரூபாய் மதிப்புள்ள இடத்தை தானமாக வழங்கியவரின்
குடும்பத்தினர், வசிக்க வீடின்றி வாடகை வீட்டில் இறுதி காலத்தை கழித்து
வருகின்றனர். கடந்த 1917ம் ஆண்டு, திருப்பூர் நகராட்சியாக தரம்
உயர்த்தப்பட்டது. அதன் முதல் தலைவராக விட்டல்தாஸ் ஆனந்த்ஜி சேட்
பொறுப்பேற்றார். நகராட்சி அலுவலகம் அமைக்க, தன் சொந்த நிலத்தை (தற்போது
மாநகராட்சி அலுவலகம் செயல்படும் இடம்) விட்டல்தாஸ் தானமாக கொடுத்தார்.
பழைய பஸ் ஸ்டாண்ட் எதிரே உள்ள கால்நடை மருத்துவமனை வளா கத்தையும்,
பார்க் ரோட்டில் உள்ள நூலக இடத்தையும் நன்கொடையாக வழங்கினார். இவற்றின்
தற்போதைய மதிப்பு 100 கோடி ரூபாயை தாண்டும். விட்டல்தாசின் நான்கு
மகன்களுள் ஒருவரான கோவிந்ததாஸ், சுதந்திர போராட்ட தியாகி; அவரது மனைவி
ரமாபாய் (81). தற்போது, ராயபுரம், சூசையாபுரத்தில் சுப்பாத்தாள்
காம்பவுண்டில் 1,400 ரூபாய் வாடகை வீட்டில் வசிக்கிறார். மிகச்சிறிய ஓட்டு
வீட்டில் தன் மகனுடன் வசித்து வருகிறார், ரமாபாய். மத்திய அரசு வழங்கும்
தியாகிகளுக்கான பென்ஷன் மட்டுமே இவரது வருவாய் ஆதாரம்.
திருப்பூர் மக்களுக்காக சொந்த நிலத்தை தானமாக கொடுத்த வள்ளலின்
வாரிசுகள் வாடகை வீட்டில், ஏழ்மை நிலையில் இருப்பது குறித்து, 2007 டிச.,
29ல் "தினமலர்' நாளிதழில் செய்தி வெளியிடப்பட்டது. இதையடுத்து,
மாநகராட்சியாக தரம் உயர்த்தப்பட்ட பின் நடந்த முதல் கவுன்சில் கூட்டத்தில்
வழங்கப்பட்ட அமர்வுப்படியை கவுன்சிலர்கள், ரமாபாய் குடும்பத்தினருக்கு
நன்கொடையாக அளித்தனர். "திருப்பூர் சிட்டி கிளப்' ஒரு லட்சம் ரூபாய் நிதி
உதவி வழங்கியது. மேயர் செல்வராஜ், நகர தி.மு.க., சார்பில் நெருப்பெரிச்சல்
பகுதியில் ஐந்தரை சென்ட் நிலத்தை வழங்கினார். பல்வேறு அமைப்புகளும்
தங்களால் இயன்ற தொகையை வழங்கின.
இன்னும் சில அமைப்புகள் அந்த இடத்தில் வீடு கட்டித்தருவதாக
உறுதியளித்தன. ஆனால், ஆண்டுகள் இரண்டு கடந்தும் வீடு கட்டிக்
கொடுக்கவில்லை. அன்று வீடுகட்டித்தர முன்வருவதாகவும், பொருளுதவி
செய்வதாகவும் கூறிய பலரும் அதற்கான முயற்சி செய்யவில்லை. அதன்பின்,
மாநகராட்சி பகுதிக்குள், விட்டல்தாஸ் குடும்பத்துக்கு இடம் ஒதுக்க
வேண்டும் என்ற கோரிக்கை எழுந்தது. இக்கோரிக்கைக்கு நகரப் பகுதிக்குள்ளேயே
இடம் வழங்குவது குறித்து மாநகராட்சி நிர்வாகம் அரசுக்கு பரிந்துரைத்தது.
ஆனால், அரசு தரப்பில் இருந்து பதில் வரவில்லை. மாநகராட்சி நிர்வாகம்
தொடர்ந்து மவுனம் சாதிக்கிறது. கோடிக்கணக்கான மதிப்புள்ள நிலத்தை அரசுக்கு
தானமாக கொடுத்த குடும்பம், இன்று வறுமையில் வாடுகிறது; அதுவும்
சுதந்திரத்துக் காக பாடுபட்ட குடும்பம். மாநகராட்சி நிர்வாகம் துரித
நடவடிக்கை எடுத்து தியாகி குடும்பத்திற்கு நேசக் கரம் நீட்ட வேண்டும்.