வீடுகளிலிருந்த "டிவி'க்கள் வெடித்தன

உடுமலை:

உடுமலையில், வீட்டு மின் இணைப்புகளில் திடீர் உயர் மின் அழுத்தம்
பாய்ந்ததால், அடுத்தடுத்து பல வீடுகளிலிருந்த "டிவி', மின் விளக்குகள்
உட்பட மின் சாதன பொருட்கள் வெடித்ததால் பரபரப்பு ஏற்பட்டது.உடுமலை ராமசாமி
நகர், எம்.ஜி.ஆர்., நகர் பகுதிகளில் 50க்கும் மேற்பட்ட வீடுகள் உள்ளன.
இப்பகுதி மக்கள் நேற்று காலை 7.30 மணிக்கு வழக்கமான வேலைகளில்
ஈடுபட்டிருந்தனர். ஒரு சில வீடுகளில் "டிவி'க்கள்
ஓடிக்கொண்டிருந்தன.திடீரென அதிக அழுத்தத்துடன் மின்சாரம் பாய்ந்ததால்,
இப்பகுதியிலுள்ள வீடுகளில் உபயோகத்தில் இருந்த மின் சாதன பொருட்கள்
வெடித்து சிதறின.வீடுகளில் எரிந்து கொண்டிருந்த மின் விளக்குகள் வெடித்து
சிதறின. அதோடு, "டிவி'க்களும் வெடித்ததால், "டிவி' பார்த்துக்
கொண்டிருந்தவர்கள் அலறியடித்துக் கொண்டு வெளியில் ஓடிவந்தனர்.சுவிட்ச்
போர்டுகள், மிக்ஷி, கிரைண்டர் உட்பட உபயோகத்திலிருந்த அனைத்து மின் சாதன
பொருட்களும் வெடித்தன. ஒரு சில வீடுகளில் மின்சாதன பொருட்கள்
தீப்பிடித்து, கருகின. ஒரு சில வினாடிகளில், அடுத்தடுத்து வீடுகளிலிருந்த
மின் சாதன பொருட்கள் வெடித்து சிதறியதால் பொதுமக்கள்
அதிர்ச்சியடைந்தனர்.இச்சம்பவத்தில், 30க்கும் மேற்பட்ட வீடுகளில் இருந்த
"டிவி'க்கள் வெடித்தன. உடுமலை நகராட்சி பகுதியில் கடந்த இரண்டு நாட்களாக
தமிழக அரசின் இலவச கலர் "டிவி'க்கள் வழங்கப்பட்டு வரும் நிலையில்,
25க்கும் மேற்பட்ட இலவச கலர் "டிவி'க்கள் இதில் வெடித்து
சிதறின.வீட்டிற்குள் எரிந்து கொண்டிருந்த மின் சாதன பொருட்களால் தீ
விபத்து ஏற்படாமல் தடுக்கும் வகையில் வீட்டிற்கு வெளியில் கொண்டு வந்து
வைத்து, அணைத்தனர். இதனால், இப்பகுதியில் பரபரப்பு ஏற்பட்டது. இது
குறித்து தகவல் கிடைத்ததும் மின் வாரிய ஊழியர்கள் சம்பவ இடத்திற்கு வந்து
ஆய்வு செய்து, மீண்டும் மின் இணைப்பு வழங்க முயற்சித்தனர். ஆனால்,
தொடர்ந்து இதே போல் மின் சாதனங்கள் வெடித்ததால், மின் இணைப்பு
இப்பகுதியில் முற்றிலும் துண்டிக்கப்பட்டது.