அழகிரியை விமர்சித்து சுவரொட்டி ஒட்ட நீதிமன்றம் தடை

மத்திய அமைச்சர் மு.க அழகிரியை விமர்சித்து போஸ்டர் ஒட்டுவதற்கு அதிமுகவினருக்கு இடைக்கால தடை விதித்து மதுரை மாவட்ட நீதிமன்றம் செவ்வாய்க்கிழமை உத்தரவிட்டது.
மதுரை எஸ்.எஸ். காலனி நாவலர் நகரைச் சேர்ந்த சுகுமார் என்பவர் மதுரை மாவட்ட செஷன்ஸ் நீதிமன்றத்தில் செவ்வாய்க்கிழமை தாக்கல் செய்த மனு விவரம்:

திமுகவைச் சேர்ந்த, மத்திய ரசாயனம் மற்றும் உரத்துறை அமைச்சர் மு.க. அழகிரி மக்களுக்கு பல்வேறு நலத்திட்டங்களை செய்து வருகிறார். தேனி மாவட்டம், பெரியகுளம் அருகே கடமலைக்குண்டு கிராமத்தில் நடந்த மருத்துவ முகாமில் பங்கேற்றவர்களுக்கு ஹார்லிக்ஸ் பாக்கெட் வழங்கப்பட்டது.

இந்நிலையில், 30.7.2010 நமது எம்.ஜி.ஆர். நாளிதழில் ஹார்லிக்ஸ் பாக்கெட்டுகளை திருடி கொடுப்பது போல கார்ட்டூன் போடப்பட்டுள்ளது. மேலும், அதற்கு அருகிலேயே "தா.கி. ஆவி (தா.கிருட்டிணன்)' என்ற தலைப்பில் 22 வரி கவிதையும் எழுதப்பட்டிருந்தது.

இந்த கார்ட்டூனை பெரிதாக போஸ்டர் வடிவில் மதுரை நகர் முழுவதும் அதிமுகவினர் ஒட்டுவதற்குத் திட்டமிட்டுள்ளதாகத் தெரிகிறது. எனவே, மத்திய அமைச்சரின் பெயருக்கு களங்கம் ஏற்படுத்தும் வகையில் உள்ள இதுபோன்ற சுவரொட்டிகளை அதிமுகவினர் ஒட்டுவதற்கு தடை விதிக்கவேண்டும் என அந்த மனுவில் குறிப்பிட்டிருந்தார்.

இந்த மனுவை விசாரித்து நீதிபதி ரத்தினராஜ் தனது உத்தரவில் தெரிவித்துள்ளது:

பொதுவாக அரசியல்வாதிகள் மற்றும் தலைவர்களை விமர்சனம் செய்வதை தவிர்க்க முடியாது. அதேநேரத்தில் அவர்களது புகழுக்கு களங்கம் ஏற்படுத்தும் விமர்சனங்கள் தவறானவையாகும்.

எல்லா அரசியல் தலைவர்களும் அவர்களுடைய நற்பண்புகளால்தான் மக்கள் மத்தியில் சென்று வலம் வரவோ, தேர்தல் நேரத்தில் ஓட்டுக்களை பெறவோ முடிகிறது.

அந்த நற்பண்புகளில் கவனம் செலுத்தி புகழுக்குக் களங்கம் ஏற்படாமல் பாதுகாத்தும் வருகின்றனர்.

இந்த வழக்கைப் பொறுத்தவரை ஹார்லிக்ஸ் பாக்கெட்டுகள் முறையாகக் கொள்முதல் செய்யப்பட்டுள்ளது. அதற்கான ரசீதுகளும் நீதிமன்றத்தில் தாக்கல் செய்யப்பட்டுள்ளன.

ஆனால், நமது எம்.ஜி.ஆர். பத்திரிகையில் வெளிவந்த கார்ட்டூன், கவிதை தவறானது மட்டுமல்ல; அமைச்சர் மு.க. அழகிரிக்கு களங்கம் ஏற்படுத்தக் கூடியதாகும். ஆகையால் 17.8.2010 வரை இதுபோன்ற சுவரொட்டிகளை ஒட்டுவதற்கும், கேலிசித்திரங்கள் வெளியிடுவதற்கும் இடைக்கால தடை விதிக்கிறேன்' என அந்த உத்தரவில் கூறப்பட்டுள்ளது.