நீங்களும் ரிஷிகள் தான்-விவேகானந்தர்

**பிளேடு பக்கிரி** · 01/03/2010

மற்றவர்களுக்காக நாம் செய்யும் சிறிதளவு நன்மையால் கூட
நமக்குள் இருக்கும் நல்ல சக்தியை தூண்ட முடியும். பிறருக்குச் செய்கின்ற
உதவியால் சிங்கத்திற்கு சமமான பேராற்றலை பெறலாம்.

நீங்கள் வேதகாலத்து ரிஷிகள் தான்! உங்களிடமே முழுமையான நம்பிக்கை வையுங்கள். முற்காலத்தில்
ரிஷிகளாகக் காட்டில் வாழ்ந்த நீங்கள், இப்போது வேறு விதமான வடிவம் தாங்கி
வந்திருக்கிறீர்கள். அந்த ரிஷிகளைப் போன்றே நீங்கள் மனவலிமை உடையவர்கள்.
எவன் ஒருவன் தன் மனதை முழுமையாக அடக்கக் கற்றுக் கொள்கிறானோ, அவனின்
கட்டளைக்கு இந்த உலகமே கட்டுப்பட்டு நிற்கும். அவனைக் கட்டுப்படுத்தும்
சக்தி கீழுலகத்திலும் இல்லை, மேலுலகத்திலும் இல்லை.

செய்த செயலைத் திரும்பிப் பார்த்து இப்படி செய்திருக்கலாம் அப்படி செய்திருக்கலாம் என்று
வீணான ஆராய்ச்சியில் ஈடுபடுவதை விட, அதைப் பற்றி சிந்திக்காமல் புதிதாக
என்ன நல்ல கடமை ஆற்றலாம் என்று ஆக்கப்பூர்வமாக சிந்திப்பது மேலானது. நீ
உண்பதனால் கடவுளைச் சிந்திப்பதற்காக மட்டும் உண்பாயாக. உறங்குவதென்றால்
கடவுளை அடைவதற்காக மட்டும் உறங்குவாயாக. மொத்தத்தில் வாழ்வதே
கடவுளுக்காகத்தான். நம்மைச் சுற்றி அனைத்திலும் ஆண்டவனை மட்டுமே காண்பாயாக.