மன்னனுக்கு வந்த வித்தியாசமான கனவு.

இன்றைய ஆன்மீக கதையில் - ஓர் மன்னனுக்கு வந்த வித்தியாசமான கனவு.
 நாம் பேசும் வார்த்தைகள் எதிராளிக்கு  சங்கடம் ஏற்படுத்தாமல் மதி நுட்பத்துடன் பேச வேண்டும் - நீதிக்கதை

ஒரு நாட்டின் அரசருக்கு ஒரு வித்தியாசமான கனவு ஒன்று வந்தது.

அவர் திடீரென பெரிய ஆலமரம் போல மாறி விட்டதாக வந்ததே அந்தக் கனவு.
பயந்து போய் பட்டென்று எழுந்து உட்கார்ந்து கொண்டார் உடனே.

மறுநாள் காலையிலேயே, அந்தக் கனவால் என்ன விளைவுகள் நேருமோ என்று பயந்து போய் அரண்மனை ஜோதிடரை அவசரமாக வர வழைத்தார். கண்ட கனவின் விவரத்தை சொன்னார் ஜோதிடரிடத்தில்.

அரசர் கண்டதாக சொன்ன கனவை செவிமடுத்த அந்த ஜோதிடர், தனது ஓலைச்சுவடியை எடுத்து, அதில் 'ஆலமரம் போல மாறும் கனவு" பற்றி விளக்கியிருந்த, ஒரு ஓலையை வாசித்தார். 

பிறகு சொன்னார், "அரசே! உங்கள் மனைவி, குழந்தைகள், சொந்த பந்தங்கள், உறவினர்கள் எல்லாம், உங்களுக்கு முன்பே இறந்து விடுவார்கள்.!"

இதுவே அந்தக் கனவின் பலன் என்று பட்டென்று பலன் சொன்னார் அரசரின் முகத்திற்கு நேராக.

ஜோதிடர் சொன்னதைக் கேட்ட அரசர் மிகவும் கோபமுற்று, 'இந்த ஜோதிடரைப் பிடித்து உடனே சிறையில் தள்ளுங்கள்!" என்று தன் காவலர்களுக்கு உத்தரவிட்டார்.

அதன் பிறகும் மன்னரின் மனம் சமாதானம் அடையவில்லை.

வேறு ஒரு ஜோதிடரை வரவழைத்து, அவரிடம், மீண்டும்
தான் கண்ட "ஆலமர கனவின்" அர்த்தம் என்ன என்று வினவினார்.

அந்த ஜோதிடரும் அதே மாதிரியான ஓலைச் சுவடியைத் தான் வைத்திருந்தார்.

அவரும் அதைப் பார்த்துவிட்டு, அரசரே, கவலை வேண்டாம். நீங்கள் கண்டது நல்ல கனவே. தெளிவாகச் சொல்கிறேன் அதன் பலனை.

"நீங்கள் வாழ்வாங்கு வாழப் போகிறீர்கள். எந்த எதிரியும் உங்களை வீழ்த்த முடியாது.

நீங்கள், உங்கள் சொந்த, பந்தங்களை, உற்றார் உறவினர்களை எல்லாம் விட, நீண்ட காலம் வாழ்வீர்கள்.!"

உங்கள் ஆயுள் அந்த ஆலமரம் மாதிரி நீடித்து நிலைத்திருக்கும்.
இதுவே நீங்கள் கண்ட கனவின் பலன் என்று பலன் கூறினார்.

ஜோதிடர் சொன்னதைக் கேட்ட அரசர், மனம் குளிர்ந்தார். அளவில்லாத ஆனந்தம் கொண்டார்.

அந்த ஜோதிடருக்கு தகுந்த பரிசுகள் வழங்கி அனுப்பி வைத்தார்.

இரு ஜோதிடர்களும் அதே ஓலையைத் தான் படித்தார்கள். அதே பலனைத்தான் சொன்னார்கள். 
ஆனால் எப்படிச் சொன்னார்கள்?
அதில் அல்லவா இருக்கிறது விஷயம்.

அரண்மனை ஜோதிடர், அரசரின் சொந்த பந்தங்கள் எல்லோரும் இறந்து விடுவார்கள் மன்னருக்கு முன்பே என்றார்.

இன்னொரு ஜோதிடரோ, அரசர், அவர் சொந்த பந்தங்கள், உற்றார் உறவினர்கள் எல்லோரையும் விட நீண்ட ஆயுளோடு வாழ்வார் அரசர் என்றார்.

அவ்வளவு தான் இருவர் அரசரிடம் உரைத்ததின் வித்தியாசம்.!

நீதி: நாம் பேசப் போகும் வார்த்தைகளை, பேசும் முன்பு சிந்தித்துப் பேசினால் பல பிரச்சனைகளைத் தவிர்க்கலாம். அதுவே இக்கதையின் நீதியாகும்.

நாம் பேசும் வார்த்தைகள், மற்றவரை சந்தோஷப்படுத்த வேண்டுமே தவிர, அதனால் எந்த வித சங்கடமும் ஏற்படாமல் பார்த்துக் கொள்வது உசிதம்.

ஸர்வம் ஸ்ரீ கிருஷ்ணார்ப்பணம்

நன்றி வாட்சப்.

நாவன்மையை கடைபிடிக்கவேண்டும்.

நா வன்மையை கடைபிடிக்கக்கூடாது .