ஆயுத பூஜையை முன்னிட்டு பழங்களின் விலை கிடுகிடு உயர்வு:

திருவொற்றியூர்:
ஆயுதபூஜையை முன்னிட்டு மாதவரம் பேருந்து நிலைய பழ மார்க்கெட்டில் பழங்களின் விலை கடுமையாக உயர்ந்துள்ளது. இதனால் சிறு வியாபாரிகள் வேதனை அடைந்துள்ளனர்.

வரும் 25ம் தேதி ஆயுத பூஜை பண்டிகை. இந்நாளில் வீடுகளிலும், தொழில் மற்றும் வர்த்தக நிறுவனங்களில் உபகரணங்களுக்கு பூஜை செய்வது வழக்கம். அப்போது அவல், பொரி மற்றும் பழங்கள் வைத்து படையலிடுவர்.

இதையொட்டி நேற்று அதிகாலை முதலே மாதவரம் பேருந்து நிலையத்தில் செயல்படும் தற்காலிக பழ மார்க்கெட்டில் ஏராளமான சிறு வியாபாரிகள் பழம் வாங்க குவிந்தனர்.

குறைந்த அளவில் மட்டுமே கடைகள் நடத்த அனுமதி வழங்கப்பட்டதால், பழங்களை வாங்குவதில் வியாபாரிகளுக்கு பெரும் சிரமம் ஏற்பட்டது.

அதுமட்டுமின்றி வழக்கத்தைவிட நேற்று பழங்களின் விலை 20 சதவீதம் வரை உயர்ந்து காணப்பட்டதால் சிறு வியாபாரிகள் குறைந்தளவு பழங்களை வாங்கிச் செல்லும் நிலை ஏற்பட்டது.

குறிப்பாக, ரூ.90 முதல் 100 வரை விற்ற ஒரு கிலோ ஆப்பிள் நேற்று ரூ.120 முதல் 130 வரை விலை விற்கப்பட்டது. கிலோ ரூ.30க்கு விற்ற கொய்யா, கிலோ ரூ45 முதல் 60 வரையிலும், கிலோ ரூ.35க்கு விற்ற சாத்துக்குடி ரூ.40 முதல் 50 வரையிலும், கிலோ ரூ.25க்கு விற்ற கமலா ஆரஞ்ச் ரூ.30 முதல் 40 வரையும் விற்றது.

ரூ.250க்கு விற்ற வாழைத்தார் ரூ.400க்கு விற்றது. இப்படி பழங்களின் விலை வழக்கத்தைவிட விலை அதிகமாக இருந்தது.
இந்த விலையேற்றம் இன்னும் இரு தினங்களில் மேலும்
அதிகரிக்கும் என்று வியாபாரிகள் தெரிவித்துள்ளனர்.

வட மாநிலங்களில் கடுமையான மழை மற்றும் பழங்களின் வரத்து குறைவாக இருப்பதாலும், சுங்கக் கட்டணங்கள் அதிகரித்திருப்பதாலும் இந்த விலை ஏற்றம் என கூறப்படுகிறது.

இதுகுறித்து சிறு வியாபாரிகள் கூறுகையில், ‘‘பண்டிகை தினங்களில்தான் பழங்கள் அதிகளவு விற்பனையாகும். தற்போது பழங்களின் விலை அதிகரித்து இருப்பதால் விற்பனை குறைந்துள்ளது. மேலும், மாதவரம் பேருந்து நிலையத்தில் குறைவான கடைகளே வைக்க அனுமதி வழங்கியதும்,
போதிய மொத்த வியாபாரிகள் இல்லாததும் இந்த விலை ஏற்றத்திற்கு காரணம்்’’ என்றனர்.

பூ விற்பனை மந்தம்
வானகரம் பூ மார்க்கெட்டில் நேற்று சாமந்தி பூ கிலோ ரூ.80 முதல் 100 வரை விற்பனையானது. ரோஜா கிலோ ரூ.140 முதல் 160 வரையும், சம்பங்கி கிலோ ரூ.200க்கும், கோழிக்கொண்டை பூ கிலோ ரூ.60 முதல் 100 வரையிலும், முல்லை கிலோ ரூ.600க்கும், ஜாதிமல்லி கிலோ ரூ.300க்கும், செண்டு மல்லி கிலோ ரூ.60க்கும், மல்லிகை பூ கிலோ ரூ.700 முதல் 1000 வரை விற்பனையானது.

தொடர் மழை காரணமாக மார்க்கெட் வளாகம் சகதியாக உள்ளதால், சிறு வியாபாரிகள் வந்து செல்ல முடியாமல் விற்பனை பாதிக்கப்பட்டது. எனவே, தீபாவளிக்குள் கோயம்பேடு பூ மார்க்கெட்டை திறக்க அரசு நடவடிக்கை எடுக்க வேண்டும், என்ற கோரிக்கை எழுந்துள்ளது.

தினகரன்