ரசலின் அதிரடியை டோனி சமாளிப்பாரா? - கொல்கத்தாவுடன் இன்று மோதல்

-
சென்னை:

12-வது ஐ.பி.எல். 20 ஓவர் கிரிக்கெட் போட்டி சென்னை, பெங்களூரு, ஐதராபாத், டெல்லி, மும்பை, கொல்கத்தா, மொகாலி, ஜெய்ப்பூர் ஆகிய 8 இடங்களில் நடைபெற்று வருகிறது.

இந்த போட்டியில் 8 அணிகள் பங்கேற்று விளையாடி வருகின்றன. ஒவ்வொரு அணியும், மற்ற அணிகளுடன் உள்ளூர், வெளியூர் என்ற கணக்கில் மோத வேண்டும். அதன்படி ஒரு அணி 14 போட்டியில் ஆட வேண்டும்.

‘லீக்’ முடிவில் புள்ளிகள் அடிப்படையில் முதல் 4 இடங்களை பிடிக்கும் அணிகள் ‘பிளேஆப்’ சுற்றுக்கு தகுதி பெறும்.

ஐ.பி.எல். போட்டியில் 23-வது ‘லீக்’ ஆட்டம் சேப்பாக்கம் எம்.ஏ.சிதம்பரம் மைதானத்தில் இன்று இரவு 8 மணிக்கு நடக்கிறது. இதில் டோனி தலைமையிலான சென்னை சூப்பர் கிங்ஸ் - தினேஷ் கார்த்திக் தலைமையிலான கொல்கத்தா நைட் ரைடர்ஸ் அணிகள் மோதுகின்றன.

5-வது வெற்றியை பெறப்போவது சென்னையா? கொல்கத்தாவா? என்று ஆவலுடன் எதிர்பார்க்கப்படுகிறது.

இரு அணிகளுமே 5 ஆட்டத்தில் 4 வெற்றி, 1 தோல்வியுடன் தலா 8 புள்ளிகள் பெற்றுள்ளன. ரன் ரேட் அடிப்படையில் கொல்கத்தா புள்ளிகள் பட்டியலில் முதல் இடத்தில் இருக்கிறது. இன்றைய ஆட்டத்தில் அந்த அணியை வீழ்த்தினால் சூப்பர் கிங்ஸ் மீண்டும் முதல் இடத்துக்கு முன்னேறும்.

சென்னை அணி மும்பையில் மட்டும் தோற்று இருந்தது. இதேபோல கொல்கத்தா சூப்பர் ஓவரில் டெல்லியிடம் தோற்றது. பெங்களூர், டெல்லி, ராஜஸ்தான், பஞ்சாப் அணிகளை சூப்பர் கிங்சும், ஐதராபாத், பஞ்சாப், பெங்களூரு, ராஜஸ்தான் அணிகளை நைட் ரைடர்சும் வீழ்த்தி இருந்தன.

சிறந்த அதிரடி பேட்ஸ்மேன்கள் விளையாடுவதால் இன்றைய ஆட்டம் ரசிகர்களுக்கு நல்ல விருந்தாக அமையும்.

கொல்கத்தா அணியில் விளையாடும் வெஸ்ட் இண்டீசை சேர்ந்த ஆந்த்ரே ரசல் அபாயகரமானவர் ஆவார். எந்த நேரத்திலும் ஆட்டத்தை மாற்றக்கூடிய வீரர். பெங்களூருக்கு எதிராக அவர் விளையாடியதை உதாரணமாக சொல்லலாம்.

ரஸ்சல் இதுவரை 22 சிக்சர்கள் எடுத்து உள்ளார். இதுதவிர கிறிஸ் லின், நிதிஷ் ரானா, உதித்யா, கேப்டன் தினேஷ் கார்த்திக் போன்ற அதிரடி பேட்ஸ்மேன்கள் உள்ளனர்.

சென்னை சூப்பர் கிங்ஸ் கேப்டனான டோனி சிறந்த அதிரடியான ஆட்டத்தை வெளிப்படுத்தி வருகிறார்.

ராஜஸ்தான் அணிக்கு எதிரான அவரது ஆட்டத்தை ரசிகர்கள் மறந்து இருக்க மாட்டார்கள். இது தவிர ரெய்னா, டுபெலிசிஸ், வாட்சன் போன்ற சிறந்த பேட்ஸ்மேன்களும் அந்த அணியில் உள்ளனர்.

ரசலின் அதிரடியை சமாளிக்க டோனியின் புத்தி சாலித்தனம் முக்கிய பங்காக இருக்கும்.

சேப்பாக்கம் மைதானத்தில் இன்று நடைபெறுவது 4-வது ஆட்டமாகும். இதுவரை நடந்த 3 ஆட்டத்திலும் சென்னை சூப்பர் கிங்ஸ் அணியே வெற்றி பெற்று இருந்தது. சூப்பர் கிங்சின் அதிரடி இன்றைய ஆட்டத்திலும் நீடிக்குமா? என்ற எதிர்பார்ப்பு இருக்கிறது.

உள்ளூர் ரசிகர்களின் ஆதரவுதான் சூப்பர் கிங்சுக்கு மிகப்பெரிய பலமாக இருக்கிறது.
-
மாலைமலர்