உலக தரத்தில் இரண்டு ரயில் நிலையங்கள் தயார்

-


புதுடில்லி:
மத்திய பிரதேசத்தின் ஹபிப்கன்ஜ் மற்றும் குஜராத்தின்
காந்தி நகர் ஆகிய இரண்டு ரயில் நிலையங்களை, உலக
தரத்தில், விமான நிலையங்களுக்கு இணையாக தரம்
உயர்த்தும் பணிகள் முடிவடைந்து அடுத்தாண்டு
ஜனவரியில் செயல்பாட்டிற்கு வரும் என எதிர்பார்க்கப்
படுகிறது.

இது தொடர்பாக இந்திய ரயில் நிலையங்கள் மேம்பாட்டு
கழக மேலாண்மை (ஐஆர்எஸ்டிசி)இயக்குநர்
எஸ்கே லோகியோ கூறுகையில், இரண்டு நிலையங்களையும்
தரம் உயர்த்தும் பணிகள் திருப்திகரமாக நடந்து வருகின்றன.

அடுத்தாண்டு ஜனவரி கடைசி அல்லது பிப்ரவரி துவக்கத்தில்
காந்திநகர், ஹபிப்கன்ஜ் நகர் ரயில் நிலையங்கள் செயல்பட
துவங்கும் என எதிர்பார்க்கிறோம் என்றார்.

ஹபிப்கன்ஜ் ரயில் நிலையத்தில் புனரமைப்பு பணிகள்
அரசு மற்றும் தனியார் ஒத்துழைப்புடன் நடந்து வருகிறது.
இதனை, ஜெர்மனியின் ஹெய்டெல்பெர்க் ரயில் நிலையத்தை
போல் தரம் உயர்த்த முடிவு செய்யப்பட்டது.

இந்திய ரயில் நிலையம் மேம்பாட்டு கழகம் மற்றும் பன்சால்
பாத்வேஸ் ஹபிப்கன்ஜ் நிறுவனம் இணைந்து இந்த பணியை
செயல்படுத்தி வருகின்றன. இந்த ரயில்நிலையத்தை தரம்
உயர்த்த ரூ.450 கோடி செலவாகும் என திட்டமிடப்பட்டது.

இதில் ரூ.100 கோடி ரயில் நிலையத்தை தரம் உயர்த்தவும்,
ரூ.350 கோடி வணிக ரீதியிலான மேம்பாட்டிற்கும் செலவு
செய்யப்பட்டுள்ளது. உலகத்தரத்தில், விமான நிலையத்திற்கு
இணையாக அமையும் இந்த ரயில் நிலையத்தில், சிறு வணிக
பகுதிகள், அருங்காட்சியகம், பொழுதுபோக்கு மற்றும்
கேளிக்கை அம்சங்கள், உணவு வளாகங்கள், சுத்தமான
கழிப்பறைகள் உள்ளிட்டவை இடம்பெற்றிருக்கும்.

இங்கு பயன்படுத்தப்படும் தண்ணீர், மறுசுழற்சி செய்து
மீண்டும் பயன்படுத்தப்படும்.

காந்திநகர் ரயில் நிலையத்தில், மேல்தளத்தில் 5 நட்சத்திர
ஓட்டல் அமைய உள்ளது. இந்த ரயில் நிலையத்தை புனரமைக்க
குஜராத் மாநில அரசும், இந்திய ரயில்நிலைய மேம்பாட்டு
கழகமும் இணைந்து ரூ.250 கோடி செலவு செய்கின்றன.

விமான நிலையத்திற்கு இணையாக புனரமைக்கப்படும்
இந்த ரயில் நிலையத்தில், அரங்கங்கள், புத்தக கடைகள்,
உணவு கடைகள், 600 பயணிகள் அமரும்வசதி,நவீன
சுத்தமான கழிப்பறைகள் இடம்பெறும்.

ரயில் நிலையத்தின் மேல் பகுதியில் அமைக்கப்படும்
5 நட்சத்திர ஓட்டலில் 300 அறைகள் அமைக்கப்பட உள்ளது.
இதனால், மாநிலத்திற்கு வரும் சுற்றுலா பயணிகள் மற்றும்
தொழிலதிபர்களுக்கு உதவும் என மாநில அரசு எதிர்பார்க்கிறது.
-
------------------------------------
தினமலர்