இறைவனை வழிபடும் ஒன்பது வழிபாட்டு முறைகள்....

நம் முன்னோர்கள் வகுத்து வைத்துள்ள இறைவனை வழிபடும் ஒன்பது வழிபாட்டு முறைகள்..

1கேட்டல் 

இந்த வழிபாட்டு முறையில் 
இறைவனைப் பற்றி பலவற்றையும் அறிந்தவர்கள் 
சொல்வதைக் கேட்டாலே போதும். கேட்பது என்பது எளிது, ஆனால் ஒருவர் சொல்வதை பொறுமையாக, தெளிவாக கேட்டு அறிந்து கொள்வதற்கு மனம் ஒத்துழைக்க வேண்டும். முக்கியமாக அறிந்தவர்கள் சொல்லும் நல்லதைக் கேட்க முயற்சிக்க வேண்டும். அதனால் தான் வழிபாட்டு முறைகளில், ‘கேட்டல்’ முதலிடம் பெறுகிறது.

2.பாடுதல் - சத்சங்கம் & பஜன்ஸ் பாடி இறைவனை வழிபடுதல்.

 ‘இறைவனை பாடி வணங்கும் சக்தி மிக்க வழிபாட்டு முறை இசையால் இறைவனை ஈர்த்து, அவன் திருவடிகளை அடைந்தோர் அநேகம் பேர். இறைவன் பக்தியோடு இணைந்த பாடலுக்கு எப்போதும் வசப்படுவார்.
பாடலின் வாயிலாக நாமும் பாடி 
இறையருள் பெறலாம்.

 3.நினைத்தல்

இறைவனை மனதால் ‘நினைத்து, இறை சிந்தனையுடன் வழிபடுதல். மனது 
 பல சிரமங்களுக்கு பின் தான் பக்குவப்படும். பக்குவப்பட்ட மனதோடு சில வினாடிகள் இறைவனை நினைப்பது நிச்சயமாக மேலான ஒரு வழிபாட்டு முறை என்பதில் எந்த சந்தேகமும் இல்லை.

4திருவடிதொழல்

இன்ப துன்பங்கள் நிறைந்த இந்த வாழ்க்கைக் கடலில், நம்மை மூழ்க விடாமல் காப்பது இறைவனின் திருவடித்தொழுதல் மட்டும் தான். ஆதலால் திருவடிதொழல் என்னும் வழிபாட்டு முறை முக்கியத்துவம் பெறுகிறது. எந்த நிலையில் எப்படிப்பட்ட துன்பங்கள் வந்தபோதிலும் இறைவனையே தொழுது பேறு பெற்ற நாயன்மார்களே இதற்குச் சான்று.
நாமும் திருவடி தொழுவோம்.

5பூஜித்தல்

 இறைவனை பூஜை நைவேத்தியம் செய்து வழிபடும் முறை. இப்படித்தான் இறைவனை பூஜித்து வழிபட வேண்டும் என்று ஆகம விதி.
ஆனால் எப்படி பூஜித்தாலும் அந்த வழிபாட்டில் பக்தியும், அன்பும் இருந்தால் இறைவன் மனமுவந்து அதை ஏற்றுக் கொள்வார் என்பது ஆன்மிக வாதிகள் சொல்லும் உண்மை.

6வணங்குதல்

இது ஓர் அற்புதமான வழிபாட்டு முறை. ‘வணங்குதல்’ என்ற வழிபாட்டு முறைக்கு ‘தலைவணங்குதல்’ என்று பொருள். 

சிரம்தாழ்ந்து  வணங்குதலின் உண்மை என்ன என்றால்,‘நான்’ என்ற அகந்தையை ஒழித்து, ‘எல்லாம் நீயே என்று பணிவுடன் இறைவனை தலைவணங்கும் முறை இது. 

7தொண்டு (சேவை)

 இறைவனுக்கும், இறைவன் சம்பந்தப்பட்ட விஷயங்களுக்கும் இயலாதவர்களுக்கும் சேவை செய்வது அதன் மூலமாக இறைவனை வழிபடும் முறை. இறைவனை அடைய இது ஓர் உயர்வான வழி.

8சிநேகம் 

அன்பால் இறைவனை வழிபடும் முறை.  

இறைவனை சிநேகத்துடனும், அன்பாகவும் பார்க்க முடிவது ஆன்மிகத்தின் தனிச்சிறப்பு. அன்பும், காதலும் இறைவன் மீது ஏற்படுவது ஒரு வித வழிபாடாகவே ஆன்மீகத்தில் கருதப்படுகிறது. மீரா, ராதை போன்றவர்கள் இதற்கு சாட்சி.

9ஒப்படைத்தல் - (சரணாகதி அடைதல்)

கடைசி வழிபாட்டு முறை இது. என்னிடம் ஒன்றும் இல்லை எல்லாம் நீயே என்று உடல், பொருள், ஆவி அனைத்தையும் இறைவனுக்கே அர்ப்பணம் செய்வது.இது மகான்களால் மட்டுமே இந்த உயர்வுநிலை.

    ........ நிறைவு ........