சகிப்புத் தன்மையே இந்தியாவின் பலம்: ஆர்எஸ்எஸ் நிகழ்ச்சியில் பிரணாப் பேச்சு

**ayyasamy ram** · **ayyasamy ram** Fri Jun 08, 2018 9:48 am

-

சகிப்புத் தன்மையே இந்தியாவின் பலம் என்று முன்னாள்
குடியரசுத் தலைவர் பிரணாப் முகர்ஜி தெரிவித்தார்.
மதம், சகிப்பின்மை ஆகியவைகள் மூலமாக இந்தியாவை
வரையறுக்க (அடையாளப்படுத்த) எத்தகைய முயற்சிகள் ந
டைபெற்றாலும், அது நாட்டை நீர்த்து போகச் செய்துவிடும்
என்றும் அவர் எச்சரித்தார்.

மகாராஷ்டிர மாநிலம், நாகபுரியில் உள்ள ஆர்எஸ்எஸ்
தலைமையகத்தில் வியாழக்கிழமை நடைபெற்ற
ஆர்எஸ்எஸ் தொண்டர்களின் பயிற்சி முகாம் நிறைவு
நிகழ்ச்சியில் கலந்து கொண்டு பேசியபோது, இதை அவர்
தெரிவித்தார். இதுகுறித்து அவர் மேலும் கூறியதாவது:

சகிப்புத்தன்மையே நமது நாட்டின் பலமாகும். நமது நாட்டின்
பன்முகத்தன்மைக்கு மதிப்பு கொடுக்க வேண்டும்.
வேற்றுமையில் நிலவும் ஒற்றுமையை கொண்டாட வேண்டும்.

பிரபஞ்சவாதம், அனைத்தையும் ஏற்றுக் கொள்ளுதல்,
அனைவருடனும் இணக்கம் காட்டுதல் ஆகியவைகளில்
இருந்தே நமது தேசியவாதம் உருவாகியுள்ளது. எனவே,
சகிப்பின்மையானது நமது நாட்டின் அடையாளத்தையும்,
இந்திய தேசியவாதத்தையும் நீர்த்து போகச் செய்துவிடும்.

பாரத் எனப்படும் நமது நாட்டின் மீதான தேசியவாதம், தேசம்,
தேசப்பக்தி குறித்த எனது புரிதலை வெளிப்படுத்தவே, இந்த
நிகழ்ச்சியில் கலந்து கொண்டுள்ளேன். பொருளாதார வளர்ச்சி
தொடர்பான புள்ளிவிவரங்கள், நமது நாடு சிறப்பாக செயல்
பட்டிருப்பதாக தெரிவிக்கிறது.

அதேநேரத்தில், மகிழ்ச்சி தொடர்பான புள்ளிவிவரங்களில்
இந்தியா பின்தங்கியுள்ளது. அந்த பட்டியலில் இந்தியா 133ஆவது
இடத்தில் உள்ளது. கௌடில்யர் தனது அறிவுரையில், மக்களின்
மகிழ்ச்சியே ஆட்சியாளரின் மகிழ்ச்சி, மக்கள் நலனே,
ஆட்சியாளரது நலன் எனத் தெரிவித்துள்ளார்.
-
------------------------

**ayyasamy ram** · **ayyasamy ram** Fri Jun 08, 2018 9:48 am

மதச்சார்பின்மையும், அனைவரையும் உள்ளடக்கும் பண்பும்,
இந்தியர்களின் நம்பிக்கை தொடர்பான விவகாரங்கள் ஆகும்.

நமது இந்த ஒருங்கிணைந்த கலாசாரம்தான், அனைவரையும்
ஒரே நாட்டினராக இணைத்துள்ளது. இந்திய தேசமானது ஒரு
மொழி, ஒரு மதம், ஒரு எதிரி ஆகியவைகளைக் கொண்டது
கிடையாது.

நாட்டில் உள்ள 130 கோடி மக்கள், 122 மொழிகளைப்
பேசுகின்றனர். இதுதவிர, 1,600 பேச்சு வழக்கு மொழிகளும்
உள்ளன. 7 முக்கிய மதங்கள் பின்பற்றப்படுகின்றன.
ஆனால், ஒரே ஆட்சி நிர்வாகத்தின்கீழும், கொடியின்கீழும்,
பாரதிய அடையாளத்தின் கீழும், யாரையும் எதிரியாக
கருதாமலும் மக்கள் வாழ்கின்றனர்.

ஒவ்வொரு நாளும், நம்மைச் சுற்றி வன்முறை நடப்பதைக்
காண்கிறோம். இந்த வன்முறையின் பின்னால், இருளும்,
அச்சமும், நம்பிக்கையின்மையும் உள்ளன. எனவே, அனைத்து
வகையிலான அச்சம், வன்முறைகள் ஆகியவற்றிலிருந்து
விடுபட்டு, சுதந்திரமாக நமது எண்ணங்களை வெளிப்படுத்த
வேண்டும்.

நமது நாட்டில் எங்கேனும் பெண்ணோ, சிறுமியோ பாலியல்
வன்கொடுமைக்கு ஆளாக்கப்படும்போது, நாடே
காயப்படுகிறது. வன்முறையில்லாத சமூகத்தால் மட்டுமே,
ஜனநாயக வளர்ச்சிக்கான நடவடிக்கையில், அனைத்து தரப்பு
மக்களின் பங்களிப்பையும் உறுதிப்படுத்த முடியும்.

குறிப்பாக, நலிவடைந்த, ஒடுக்கப்பட்ட மக்களின்
பங்களிப்பை உறுதி செய்ய முடியும் என்றார்
பிரணாப் முகர்ஜி.

மறைந்த பிரதமர் ஜவாஹர்லால் நேரு, ரவீந்திரநாத் தாகூர்,
பாலகங்காதர திலகர், சர்தார் வல்லபபாய் படேல்
ஆகியோரின் கருத்துகளையும் பிரணாப் முகர்ஜி தனது
உரையில் சுட்டிக்காட்டினார். ஜவாஹர்லால் நேரு எழுதிய
'டிஸ்வகரி ஆப் இந்தியா' புத்தகத்தில், இந்தியாவுக்கு
பன்முகத்தன்மை மிகவும் அவசியம் என குறிப்பிடப்
பட்டிருப்பதையும் பிரணாப் நினைவுகூர்ந்தார்.

விவாதத்தில் அர்த்தமில்லை- ஆர்எஸ்எஸ் தலைவர்:

பிரணாப் முகர்ஜி பேசுவதற்கு முன்பு ஆர்எஸ்எஸ்
தலைவர் மோகன் பாகவத் பேசினார். அப்போது அவர்
கூறியதாவது:

ஆர்எஸ்எஸ் நிகழ்ச்சியில் பிரணாப் கலந்து கொண்டது
குறித்து விவாதங்கள் நடத்தப்படுவதில் எந்த அர்த்தமுமில்லை.
இந்நிகழ்ச்சியில் கலந்து கொண்டதால், பிரணாப் மாறி
விடமாட்டார். அவர் அப்படியேதான் இருப்பார்.

அதேபோல், ஆர்எஸ்எஸ் அமைப்பும் அப்படியேதான்
இருக்கும்.
நமது சமூகத்தை ஒன்றிணைக்க வேண்டும் என்பதே
ஆர்எஸ்எஸ் அமைப்பின் விருப்பமாகும். நாட்டு மக்கள்
யாரையும் வெளிநபர்களாக ஆர்எஸ்எஸ் கருதவில்லை.

மக்கள் ஒவ்வொருவருக்கும் தனிப்பட்ட கருத்துகள் இருக்கும்.
ஆனால் அவர்கள் அனைவரும் இந்திய தாயின்
பிள்ளைகள்தான். ஆண்டுதோறும் ஆர்எஸ்எஸ் நிகழ்ச்சிக்கு
மூத்த தலைவர்கள் அழைக்கப்படுவது வழக்கம்.

அதன்படியே, பிரணாப்புக்கு அழைப்பு விடுக்கப்பட்டது
என்றார் மோகன் பாகவத்.

நிகழ்ச்சியில் மறைந்த பிரதமர் லால் பகதூர் சாஸ்திரியின்
மகன் சுனில் சாஸ்திரி, நேதாஜி சுபாஷ் சந்திர போஸின்
மருமகன் அர்தேந்து போஸ், அவரது மனைவி, மகன்
ஆகியோரும் கலந்து கொண்டனர்.
-
------------------------------
தினமணி