வியப்பூட்டும் இந்தியா: வளரும் பாலம்!

ஆற்றைக் கடந்து செல்ல பாலங்களைப் பயன்படுத்தி வருகிறோம். இரும்புக் கம்பிகள், சிமெண்ட், மரப்பலகைகளால் இவை கட்டப்பட்டிருக்கும். ஆனால் வேர்களாலேயே உருவான பாலம் பற்றிக் கேள்விப்பட்டிருக்கிறீர்களா? அதை உயிரிப் பாலம் என்றுகூட சொல்லலாம். ஏனென்றால் அது உயிருடன் இருக்கிறது! வளர்ந்துகொண்டே இருக்கிறது!


வேர்ப் பாலத்தைப் பார்க்க வேண்டும் என்றால் வடகிழக்கு மாநிலங்களில் ஒன்றான மேகாலயாவுக்குச் செல்லவேண்டும். உலகில் அதிக மழை பெய்யும் இடம் என்று முன்னர் சொல்லப்பட்ட சிரபுஞ்சியிலிருந்து 12 கி.மீ. தூரத்தில் இருக்கிறது தைரினா கிராமம். இங்கிருந்து சுமார் 4 மணி நேரம் நடந்தால் இந்த வேர்ப் பாலத்தைப் பார்த்துவிடலாம்! சமதளமான சாலைகள் கிடையாது. அடர்ந்த காட்டுக்கு நடுவே மலைப் பிரதேசத்தில் மேடுகளிலும் பள்ளங்களிலும் ஏறி இறங்கவேண்டும்.

சில இடங்களில் படிக்கட்டுகள் உள்ளன. சில இடங்கள் செங்குத்தாக உள்ளன. இரண்டு இடங்களில் இரும்புக் கம்பிகளால் ஆன தொங்கு பாலங்கள் இருக்கின்றன. கீழே குனிந்து பார்த்தால் பெரிய பெரிய பாறைகளுக்கு நடுவே தண்ணீர் காட்டாற்று வெள்ளமாக ஓடிக்கொண்டிருக்கும். இதையும் கடந்தால் 20 மீட்டர் நீளத்தில் ஓர் ஒற்றை வேர்ப் பாலம் வருகிறது.


சுமார் 3000 படிக்கட்டுகள் ஏறி இறங்கினால் நாங்கிரியாட் என்ற கிராமம் வரும். இங்குதான் இரட்டை அடுக்கு வேர்ப் பாலம் இருக்கிறது. வேறு எங்கும் காண முடியாத இந்த அதிசயம். இந்தியாவுக்குப் பெருமை சேர்க்கும் இடங்களில் ஒன்று. நம் மலைவாழ் மக்களின் அறிவுக்குச் சிறந்த எடுத்துக்காட்டு இது!

இங்கு வசிக்கும் மலையக மக்கள் 'காசி' என்னும் பழங்குடி வகுப்பைச் சேர்ந்தவர்கள். அதிக மழையால் ஆறுகளும், நீர்வீழ்ச்சிகளும் ஏராளம் உண்டு. அவற்றைக் கடந்து ஷில்லாங், சிரபுஞ்சி போன்ற இடங்களுக்குப் பொருட்களை விற்க, வாங்க சிரமமாக இருந்திருக்கிறது. அந்தத் தேவையின் அடிப்படையில் உண்டானவைதான் வேர்ப் பாலம்.

அங்குள்ள ரப்பர் மரங்களின் வேர்கள் நீளமாகவும் வலிமையாகவும் இருப்பதை மக்கள் அறிந்திருக்கின்றனர். ஆற்றின் இரு பக்கங்களிலும் அந்த மரங்களை வளர்த்து, அவற்றின் வேர்களைப் பிணைக்கிறார்கள். அங்கு நெடிந்துயர்ந்த பாக்கு மரங்கள் நிறைய உண்டு. அவற்றைப் பிளந்து, நடுவில் இருக்கும் சதைப் பகுதியை எடுத்துவிட்டு, அதை ஆற்றின் குறுக்கே வைத்துவிடுகிறார்கள். ரப்பர் மரத்தின் வேர்களை இந்தப் பாக்கு மரங்களின் தண்டில் வைத்து, அடுத்த பகுதிக்குச் செல்லும் வரை கவனமாக வளர்க்கிறார்கள்.
-

--
இரண்டடி அகலத்துக்கு இந்தப் பாலத்தைக் கட்டுகிறார்கள். 15 வருடங்கள் வளர்த்த பிறகே, இந்தப் பாலத்தைப் பயன்படுத்த ஆரம்பிக்கிறார்கள். நடக்க வசதியாகப் பாலத்தின் நடுவில் தட்டையான கற்களையும் வைத்திருக்கிறார்கள். இரு பக்கங்களிலும் பிடித்துக்கொள்வதற்கு வசதியாக, வேர்களாலேயே கயிறுபோல் அமைத்திருக்கிறார்கள். இந்த வேர்கள் ஆண்டுகள் செல்லச் செல்ல வலிமை பெறுகின்றன. இது போன்ற சில வேர்ப் பாலங்கள் 500 ஆண்டுகளைக் கடந்தும் நல்ல நிலையில் இருக்கின்றன!

தி இந்து