ஆணுக்கும் ஆணுக்கும் கல்யாணம்! மழைக்காக ம.பி.,யில் வினோதம்

போபால், ம.பி., 

கடும் வறட்சியால் வாடும் இந்துாரில், நல்ல மழை பொழிய 
வேண்டி, இளைஞர்கள் இருவர், ஒருவரையொருவர் 
திருமணம் செய்தனர். இதில், வழக்கமான திருமணத்தின் 
போது நடக்கும் அனைத்து நிகழ்ச்சிகளும் இடம் பெற்றன.

ம.பி.,யில், பா.ஜ.,வைச் சேர்ந்த, முதல்வர், சிவ்ராஜ் சிங் சவுகான் 
தலைமையிலான ஆட்சி நடக்கிறது. மாநிலத்தின் பல 
மாவட்டங்களிலும், இந்த ஆண்டு, சராசரி மழைப்பொழிவை விட, 
மிகக் குறைவாகவே மழை பெய்ததால், கடும் வறட்சி நிலவுகிறது. 

விவசாயம் கடுமையாக பாதிக்கப்பட்டுள்ளதால், உணவுப் 
பொருள் தட்டுப்பாட்டால், பொதுமக்களும் அவதிப்படுகின்றனர்.

இந்நிலையில், மாநிலத்தில் நல்ல மழை பெய்ய வேண்டி, 
இந்துாரைச் சேர்ந்த இளைஞர்கள் இருவர், குதிரையில் 
ஊர்வலம் சென்று, ஒருவருக்கொருவர் தாலி கட்டி, அக்னி 
குண்டம் சுற்றி, திருமணம் செய்தனர். 

இளைஞர்களின் இந்த செயலால், விரைவில் மழை பெய்யும் 
என்ற நம்பிக்கையால், அப்பகுதி மக்கள் மகிழ்ச்சி 
அடைந்துள்ளனர்.

இது குறித்து, இந்த திருமணத்திற்கு ஏற்பாடு செய்த, 
ரமேஷ் சிங் தோமர் கூறியதாவது: 

மாநிலத்தில் மழைப் பொழிவு குறைந்ததால், மக்கள் கடுமையாக 
பாதிக்கப்பட்டுள்ளனர். ஆண்கள் இருவர், ஒருவருக்கொருவர் 
தாலி கட்டி திருணம் செய்வதால், மழைப் பொழிவு அதிகரிக்கும்
 என, மக்கள் நம்புகின்றனர்.

மக்கள் நலன் கருதி, சகாராம் மற்றும் ராகேஷ், ஒருவரையொருவர் 
திருமணம் செய்ய சம்மதித்தனர். வழக்கமான, 
ஆண் - பெண் திருணத்தின் போது நடக்கும் அனைத்து சடங்குகளும், 
இந்த திருமணத்திலும் நடத்தி வைக்கப்பட்டன. 
திருமண கலாசார உடைஅணிந்து, இளைஞர்கள் இருவரும், 
குதிரையில் ஊர்வலமாக வந்து, ஒருவருக்கொருவர் தாலி கட்டி 
திருமணம் செய்தனர்.

இதனால், விரைவில் மழைப் பொழிவு அதிகரித்து, விவசாயம் 
செழிக்கும்; மக்களின் துயரம் துடைக்கப்படும் என, நம்புகிறோம்.
இவ்வாறு அவர் கூறினார்.
-
-------------------------------
தினமலர்