கொசுவை விரட்டும் டி.வி.!

-

உலகம் எங்கும் மக்களை பயமுறுத்திக் கொண்டிருப்பவை,
மலேரியா, ஜிகா வைரஸ், டெங்கு காய்ச்சல். அவற்றைப்
பரப்பும் கொசுக்கள்.

கொசுவை விரட்ட இலை,தழைகளைக் கொளுத்துவது
போன்ற நம் முன்னோர்கள் வழிமுறைகளிலிருந்து மாறுபட்டு,
கொசுவை விரட்ட ஏகப்பட்ட கொசு விரட்டிகள் வந்தாயிற்று.

அதிலும், புகையும் கொசுவிரட்டிகள், புகை வராத திரவ கொசு
விரட்டிகள் என நிறைய வகைகள்.

கொசு விரட்டிகளைப் பயன்படுத்த முடியாத இடங்களில்
உடலில் கொசு விரட்டி மருந்துகளைத் தடவிக் கொண்டு
நம்மை மட்டும் கொசுவிலிருந்து காப்பாற்றிக் கொள்ளலாம்.
(அது தோலில் ஏற்படுத்தும் நோய்கள் வேறு கதை) மாநகராட்சி,
நகராட்சி, ஊராட்சி என எல்லா எல்லா நிர்வாகங்களும்
கொசுவை ஒழிக்க கொசு மருந்தை நீர்நிலைகளில்
(சாக்கடையில்) தெளிப்பது, கொசுவை விரட்ட அந்தப் பகுதிகள்
முழுக்க புகைவீச்சு நடத்துவது என பல வழிகளில் முயன்றாலும்,
மறுநாளே அவற்றையெல்லாம் மீறி கொசு காதருகே ரீங்கரிக்கும்.

கொசுவைப் போல எல்லா இடங்களிலும் நீக்கமற
நிறைந்திருப்பவை தொலைக்காட்சிப் பெட்டிகள். இப்போது
தொலைக்காட்சிப் பெட்டிகளில் கொசுவை விரட்டும்
ஏற்பாட்டைச் செய்திருக்கிறது எல்ஜி நிறுவனம்.

அது தயாரித்திருக்கும் தொலைக்காட்சிப் பெட்டியில் இருந்து
அல்ட்ரா சோனிக் ஒலி அலைகள் வருகின்றன. இந்த அலைகள்
மனிதர்களின் காதுகளுக்குக் கேட்காது. கொசுக்களோ
இந்த அல்ட்ரா சோனிக் ஒலியலைகளைக் கேட்டு தப்பித்தோம்,
பிழைத்தோம் என்று ஓடிவிடும்.

இந்த தொழில்நுட்பத்தால் என்ன பயன்? என்றால், பிற கொசு
விரட்டிகளில் வருவதைப் போல இதில் இருந்து எந்த வாசனையும்
வருவதில்லை. அதனால் அதைச் சுவாசிப்பதால் வரக் கூடிய
நோய்கள் மனிதர்களுக்கு வர வாய்ப்பில்லை.

அதுபோல எந்தவிதமான வேதிப் பொருட்களும் இந்த டிவி
கொசுவிரட்டியில் இல்லை.

கொசுவால் வரக் கூடிய நோய்களுக்குப் பயந்து கொசு
விரட்டியைப் பயன்படுத்தி, ஆஸ்துமா, நுரையீரல் பாதிப்பு,
மயக்கமடைதல் போன்ற பல பாதிப்புகளுக்கு உள்ளாகாமல்
தப்பிக்க இந்த தொலைக்காட்சிப் பெட்டி கொசுவிரட்டி பயன்
படும் என்பது உண்மை.
-
-------------------------------------------
- நிலா
இளைஞர்மணி