சரியான போட்டி வேண்டும்! - ஒம்பிக்ஸ் செல்லும் டூட்டி சந்த்

-

டூட்டி சந்த் - ஓட்டப்பந்தய வீராங்கனை.

டூட்டி ஒரு சாதாரண குடும்பத்தைச் சேர்ந்தவர்.
டூட்டியின் சொந்த மாநிலம் , ஒடிஸா.

2014 காமன்வெல்த் விளையாட்டுப் போட்டிகளில், டூட்டி கடைசி
நிமிடத்தில் விலக்கப்பட்டார். இம்முறை இந்திய விளையாட்டு
சம்மேளனம் டூட்டியின் உடலில் அளவுக்கு அதிகமாக ஆண்டிரோஜன்
ஹார்மோன் இருப்பதாகக் காரணம் காட்டி டூட்டியை போட்டிகளில்
பங்கேற்க தடை விதித்தது.

அனைவரும் டூட்டி தவறு செய்து விட்டதாகப் பார்த்தார்கள்.
யாரும் டூட்டிக்கு ஆதரவாகக் குரல் கொடுக்கவில்லை. விளையாட்டு
விதிகளில் விசித்திர ஷரத்துகளை விலக்கிக் கொள்ள யாரும்
வேண்டுகோள் வைக்கவில்லை.
-
வேறு வழியின்றி, இந்தத் தடை தொடர்பாக டூட்டி வழக்கு தொடர்ந்தார்.
வழக்கில் முடிவு வர தாமதம் ஆனது. அதனால் டூட்டி சும்மா இருக்க
வேண்டிய கட்டாயம். வழக்கில், டெஸ்டோஸ்டிரோன் அல்லது ஹைப்பர்
ஆண்டிரோஜன் ஹார்மோன் அளவைக் கண்டுபிடிக்கும் சோதனையை
தற்காலிகமாக ரத்து செய்து தீர்ப்பு வழங்கப்பட்டது .
-
இந்த சாதகத் தீர்ப்பால், டூட்டி மீது சுமத்தப்பட்ட ஓட்டத் தடை விலகியது.
டூட்டியை மீண்டும் சுறுசுறுப்பு தொத்திக் கொண்டது. கடுமையான
பயிற்சியில் தன்னை ஈடுபடுத்திக் கொண்டு, வெற்றிக் கதையை மீண்டும்
எழுத ஆரம்பித்தார் .
-
டூட்டி சந்த், தைவான் தடகள போட்டியில் 100 மீட்டர் மற்றும் 200 மீட்டர்
ஓட்டத்தில் முதலாவதாக வந்ததினால் தங்கப் பதக்கம் கிடைத்தது .
சென்ற ஏப்ரல் மாதம் டெல்லியில் நடைபெற்ற பெடரேசன் கோப்பை
தேசிய தடகள போட்டியில் 100 மீட்டர் ஓட்டத்தில் பந்தய தூரத்தை
11.33 விநாடிகளில் மட்டுமே டூட்டியால் கடக்க முடிந்தது.
-
இதனால், ஒலிம்பிக்ஸ் ஓட்டப் போட்டிகளில் பங்குபெறும் வாய்ப்பை
மயிரிழையில் நழுவ விட்டார்.
-
2016 ஜுன் 25 அன்று, கஜகஸ்தானில் அல்மாட்டி நகரில் ஒலிம்பிக் தடகள
போட்டிக்கான தகுதி சுற்றுக்கான தேர்வுப் போட்டிகள் நடைபெற்றன.
இதில் மகளிருக்கான 100 மீட்டர் ஓட்டத்தில் இந்திய தரப்பில் டூட்டி சந்த்
கலந்து கொண்டார்.
-
பந்தய தூரத்தை 11.32 விநாடிகளில் கடந்தால் மட்டுமே ஒலிம்பிக்ஸில்
டூட்டி பங்கேற்க தகுதி பெறுவார். இந்திய பார்வையாளர்கள் என்ன ஆகுமோ...
என்று கையைப் பிசைந்து கொண்டிருந்த வேளையில், புயலாய் ஓடி
டூட்டி 11.30 விநாடிகளில் பந்தய தூரத்தை கடந்து அசத்தினார்.
-
இந்த சாதனை காரணமாக டூட்டி ஒலிம்பிக்ஸ் 100 மீட்டர் ஓட்டத்தில்
பங்கேற்கும் தகுதியைப் பெற்றிருக்கிறார்.
ஒலிம்பிக்ஸ்ஸிற்கு தேர்வானதைப் பற்றி டூட்டி என்ன சொல்கிறார்:
-
""இறுதி ஓட்டத்தில் முழு வேகத்துடன் ஓடு... உன் இலக்கை அடைவாய்
என்று உற்சாகப்படுத்தினார் என் கோச். இறுதி போட்டியில் மூச்சைப்
பிடித்துக் கொண்டு ஓடி, அதே நூறு மீட்டர் தூரத்தை 11.24 நொடிகளில்
கடந்து தங்கப் பதக்கம் பெற்றேன்.

இது தேசிய சாதனை. கனவில் கண்டதைக் காட்டிலும் குறைந்த கால
அளவில் ஓட முடிந்தது.
ஏப்ரல் மாதம் நடைபெற்ற பெடரேசன் கோப்பை தேசிய தடகள
போட்டியில் 100 மீட்டர் ஓட்டத்தில் பந்தய தூரத்தை என்னால் 11.33
விநாடிகளில் மட்டுமே கடக்க முடிந்தது. எனக்கு சரியான போட்டி
இருந்தால்தான் மிக நன்றாக வேகமாக என்னால் ஓட முடியும்..

எனக்கு சவாலாகப் போட்டியாளர்கள் ஓடவில்லை என்றால் என்னாலும்
என் முழு வேகத்தைக் காட்ட முடியாது. இருந்தாலும் 100 மீட்டர் தூரத்தை
11.33 வினாடிகளில் கடந்து 16 ஆண்டுகாலமாக உடைக்க முடியாத தேசிய
சாதனையை இந்த ஆண்டு உடைத்தேன்.
பயிற்சிக்காக வெளிநாடுகள் செல்ல வேண்டும் என்ற வேண்டுகோள்
நிராகரிக்கப்பட்டதில் எனக்கு வருத்தம் உண்டு. ஆனால் நான் சோர்ந்து
போகவில்லை. சென்ற மாதம் தைவானில் நடந்த போட்டிக்கு ஒரு மணி
நேரத்திற்கு முன்தான் தைவான் சென்றேன்.

போட்டி துவங்குமுன் பயிற்சி செய்யக் கூட நேரம் கிடைக்கவில்லை.
இருந்தாலும், போட்டியில் பங்கு பெற்று தங்கப் பதக்கம் பெற்றேன்.
ஆனால் அல்மாட்டியில் தங்கி பயிற்சி பெற போதுமான சந்தர்ப்பத்தை
இந்திய விளையாட்டு சம்மேளனம் ஏற்படுத்தித் தந்தது. அதுவும் எனது
வெற்றிக்கு காரணம் . எனது அடுத்த லட்சியம் ஒலிம்பிக்கில் இந்தியாவுக்கு
ஒரு பதக்கம் பெற்றுத் தரவேண்டும்'' என்றார்.
-
----------------------------------
- பாரதி கண்ணம்மா
மகளிர்மணி