கொடி ஜோசியம்: கட்சிகளின் இந்த வாரப் பலன்கள்

29.02.2016 - 06.03.2016

இலை

இலைக்கட்சி நேயர்களே.. இந்தவாரம் உங்களுக்கு கதை கேட்கும் வாரம். தலைமை சொல்லும் குட்டி கதைகளை கேட்டு நடந்தால் நன்மை உண்டாகும். சூரியன் உங்களுக்கு நேர் எதிரான இடத்தில் இருப்பதால் சூடு பறக்கும் விளம்பரத்தால் உஷ்ணம் அதிகரிக்கும். ஆனாலும் அசராமல் இருப்பீர்கள்

சூரியன்

சூரியக்கட்சி நேயர்களே.. உயரத்தில் இருந்தாலும் உங்கள் ஒளி மங்கியே காணப்படுகிறது.. அதனால் எடுத்தோம் கவிந்தோம் என்று இல்லாமல் நிதானமாக செயல்படுவது.. உங்களுக்கும் உங்கள் தலைமைக்கும் நற்பெயரை பெற்றுத் தரலாம்.

முரசு

முரசுக் கட்சி நேயர்களே.. சுற்றத்தாரிடம் உங்களுக்கு வரவேற்பு அதிகமாக இருக்கும். போட்டி போட்டுக்கொண்டு உங்களை விருந்து உபச்சாரம் செய்வார்கள். யார் அழைப்பை ஏற்றுக் கொள்வது யார் அழைப்பை புறக்கணிப்பது என்ற குழப்பதிலேயே திரிவீர்கள்.. இருந்தாலும் உங்களுக்கு இருக்கும் மவுசு குறையாது. சரியான முடிவெடுத்தால் எதிர்காலம் ஒளிமயமாக இருக்கும்.

மாம்பழம்

மாம்பழக்கட்சி நேயர்களே.. தோட்டம் தோட்டமாக மாறி கொண்டிருந்த உங்களுக்கு இப்போது சொந்த தோட்டத்திலேயே பழம் பறிக்க எண்ணம் வந்துள்ளது.. உங்கள் முயற்சிக்கு நீங்கள் இன்னும் காத்திருக்க வேண்டியுள்ளது. விடா முயற்சியே வெற்றிக்கனியை தரும் என்ற பழமொழியை நினைவு வைத்துக் கொண்டால் மாம்பழம் கனியும். முதல் முறையாக சொந்த முயற்சியில் களம் காண்பதால் உழைப்பை அதிகப்படுத்திக்கொள்ளவும்.

பம்பரம்

பம்பரக் கட்சி நேயர்களே.. பம்பரம் போல் சுத்தி சுத்தி உழைத்தும் ஆப்பும் ஆக்கரும்தான் அதிகம் வாங்கியிருக்கிறோம். சுத்தி விடும் சாட்டையிடம் இருந்து தப்பித்து தனியாக சுழலமாட்டோமா என்று ஏங்கி தவித்த உங்களுக்கு இப்போது புதிதாக ஒரு களம் அமைந்திருக்கிறது.. தூரத்தில் உங்களுக்கு ஒரு வெளிச்சம் தெரிகிறது. ஆனாலும் கடந்த காலங்களில் ஒரு சாட்டைமட்டுமே உங்களை இயக்கி வந்த நீங்கள் இப்போது உங்களைசுற்றி சாட்டைகள் இருப்பதை மறந்து விடக்கூடாது. இந்த வாரத்தை பொறுத்த வரை முக்கிய புள்ளியின் வருகைக்காக காத்திருப்பீர்கள்.. இன்று வருவார் நாளை வருவார் என்று நீங்கள் எதிர்பார்த்து காத்திருந்த விருந்தாளி.. வராமலே போனாலும் போகலாம்..

கை

கை கட்சி நேயர்களே.. கைவிட்டு போன ஒளிவெளிச்சம் மீண்டும் உங்களை கைநீட்டி அணைத்துக் கொண்டது.. இந்த வாரம் பழைய நட்போடு இணைந்து கொண்ட உங்களுக்குள் சில நெருடல்கள் இருக்கும். காலம் மீண்டும் கனியுமா என்ற அச்சம் இருந்தாலும் வெளியில் காட்டிக்கொள்ளாமல் நானும் ரவுடிதான் என்பது போலவே நடமாடுவீர்கள்.. உட்பூசல்களும் உங்களை சஞ்சலப்படுத்தும்.

சிறுத்தை

சிறுத்தை கட்சி நேயர்களே.. சீறிப்பாய்வதுதான் உங்கள் குணம்.. மாற்றத்துக்கு தோழமையோடு தோள் கொடுத்து நின்றாலும் நீங்கள் பொறுமையை கடைபிடிக்க வேண்டிய காலம் இது. இந்த வாரம் சில முக்கிய முடிவுகளுக்கு உடன் பட வேண்டி இருக்கும். உங்கள் நம்பிக்கை வீண் போகாமல் இருக்க கருத்து முரண் வராமல் பார்த்துக் கொள்ளுங்கள்.

தாமரை

தாமரை கட்சி நேயர்களே.. நீங்கள் விரும்பி சென்று உறவாட நினைப்பவர்கள் கூட தாமரை இலை தண்ணீர் போலவே பட்டும் படாமலும் இருப்பார்கள். இருந்தாலும் இந்த வாரத்தில் நீங்கள் நம்பிக்கையோடும் தைரியத்தோடும் எல்லாவற்றையும் எதிர்கொள்வீர்கள். உங்களுக்கு மத்தியில் வலிமையானவர்கள் இருக்கிறார்கள்.

பிறை

பிறைக்கட்சி நேயர்களே..யாருடனாவது சேர்ந்துதான் நாம் நம் கதையை ஓட்ட வேண்டும் என்று உங்களுக்கு நன்றாக தெரிந்திருக்கும். ஆயினும் யாருடன் சேர்வது.. இருந்த இடத்தில் இருக்கலாம்.. என்ற குழப்பம் வரும்.. சொந்த வீட்டின் பிரச்சனைகள் புதிய அச்சத்தை ஏற்படுத்தும்

அறுவா

அறுவா கட்சி நேயர்களே புதிய பாதையில் நடைபோட்டாலும் தற்போது இணைந்திருக்கும் நண்பர்களால் நன்மை நடந்து விடுமா என்பது சந்தேகம் தான்.. ஆனாலும் உங்களுக்கு உள்ள மதிப்பு மரியாதையும் குறையாது. எதிர்காலத்துக்கான புதிய பாடங்களையும் கற்றுக்கொள்வீர்கள்.. கதிரும் அருவாலும் கையில் இருந்தும் அறுவடை செய்ய முடியாமல் ஏங்கி தவித்த போதும் காலம் கனியும் என்று நம்பிக்கையோடு இருந்த உங்களுக்கு நண்பர்கள் கூட்டால் நல்லது நடக்குமா என எதிர்பார்த்து காத்துள்ளீர்கள்... ஆனாலும் மீண்டும் சோதனை காலம்தான் தெரிகிறது..

சமக

சமக நேயர்களே.. புலியை பார்த்து பூனை சூடு வைத்த கதையாக உங்கள் கதை ஆகிவிட்டது. பலமானவர்களின் அருகில் இருந்த வரை தான் உங்களுக்கு மதிப்பு என்பதை நீங்கள் உணரும் காலம் வரும். இந்த வாரத்தை பொறுத்த வரை உங்களுக்கு பெரிய பெரிய கனவுகளும் லட்சியங்களும் உருவாகும்.

தமாகா

மொழிக் கட்சி நேயர்களே...பழைய சைக்கிளை வாங்கும் எண்ணம் மேலோங்கும். ’கை’ விட்டுப்போன நினைவுகளைக் கொண்டு புதிய திட்டங்களை தீட்டுவீர்கள்.. நீங்கள் சேரும் இடத்தால் அவர்களுக்கு நன்மை இருக்கிறதோ இல்லையோ உங்களுக்கு நன்மை ஏற்படும். இருந்தாலும் ஒரு தெளிவுக்கு வர இன்னும் சில காலம் ஆகும்

பொடி ஜோதிடர்
தினமணி