வாக்களிக்க பணம்: கேஜரிவால் பேச்சால் சர்ச்சை

-

"பாஜக, காங்கிரஸ் ஆகிய கட்சிகளைச் சேர்ந்தவர்கள் வாக்களிக்க பணம் கொடுக்க வந்தால் அதை மறுக்காமல், ஏற்றுக் கொள்ளுங்கள். ஆனால், எங்கள் கட்சிக்கு வாக்களியுங்கள்' என்று ஆம் ஆத்மி கட்சியின் தேசிய அமைப்பாளர் அரவிந்த் கேஜரிவால் தேர்தல் பிரசாரத்தில் பேசியது சர்ச்சையை ஏற்படுத்தியுள்ளது.

தில்லி சட்டப்பேரவைத் தேர்தல் அடுத்த மாதம் 7ஆம் தேதி நடைபெற உள்ளது. இத்தேர்தலில் தில்லியின் உத்தம்நகர் தொகுதியில் ஆம் ஆத்மி கட்சி சார்பில் நரேஷ் பலியான் போட்டியிடுகிறார். அவரை ஆதரித்து அக்கட்சியின் தேசிய அமைப்பாளர் அரவிந்த் கேஜரிவால், நவாடா பகுதியில் ஞாயிற்றுக்கிழமை பேசியதாவது:

இது தேர்தல் நேரம். பாஜக, காங்கிரஸ் ஆகிய கட்சிகளைச் சேர்ந்தவர்கள் பணம் கொடுக்க வந்தால், அதை மறுக்காமல், ஏற்றுக் கொள்ளுங்கள். சிலர் 2ஜி முறைகேட்டிலும், சிலர் நிலக்கரிச் சுரங்க முறைகேட்டிலும் பணத்தைக் கொள்ளையடித்துள்ளனர்.

எந்தக் கட்சியாவது பணத்தைக் கொண்டுவரா விட்டால் நீங்களே அக்கட்சியின் அலுவலகத்துக்குச் சென்று பணத்தை வாங்கிக் கொள்ளுங்கள்.

"நாங்கள் பணத்துக்காகக் காத்திருந்தோம்; ஆனால் நீங்கள் வரவில்லை. அதனால் நாங்களே வந்துவிட்டோம்' என்று கூறுங்கள். பாஜக, காங்கிரஸ் ஆகிய இரு கட்சிகளிடம் இருந்தும் பணத்தைப் பெற்றுக் கொண்டு, எங்கள் கட்சிக்கு வாக்களியுங்கள். இம்முறை நாம் அவர்களை ஏமாற்றுவோம். அவர்கள் நம்மை கடந்த 65 ஆண்டுகளாக ஏமாற்றி வந்துள்ளனர். இது நமக்கான நேரம் என்றார் கேஜரிவால்.

பாஜக கண்டனம்: அவரது இந்தக் கருத்து சர்ச்சையை ஏற்படுத்தியுள்ளது. இது குறித்து பாஜக எம்.பி. மீனாட்சி லேகி கூறியதாவது:

கேஜரிவாலின் கருத்துகள், தேர்தல் ஆணையத்தால் விசாரிக்கத் தக்கவை என்பதோடு வாக்காளர்கள் மீது அவதூறு பரப்பும் நோக்கிலானவை ஆகும்.

வாக்காளர்கள் பணத்தையும், சாராயத்தையும் ஏற்றுக் கொள்வதாக அவர் கூறுகிறார்.

பணமும், சாராயமும் விநியோகிக்கப்படுகின்றன என்று கூறுவதன் மூலம் தேர்தல் ஆணையம் உரிய வகையில் செயல்படவில்லை என்று பொருள் கொள்ள வைக்கிறது என்றார் அவர்.

"மன்னிப்பு கேட்க வேண்டும்': தனது கருத்துக்காக கேஜரிவால் மன்னிப்புக் கேட்க வேண்டும் என்று காங்கிரஸ் கோரியுள்ளது.
===========
Dinamani