ஜெ., ஜாமின் வழக்கில் ஆஜராவேன் : சுப்பிரமணியன் சாமி அறிவிப்பு !

''உச்ச நீதிமன்றத்தில் ஜெயலலிதாவின் ஜாமின் மனு விசாரணைக்கு வரும்போது, அதில் ஆஜராவது குறித்து யோசித்து வருகிறேன்,'' என, பா.ஜ., மூத்த தலைவர் சுப்பிரமணியன் சாமி கூறினார்.

இது குறித்து, அவர் கூறியதாவது: சொத்துக் குவிப்பு வழக்கில் சட்டப்படி தண்டிக்கப்பட்டு, பெங்களூரு சிறையில் இருக்கிறார் ஜெயலலிதா. அவரை எந்தவித சட்ட நடைமுறைகளும் இல்லாமல், பலர் ஜெயிலில் இருந்து வெளியே கொண்டு வந்து விடவேண்டும் என துடிக்கின்றனர். அது நடக்காது என்பதை ஆரம்பத்தில் இருந்தே நான் சொல்லி வருகிறேன். இருந்தாலும், பாவம் ரொம்பவே முயற்சிக்கின்றனர்.ஜெயலலிதாவின் சட்ட ரீதியான முயற்சிகளுக்கு, நான் ஒரு போதும் குறுக்கே நிற்க மாட்டேன். முதலில் நீதிமன்றத்தையும், சட்டத்தையும், நீதிபதிகளையும் அவர்கள் மதிக்க கற்றுக்கொள்ள வேண்டும்.

இல்லையென்றால், அவர்கள் எத்தகைய சக்தி படைத்தவர்கள் என்பது குறித்து, அவர்களுக்கு பாடம் புகட்ட வேண்டியது தான். சட்டப்படி அவர் தண்டிக்கப்பட்டதும், அதை ஏற்காமல், தமிழகம் முழுவதும் வழக்குக்கு அடிப்படை காரணகர்த்தாவான என்னையும், வழக்கை முறையாக விசாரித்து தீர்ப்பளித்த நீதிபதி குன்ஹாவையும் கொச்சையாகவும், அருவருக்கத்தக்க வகையிலும் அ.தி.மு.க.,வினர் விமர்சித்திருக்கின்றனர். போஸ்டர்கள், பேனர்கள் மூலமாக கொச்சைப்படுத்தும் வாசகங்கள், படங்களை எழுதி வைத்திருக்கின்றனர். இது தொடர்பாக, நீதிமன்ற அவமதிப்பு வழக்கு தொடுப்பது குறித்து, விவரங்களை திரட்டி வருகிறேன்.

அதற்கு முன்பாக, ஜெயலலிதாவின் ஜாமின் மனு உச்ச நீதிமன்றத்தில் வரும்போது, அந்த வழக்கில், புகார்தாரர் என்ற வகையில் ஆஜராகி, ஜாமின் வழங்குவதற்கு தடையேற்படுத்துவது குறித்து யோசித்து வருகிறேன். இனியும் அ.தி.மு.க.,வினர், எதிர்மறையான போக்கில் இருந்து, தங்களை, திருத்திக் கொள்ளாவிட்டால், ஜாமின் வழக்கில் நான் ஆஜராவேன்.

அதனால், ஜெயலலிதாவுக்கு கடுமையான சிக்கல் ஏற்படும்.அதேபோல, இந்த வழக்கில் அரசு தரப்பு வழக்கறிஞராக நியமிக்கப்பட்டிருக்கும் பவானி சிங் மீதும் பல்வேறு விதமான குற்றச்சாட்டுக்கள் கூறப்படுகிறது. அவருடைய நடத்தையிலும் மாறுதல்கள் இருப்பதால், அதை உன்னிப்பாக கவனித்து வருகிறேன். அவருடைய செயல்பாடுகள் இனியும் சரியில்லை என்றால், அதில் சட்டரீதியில் என்ன நடவடிக்கை எடுக்க முடியுமோ, அதை செய்வேன். என்னைப் பொறுத்த வரையில் ஊழல் செய்தவர்கள் அவ்வளவு எளிதாக, சட்டத்தின் சந்து பொந்துகளில் புகுந்து தப்பி விடக்கூடாது.

இவ்வாறு, அவர் கூறினார். சுப்ரீம் கோர்ட்டில் சாமி மனு: தமிழக மீனவர்களை, இலங்கை அதிபர் ராஜபக் ஷே விடுதலை செய்தது தொடர்பாக, சுப்பிரமணியன் சாமி, பிரதமர் மோடிக்கு எழுதிய கடிதம் தொடர்பாகவும், தமிழக முன்னாள் முதல்வர் ஜெயலலிதாவுக்கு எதிராக, 'டுவிட்டர்' மூலம் கருத்து தெரிவித்தது தொடர்பாகவும், சாமிக்கு எதிராக ஐந்து அவதூறு வழக்குகள் பதிவு செய்யப்பட்டன. இந்த வழக்குகள் அனைத்தையும் தள்ளுபடி செய்ய வேண்டும் எனச் சொல்லி, சாமி, நேற்று, உச்ச நீதிமன்றத்தில் மனு தாக்கல் செய்துள்ளார். அந்த மனு, விரைவில் விசாரணைக்கு வரும் என தெரிகிறது.

நமது நிருபர் : தினமலர்