திருக்குறள் சினிமா..!

புரட்சிக் கவிஞர் பாரதிதாசனை தம்முடைய உயிராகப் போற்றியவர் கவிஞர் நாரா.நாச்சியப்பன். "பொன்னி' இதழில் "பாரதிதாசன் பரம்பரை' வெளிவர முதலில் காரணமாக இருந்தவர் நாரா. நாச்சியப்பன்தான் என்று கூறப்படுகிறது. 10.6.49-இல் குழந்தைகளுக்காக "முத்து' என்கிற பத்திரிகை நாரா. நாச்சியப்பன் ஒன்றை அரையணா விலையில் தொடங்கியுள்ளார். அதுமட்டுமல்ல, "முத்து'வில் பாரதிதாசனை எழுதவைக்க வேண்டும் என்று பெருவிருப்பம் கொண்டிருந்தாராம். புரட்சிக் கவிஞர் பாரதிதாசன் இயக்கத்தில் (டைரக்ஷன்) "திருக்குறள் சினிமா' என்கிற தொடர் அதன் இரண்டு இதழ்களில் மட்டுமே வெளிவந்துள்ளது. அதில் ஒன்றை மட்டும் காண்போம் (படத்தில் உள்ளபடி).

தீவினை - ஸ்டன்ட் சீன் - ஒன்று

தீவினை செய்த இரண்டு பேரை வாரண்டுடன் தொடர்கின்றான் கான்ஸ்டேபிள். ""ஐயையோ! எங்கே போனாலும் வந்து விடுகிறதே இந்த வாரண்டு'' என்று ஓடுகிறார்கள் இருவரும்.

சீன் - இரண்டு

ஒருவன் தன் காலடியைப் பார்க்கிறான். தன் நிழல் காணப்படுகிறது. ""ஐயையோ! எங்கே போனாலும் இந்த நிழல் என் அடியையே தொடர்கிறதே'' என்று ஓடுகிறான் அவன்.

சீன் - மூன்று

திருவள்ளுவர் அமர்ந்திருக்கிறார். அவருக்கு வலப்புறம் தீயவை செய்தார் இருவரும், ""எங்கே போனாலும் வாரண்டு; என்ன செய்வதுங்க?'' என்கிறார்கள்.

வள்ளுவர் கூறுகிறார்: ""கெட்ட காரியம் செய்யாதீர்கள்! அதனால் ஏற்பட்ட கெடுதல் (வாரண்டு) உம்மைத் தொடர்கிறது. அது எதுபோல என்றால், இதோ இந்த ஆளின் அடியை நீங்காமல் நிழல் தொடர்வது போல!''

""தீவினை செய்தார் கெடுதல் நிழல்தன்னை
வியாது அடிஉறைந் தற்று'' (குறள்-208)

தீவினை - கெட்டகாரியம்; வியாது - நீங்காமல்

புரட்சிக் கவிஞர் பாரதிதாசன் விட்டுச்சென்ற இந்தப் பணியை யாராவது தொடர்ந்தால் என்ன? இன்றைய குழந்தைகளுக்கு இதுபோன்றதொரு திரைப்படம்தானே அவசியம் தேவை!

தகவல்: கே.எம்.வி.
திருக்குறள் சினிமா
கவியரசர் பாரதிதாசன்
உன்னத சமூகப் படம்
கதை, வசனம் : திருவள்ளுவர்
டைரக்ஷன் : பாரதிதாசன்
புரோடியூசர் : முத்து
=======================================================
பாரதிதாசன் இயக்கத்தில் திருக்குறள் சினிமா (10.6.49-ஆம் ஆண்டு) பற்றி கட்டுரையாளர் குறிப்பிட்டிருந்தார். அந்தச் செய்திக்கான தகவல்கள் "கவிதா மண்டலம்', ஏப்ரல் 2010 இதழில் இருந்து எடுத்துத் தரப்பட்டதாக தாமதமாக அவர் எழுதி அனுப்பியிருந்தார். தமிழ்மணியில் "திருக்குறள் சினிமா' வெளியானதால் மேலும் ஒரு புதிய தகவலும் கிடைத்திருக்கிறது.

எஸ்.ஆர்.எம். பல்கலைக்கழத்தில் பணியாற்றும் முனைவர் ச.சு.இராமர்இளங்கோ, "பாரதிதாசன் திருக்குறளை அடிப்படையாக வைத்து எழுதிய ஆக்கம், தீவினை என்னும் படைப்புகள் குறித்து 1990-இல் வெளிவந்த "பாரதிதாசன் நாடகங்கள்' எனும் நூலில் எழுதியுள்ளதாகவும், இது கவிதா மண்டலம் இதழில் வெளிவருவதற்கு முன்பே வெளிவந்ததாகவும் தெரிவித்துள்ளார். திருக்குறளுக்கு இதுபோன்று இன்னும் எத்தனை புதிய புதிய தகவல்கள் கிடைத்தாலும் அது வள்ளுவருக்கும் பொதுமறைக்கும்தானே பெருமை - சிறப்பு? கவிதா மண்டலம் இதழுக்கும், முனைவர் ச.சு.இராமர் இளங்கோவுக்கும் தமிழ்கூறு நல்லுலகம் நன்றிகூற கடமைப்பட்டுள்ளது.
(நன்றி-தினமணி)

திருக்குறளை முன்னிறுத்தி நிறைய கார்டூன்கள் தினமும் தொலைக்காட்ட்ச்சி ப்பெட்டியில்
ஒளிபரப்பப்படுகின்றன.

கவியரசரின் திருக்குறள் சினிமாவும் அருமை.

பகிர்வுக்கு நன்றி.