எல்லாம் செய்யும் பணம்...

குற்றம் செய்து விட்டு தலைமறைவு வாழ்க்கை வாழ்வது இந்தியாவில் கஷ்டமான காரியமல்ல என கெட்டிக்காரத்தனமாக நிரூபித்திருக்கிறார் பிட்டி மொகந்தி. ஜெர்மனி பெண்ணை பாலியல் பலாத்காரம் செய்த வழக்கில் 7 ஆண்டு தண்டனை பெற்று, பரோலில் வெளியே வந்து 6 ஆண்டு தலைமறைவாக இருந்தவர் இவர்.
அத்தனை ஒரிஜினல் சான்றிதழ்கள் இருந்தாலுமே, பாஸ்போர்ட், வாக்காளர் அடையாள அட்டை டிரைவிங் லைசன்ஸ் வாங்குவது மிகவும் கஷ்டமான காரியம். ஆனால் ராகவ ராஜா என்ற போலி பெயரில், போலி அப்பா, போலி அம்மா, போலி சான்றிதழ்கள் துணையோடு வாழ்ந்த பிட்டியிடம் அத்தனையும் இருந்திருக்கிறது.
-
அரசு நிறுவனத்தில் வேலை செய்தால் பள்ளி சான்றிதழில் தொடங்கி, சம்பந்தப்பட்டவர் மீது போலீஸ் வழக்கு எதுவும் இருக்கிறதா என விசாரணை நடப்பது வழக்கம். ஆனால் இத்தனை போலி சான்றிதழ் வாங்கியவருக்கு அதொன்றும் பிரச்னையாகத் தெரியவில்லை. அதையும் சமாளித்து அரசு வங்கியில் அதிகாரியாக வேலை பார்த்து வந்திருக்கிறார். பணம் பாதாளம் வரை பாய்ந்திருக்கிறது. முன்னாள் டிஜிபியின் மகன் என்பதால் அதிகாரமும் சேர்ந்து பாய்ந்திருக்கிறது. தனி ஒருஆளாக இத்தனை போலியையும் அவர் தயார் செய்திருக்க முடியாது. ஒரு கூட்டமே அவருக்காக வேலை செய்திருக்கிறது.
-
மகனுக்கு ஜாமீன் கையெழுத்திட்ட தந்தை பூஷன் மெகந்தி கைது செய்யப்பட்டிருக்கிறார். டிஜிபி வேலையும் பறிபோயிருக்கிறது. இருந்தாலும் பிள்ளைப் பாசத்தால் மகனை மறைத்திருக்கிறார். மகனுக்கு அத்தனை உதவியும் செய்திருக்கிறார். அவ்வப்போது லட்சக் கணக்கில் பணமும் அனுப்பி வந்திருக்கிறார். குடும்பத்தினரும் உறவினர்களும் அவ்வப்போது வந்து பிட்டியை பார்த்து விட்டுச் சென்றுள்ளனர். ஆனால் இது எதுவுமே தலைமறைவான பிட்டியை தேடி வந்த ராஜஸ்தான் போலீசாருக்கு தெரியவில்லை. காசு கண்ணை மறைத்திருக்கலாம்.
-
டெல்லி மாணவி பாலியல் பலாத்கார சம்பவத் தால் பிட்டி மாட்டிக் கொண்டார். அந்த சம்பவத்தை தொடர்ந்து
பாலியல் வழக்கில் தேடப்படும் குற்றவாளிகள் பற்றிய விவரங்கள் போட்டோவுடன் டிவியிலும் பேஸ்புக்கிலும் யூடியூபிலும் பவனி வர அதனால் சிக்கியிருக்கிறார்.இல்லாவிட்டால் இன்னும் எத்தனை ஆண்டுகள் ஆகியிருந்தாலும் பிட்டி சிக்கியிருக்க மாட்டார்.
-
தினகரன்