ஈழத்தமிழரை அழிக்க இலங்கைக்கு உதவியதாக சென்னையிலுள்ள காங்கிரஸ் அலுவலகம் மே 17 இயக்கத்தால் முற்றுகை!

ஈழத்தமிழர்களை அழிக்க இலங்கைக்கு உதவியதாக குற்றம் சாட்டி, சென்னையில் உள்ள தமிழக காங்கிரஸ் அலுவலகமான சத்திய மூர்த்தி பவனை மே 17 இயக்கத்தினர் இன்று முற்றுகையிட்டதால் பரபரப்பு ஏற்பட்டது. இலங்கையில் கடந்த 2009 ஆம் ஆண்டு நடைபெற்ற முள்ளிவாய்க்கால் இறுதிக்கட்ட போரின்போது, ஈழத்தமிழர்களை கொன்றொழிக்க உத்வியதாக மத்திய காங்கிரஸ் அரசை கண்டித்து, சென்னை அண்ணா சாலையில் உள்ள தமிழக காங்கிரஸ் அலுவலகமான சத்திய மூர்த்தி பவனை, மே 17 இயக்கத்தினர் இன்று முற்றுகையிட்டனர். அப்போது காங்கிரஸ் மற்றும் பிரதமர் மன்மோகன் சிங், அப்போதைய அமைச்சராக பிரணாப் முகர்ஜி, காங்கிரஸ் தலைவர் சோனியா காந்தி, அப்போதைய தேசிய பாதுகாப்பு ஆலோசகர் கே.நாராயணன், வெளியுறவுத் துறை செயலர் சிவசங்கர மேனன் உள்ளிட்டோரை கண்டித்து அவர்கள் முழக்கங்களை எழுப்பினர்.

அண்ணா சாலையிலிருந்து, சத்திய மூர்த்தி பவனை நோக்கி சென்ற அவர்களை போலீசார் தடுத்தி நிறுத்தி, கைது செய்தனர்.முன்னதாக சத்திய மூர்த்தி பவனிலிருந்த காங்கிரசாரும் பதிலுக்கு கோஷம் எழுப்பியதோடு, சாலையில் அமர்ந்து போட்டி போராட்டம் நடத்த முயன்றனர். ஆனால் அவர்களை போலீசார் தடுத்து நிறுத்தி உள்ளே அனுப்பினர்.

இது தொடர்பாக மே17 இயக்க ஒருங்கிணைப்பாளர் திருமுருகன் பேசுகையில்,

இறுதிக்கட்ட போரின்போது, 4 லட்சத்து 20 ஆயிரம் தமிழர்களை சிங்கள இராணுவம் சுற்றி வளைத்து, அவர்கள் மீது குண்டுமழை பெய்தது. ஆனால் அப்போதைய பாதுகாப்பு துறை அமைச்சர் பிரணாப் முகர்ஜி, வெறும் 70 ஆயிரம் பேர்தான் இருந்தனர் என்றார். செஞ்சிலுவை சங்கம் உட்பட சர்வதேச மனித உரிமை அமைப்புகள் வெளியிடும் தகவல்கள், பிரணாப் சொன்னது பொய் என்பதை உறுதி செய்கிறது. தமிழர்களை கொன்று குவிக்க உதவிய காங்கிரஸ் கட்சி அலுவலகம் தமிழகத்தில் இருக்கக்கூடாது. அதனை மூட வேண்டும். மேலும் பிரதமர் மன்மோகன் சிங், ஜனாதிபதி பிரணாப் முகர்ஜி ஆகியோர் பதவி விலக வேண்டும்" என்றார்.

செய்தி .கொம்