பெண்ணிடம் பணம் பறிக்க முயற்சி 5 போலி சிபிஐ அதிகாரிகள் கைது

சிபிஐ அதிகாரிகள் போல் நடித்து பெண்ணிடம் பணம் பறிக்க முயற்சித்த 5 பேரை போலீசார் கைது செய்தனர். காட்பாடி அடுத்த பள்ளிகுப்பம் பகுதியைச் சேர்ந்தவர் தேவேந்திரன். பாலிடெக்னிக்கில் ஆசிரியராக வேலை பார்த்து வருகிறார். இவரது மனைவி கீதா (35). தமிழகம் முழுவதும் மோசடியில் ஈடுபட்ட பாசி நிறுவனத்தில் கீதா, ஏஜென்ட்டாக இருந்தாராம். பள்ளிகுப்பம் பகுதியைச் சேர்ந்த மரகதம், பச்சை ஆகியோரின் மகன்களுக்கு, ரயில்வேயில் வேலை வாங்கித் தருவதாக கூறி, கீதா பணம் வாங்கியிருந்ததாக கூறப்படுகிறது. இதுதொடர்பாக வேலூர் சங்கரன்பாளையத்தைச் சேர்ந்த சரவணன் (45) என்பவரிடம் மரகதம், பச்சை ஆகியோர் முறையிட்டுள்ளனர். இதையடுத்து நேற்று முன்தினம் கீதாவின் வீட்டுக்கு ஒரு காரில் சரவணன் தலைமையில் 5 பேர் வந்துள்ளனர். தங்களை சிபிஐ அதிகாரிகள் என்று கீதாவிடம் அறிமுகம் செய்து கொண்டனர். வேலை வாங்கித் தருவதாக பணம் வாங்கி மோசடி செய்ததால் விசாரிக்க வந்துள்ளதாக கூறியுள்ளனர். விசாரணைக்காக தங்களுடன் காரில் வருமாறு கீதாவை அழைத்துள்ளனர். ஆனால் கீதா வர மறுத்துள்ளார். இதனால் பிரச்னையை பேசித் தீர்த்துக்கொள்ளலாம் என்று 5 பேரும் கூறியுள்ளனர். இதுபற்றி வெளியில் தெரியாமல் இருக்க வேண்டுமானால் ஒரு லட்சம் ரூபாய் தருமாறு கேட்டு கீதாவை மிரட்டி சென்றுள்ளனர். இதுகுறித்து காட்பாடி போலீசில் கீதா, புகார் செய்தார். போலீசார் அந்த 5 பேரையும் பிடித்து, விசாரணை நடத்தினர். சரவணனுடன் வந்தவர்கள், கே.வி.குப்பத்தைச் சேர்ந்த முருகேசன் (35), காட்பாடி குமரப்ப நகரைச் சேர்ந்த நாகராஜன் (40), காந்தி நகரைச் சேர்ந்த ராஜன் (35), காங்கேயநல்லூரைச் சேர்ந்த செந்தாமரை (42) என்பது விசாரணையில் தெரியவந்தது. இதையடுத்து 5 பேரையும் போலீசார் நேற்று கைது செய்தனர்.

தினகரன்

குற்றங்கள் தலை விரித்தாடுகிறது ......