தேர்தல் பிரசாரத்தில் நவீன தொழில் நுட்பம்: அசத்துகிறார் மோடி

ஆமதாபாத்: குஜராத் சட்டசபை தேர்தலில், நாட்டிலேயே முதல் முறையாக, அதிநவீன, "3டி ஹோலோகிராபிக்' தொழில்நுட்பம் அறிமுகப்படுத்தப்பட்டுள்ளது. இதன் மூலம், ஒரே இடத்தில் இருந்தபடி, 26 இடங்களில் தேர்தல் பிரசாரம் செய்துள்ளார்,முதல்வர், நரேந்திர மோடி.
அடுத்த மாதம், 13 மற்றும் 17ம் தேதிகளில், இரண்டு கட்டங்களாக, சட்டசபை தேர்தலை சந்திக்க உள்ள குஜராத் மாநிலத்தில், முதல்வர், நரேந்திர மோடி தலைமையிலான பாரதிய ஜனதா அரசு, நான்காவது முறையாக வெற்றி பெற்று, ஆட்சியை தக்க வைத்துக் கொள்ள பாடுபடுகிறது. இதற்காக, தீவிர பிரசாரத்திலும், பிரசாரத்தில், அதிநவீன தொழில்நுட்பத்தையும் பயன்படுத்தி வருகிறது."3டி' தொழில்நுட்பம் மூலம், முதல் முறையாக, குஜராத் தேர்தலில், மோடி பிரசாரம் மேற்கொண்டு வருகிறார் . தலைநகர், காந்திநகரில் இருந்தபடி, அவர் ஆற்றிய தேர்தல் உரை, ஒரே நேரத்தில், பல நகரங்களில்
காண்பிக்கப்படுகிறது.கடந்த ஞாயிறன்று, காந்திநகர் ஸ்டூடியோவில் இருந்தபடி, முதல்வர் மோடி பேசியது, "3டி ஹோலோகிராபிக்' தொழில்நுட்பம் மூலம், செயற்கைக்கோள் வழியாக, மாநிலத்தின் பிற பகுதிகளில் உள்ள நகரங்களான, ஆமதாபாத், வதோதரா, ராஜ்கோட், சூரத் என, 26 இடங்களில், நேரடியாக ஒளிபரப்பானது.

பிரிட்டன் நிறுவனம்



பிரிட்டனை சேர்ந்த, "முசியான்' என்ற நிறுவனம், இந்த தொழில்நுட்பத்தை கொண்டுள்ளது. இந்தியாவை சேர்ந்த, "என் சான்ட்' என்ற நிறுவனம், அதன் உரிமையை பெற்றுள்ளது. இந்த தொழில் நுட்பத்தை, குஜராத் பாரதிய ஜனதா, மூன்று ஆண்டுகளுக்கு பெற்றுள்ளது. இதற்கு, 5 கோடி ரூபாய் கட்டணம் என, கூறப்படுகிறது .இந்த புதுமையான, "3டி' தேர்தல் பிரசாரத்தில், தன்னை, குரங்கு என்றும், எலி என்றும், காங்கிரஸ் கிண்டலடித்து வருவதை கடுமையாக சாடிய, நரேந்திர மோடி, காங்கிரசுக்கு தக்க பாடம் கற்பிக்க வேண்டும் என, பொதுமக்களை கேட்டுக் கொண்டார்.
இந்த புதுமையான பிரசார யுக்தியால், காங்கிரஸ் அரண்டு போயுள்ளது........................ தினமலர்