காற்றாலை மின் உற்பத்தியும் குறைந்தது.. மீண்டும் 5 மணி நேரம் மின்தடை: புகைச்சலில் மக்கள்

சென்னை: காற்றாலை மின் உற்பத்தியும் குறைந்துள்ளதையடுத்து மீண்டும் 5 மணிநேர மின்தடை அமலுக்கு வந்துள்ளது.
தமிழகத்தில் கடந்த ஒரு வருட காலமாக கடுமையான மின் பற்றாக்குறை நீடிக்கும் நிலையில் கடந்த 2 மாதங்களாக காற்றாலைகள் மூலம் கிடைத்த மின்சாரத்தால் பல மாவட்டங்களில் மின்தடை நேரம் கணிசமாக குறைக்கப்பட்டது.

குறிப்பாக அதிக காற்றாலைகள் உள்ள தென்மாவட்டங்களில் 3 மாதங்களாக மின்தடை இல்லாமல் மக்கள் நிம்மதியாக இருந்தனர். கடந்த மாதம் காற்றாலைகள் அதிவேகமாக சுழன்று மின் உற்பத்தியில் சாதனை படைத்தன. அதிகபட்சமாக இதுவரை இல்லாத அளவுக்கு ஒரே நாளில் 3,500 மெகாவாட் மின்சாரம் காற்றாலைகள் மூலம் கிடைத்தது. இந்த நிலையில் கடந்த 3 தினங்களாக காற்று வீசுவது குறைந்துவிட்டது. ஆடி மாதம் அதிக காற்று வீசும். ஆனால் ஆடி பிறப்பான நேற்று பகல் 11 மணிக்கு மேல் வழக்கமாக வீசும் லேசான காற்று கூட வீசாமல் மின்வாரியத்தினரின் காலை வாரியது.

இதனால் மின் உற்பத்தி கணிசமாகக் குறைந்தது. காற்றாலைகள் ஓய்வெடுக்கத் தொடங்கின. மின் உற்பத்தி குறைந்ததை அடுத்து பல இடங்களில் மின் பற்றாக்குறை ஏற்பட்டது. இதனால் நேற்று மாலையில் இருந்து அறிவிக்கப்படாத மின்வெட்டு மீண்டும் அமல்படுத்தப்பட்டது. 45 நிமிட மின்வெட்டு தவணை முறையில் நள்ளிரவு முதல் அமல்படுத்தப்பட்டது.
இதனால் இரவில் மக்கள் தூக்கத்தை தொலைத்து தவித்தனர். இன்று காலை முதல் 3 மணி நேர மின்தடையும் மீண்டும் அமலுக்கு வந்துள்ளது.

ஏற்கனவே மழையின்றி தமிழகத்தில் நீர் மின் நிலையங்களிலும் உற்பத்தி பாதிக்கப்பட்டுள்ள நிலையில் காற்றாலை மின்சாரமும் குறைந்துள்ளது குறிப்பிடத்தக்கது.

நன்றி ஒன் இந்தியா

என்றும் தான் தனியுமோ..!

பிணம் ஆட்சி செய்தால் பீஸ் போகும் வீடுகள் ..