விமர்சனம் : திரு திரு துறு துறு

என்ன ஆனது நம் கோலிவுட்டிற்கு? டாடா சுமோ தாதாக்களும், அரிவாள்களோடு பயமுறுத்தும் 'பெரிய மீசை' வில்லன்களும் காணாமல் போய் விட்டனர். சீட் நுனிக்கு இழுத்து வரும் யதார்த்த த்ரில்லர்களும் அபத்தமில்லாமல் ரசிக்க வைக்கும் ஆர்ப்பாட்ட காமெடிகளும் தமிழ் சினிமாவை ஆக்ரமித்திருப்பது சந்தோஷமான விஷயம்.

அந்த வரிசையில் காமெடியில் கலக்கியிருக்கிறது திருதிரு துறுதுறு!
எப்போதும் ஆபீஸுக்கு லேட்டாக செல்வது, மீட்டிங்கில் சொதப்புவது, நிமிடத்திற்கு ஒரு பொய் சொல்வது என அஜ்மல் ஒரு 'பெர்ஃபக்ட்' பாச்சுலர். ஒழுக்கம், நேர்மை,கடமை தவறாமை என ' நன்னொழுக்க' நாயகியாக புது முகம் ரூபா மஞ்சரி. எதிர் துருவங்கள் ஈர்ப்பது வாடிக்கைதானே... (ஆனால், காதலை பிரதானப்படுத்தாமல் காட்சிகளை நகர்த்தியிருக்கிறார் புதுமுக இயக்குனர் நந்தினி.)
இருவரும் மெளலியின் விளம்பர ஏஜென்சியில் ஒன்றாக வேலை பார்க்கிறார்கள். நஷ்டத்தில் ஓடிக் கொண்டிருக்கும் கம்பெனியைக் காப்பாற்ற போராடுகிறார்கள். இந்த நேரத்தில் குழந்தைகளுக்கான பொருட்களை தயாரிக்கும் நிறுவனத்தின் விளம்பர ப்ராஜெக்ட் கிடைக்கிறது. விளம்பரத்திற்காக தேர்வு செய்து வைத்திருக்கும் குழந்தைக்கு கடைசி நேரத்தில் உடம்பு சரியில்லாமல் போக புதிய குழந்தை தேடி அலைகிறார்கள் அஜ்மலும், ரூபாவும்.
யதேச்சையாக அஜ்மலிடம் ஒரு குழந்தை சிக்குறது. அதே குழந்தையை வைத்து விளம்பரத்தையும் முடிக்கிறார்கள். பின்னர் தான் தெரிகிறது அது கடத்தப்பட்ட குழந்தை என்று. கீரி பாம்பாக இருக்கும் இருவரும் குழந்தையை உண்மையான பெற்றோரிடம் சேர்த்தார்களா என்பதை குழப்பங்களும், காமெடியும் கலந்த கலாட்டாவாக சொல்லிருக்கிறார்கள்.
வெட்டிய முடி,ஒட்டிய பனியன்,டாட்டூ குத்திய உடம்பு என நியூ லுக் அஜ்மல்! பாடி லேங்க்வேஜ், கெட் அப், காமெடி என பல துறைகளில் தேறினாலும், நடிப்பில் கொஞ்சம் கவனம் தேவை. ஆபீஸுக்கு லேட்டாக வந்து சமாளிப்பது, மீட்டிங்கில் சி.டி மாற்றி போட்டு சொதப்பும் போது திரு திருன்னு முழிப்பது என பல இடங்களில் பளிச்!
எல்லாவற்றிலும் 'பெர்ஃபக்ஷன்' எதிர்பார்க்கும் 'ஹிட்லர்' அர்ச்சனாவாக புது முகம் ரூபா மஞ்சரி. கோலிவுட்டிற்கு நல் வரவு. வீட்டை அலங்கோலமாக வைத்திருக்கும் அஜ்மலிடம் சீறும் போதும், அதே அஜ்மலை கடைசியில் காதலிப்பதையும், ரூபாவின் கண்களே நமக்கு உணர்த்தி விடுகின்றன. அம்மணிக்கு கோலிவுட்டில் இடம் நிச்சயம்.படத்தின் வெற்றிக்கு முக்கிய காரணம் மெளலி. மனிதர் வந்தாலே தியேட்டர் குலுங்குகிறது. ஞாபக மறதியால் சமயத்தில் தன் மனைவியின் பெயரையே மறப்பது, கம்பனிக்காக வீட்டை அடமானம் வைப்பது என சகல ஏரியாக்களிலும் வெளுத்து வாங்கியிருக்கிறார்.
முற்பாதியிலேயே கதை என்னவென்று தெரிந்து விடுவதால் பிற்பாதியின் வேகம் கொஞ்சம் குறைகிறது. தெரிந்த க்ளைமாக்ஸை நோக்கியே படம் நகர்வதால் காமெடியை நம்பியே உட்கார வேண்டிய கட்டாயம்.முதல் படத்தில் காமெடியை கையில் எடுத்திருக்கும் நந்தினிக்கு நிச்சயம் பாராட்டுக்களை தெரிவிக்க வேண்டும். லைட்டான கதை, எந்த பெரிய ஆர்ப்பாட்டமும் இல்லாமல் கதைக்கேத்த காமிரா என எல்லோரும் தங்கள் பணியை நிறைவாக செய்திருக்கிறார்கள். பிண்ணனி இசையிலும், சில்லென பூங்காற்று பாடலில் மட்டும் தான் மணிசர்மா ஞாபகத்திற்கு வருகிறார்.
[tr][td]குழப்பமான கதையை எடுத்துக் கொண்டாலும் திருதிருவென்று விழிக்காமல் துறுதுறுவென்று படத்தைக் கொண்டு போன புதிய இயக்குனர் நந்தினிக்கு ஒரு பூங்கொத்து!

Thenali [/td][/tr][tr][td][/td][/tr](வழக்கமாக மீனு சுடும் இடம்)