750 கிலோ எடை உள்ள கொம்பன் திருக்கை மீன், மீனவர் வலையில் சிக்கியது

**சிவா** · **சிவா** Wed 14 Mar 2012 - 9:54

கடலூர் துறைமுகத்தில் தலா 750 கிலோ எடையுள்ள கொம்பன் திருக்கை வகையை சேர்ந்த 2 மீன்கள் சிக்கின.

750 கிலோ எடை

கடலூர் துறைமுகத்தில் நேற்று முன்தினம் 700 கிலோ எடைகொண்ட கொம்பன் திருக்கை வகை மீன் ஒன்று தேவனாம்பட்டினத்தை சேர்ந்த மீனவர் கோவிந்தராஜ் என்பவர் வலையில் சிக்கியது. நேற்று தேவனாம்பட்டினத்தை சேர்ந்த விஜி, ஆறுமுகம் ஆகிய இரு மீனவர்கள் தனிதனி விசைப்படகில் ஆழ்கடலுக்கு மீன்பிடிக்க சென்றனர்.

இவர்கள் இருவரது வலைகளிலும் தலா 750 கிலோ எடையுள்ள கொம்பன் திருக்கை வகை மீன்கள் சிக்கின. இதனை துறைமுகப்பகுதிக்கு நேற்று மதியம் கொண்டு வந்தனர். தொடர்ந்து இரண்டாவது நாளாக கிடைத்த மீன்களை பலர் ஆச்சரியத்துடன் வந்து பார்த்து சென்றனர்.

மருத்துவ குணம்

வழக்கமாக எப்போதாவது ஒருநாள்தான் இந்த அறியவகை மீன்கள் மீனவர்கள் வலைகளில் சிக்கும். அதோடு இதுபோன்ற மீன்கள் மிகுந்த ஆழமான கடல்பகுதியில் மட்டும் பொதுவாக கிடைக்கும். ஆனால் துறைமுக கரையோர பகுதியில் தொடர்ந்து 2 நாட்களாக இவ்வகை மீன்கள் கிடைத்து வருவது மீனவர்களிடையே மிகுந்த ஆச்சரியத்தை ஏற்படுத்தி உள்ளது.

துறைமுகத்திற்கு கொண்டு வரப்பட்ட கொம்பன் திருக்கை மீனின் மருத்துவ குணம் மிக்க பகுதிகள் வெட்டி எடுக்கப்பட்டு, வெளிநாட்டிற்கு அனுப்பப்படுகிறது.

பிடிபட்ட இந்த வகை மீன்களை மிகவும் கவனத்துடன் கரைக்கு கொண்டு வர வேண்டும். இல்லையெனில் வலைகளையும், மீனவரையும் சேதப்படுத்திவிடும் என மீனவர் ஒருவர் தெரிவித்தார்.

தினதந்தி