இந்தியா ஆறுதல் வெற்றி : வெ.இண்டீஸ் பரிதாபம்

சாம்பியன்ஸ் டிராபி லீக் போட்டியில் இந்திய அணி, வெஸ்ட் இண்டீசை 7 விக்கெட் வித்தியாசத்தில் வீழ்த்தி, ஆறுதல் அடைந்தது. லீக் சுற்றில் 3 போட்டிகளிலும் வெஸ்ட் இண்டீஸ் பரிதாபமாக தோல்வி அடைந்தது.


சாம்பியன்ஸ் டிராபி கிரிக்கெட்(மினி உலக கோப்பை) தொடர் தென் ஆப்ரிக்காவில் நடக்கிறது. "ஏ' பிரிவில் இருந்து ஏற்கனவே பாகிஸ்தான், ஆஸ்திரேலியா அரையிறுதிக்கு முன்னேறி விட்டன. இதையடுத்து நேற்று ஜோகனஸ்பர்க்கில் நடந்த முக்கியத்துவம் இல்லாத லீக் போட்டியில் இந்தியா, வெஸ்ட் இண்டீஸ் அணிகள் மோதின.


சச்சின் நீக்கம்:இப்போட்டியில் "புட் பாய்சன்' காரணமாக வயிற்றில் கிருமி தொற்று ஏற்பட, சச்சின் இடம் பெறவில்லை. இவருக்கு பதிலாக அபிஷேக் நாயர் வாய்ப்பு பெற்றார். இஷாந்த் சர்மா நீக்கப்பட்டு, தினேஷ் கார்த்திக் இடம் பெற்றார். டாஸ் வென்ற இந்திய கேப்டன் தோனி, பீல்டிங் தேர்வு செய்தார்.


பிரவீண் அபாரம்:கெய்ல், சர்வான் உள்ளிட்ட நட்சத்திர வீரர்கள் இல்லாமல் களமிறங்கியுள்ள இரண்டாம் தர வெஸ்ட் இண்டீஸ் அணி எதிர்பார்த்தது போல திணறியது. பிரவீண் குமார் பந்துவீச்சில் பிளட்சர்(0), ரீபர்(1) வெளியேறினர். நெஹ்ரா வீசிய ஆட்டத்தின் 8வது ஓவரில் பாவல்(5), ஸ்மித்(21) வீழ்ந்தனர். பின்னர் அமித் மிஸ்ரா சுழலில் பெர்னார்ட்(22) நடையை கட்டினார். சிறிது நேரம் போராடிய சமி அதிகபட்சமாக 23 ரன்கள் எடுத்தார். ஹர்பஜன் வலையில் கிராண்டன்(5), ரோச்(4) சிக்கினர். இறுதியில் வெஸ்ட் இண்டீஸ் அணி 36 ஓவரில் 129 ரன்களுக்கு சுருண்டது. மில்லர்(17) அவுட்டாகாமல் இருந்தார்.இந்திய சார்பில் நெஹ்ரா, பிரவீண் குமார் தலா 3 விக்கெட் வீழ்த்தினர்.


டிராவிட் ஏமாற்றம்:சுலப இலக்கை விரட்டிய இந்திய அணி துவக்கத்தில் ஆட்டம் கண்டது. ரோச் பந்தில் காம்பிர்(6) போல்டானார். டிராவிட்(4) ரன் அவுட்டானார். இதற்கு பின் தினேஷ் கார்த்திக், விராத் கோஹ்லி இணைந்து டெஸ்ட் போட்டி போல மந்தமாக ஆடினர். கோஹ்லி ஒரு நாள் போட்டிகளில் தனது 2வது அரைசதம் கடந்தார். தினேஷ் கார்த்திக் 34 ரன்கள் எடுத்தார். இந்திய அணி 32.1 ஓவரில் 3 விக்கெட்டுக்கு 130 ரன்கள் எடுத்து, இத்தொடரில் முதல் வெற்றியை பெற்றது. 79 ரன்களுடன் (9 பவுண்டரி, 2 சிக்சர்) அவுட்டாகாமல் இருந்த விராத் கோஹ்லி, ஆட்ட நாயகன் விருதை தட்டிச் சென்றார்.


மோசமான தொடர் : சமீப காலமாக ஒரு நாள் போட்டிகளில் வெற்றிக் கொடி நாட்டி வந்த தோனி தலைமையிலான இந்திய அணிக்கு சாம்பியன்ஸ் டிராபி தொடர் மோசமானதாக அமைந்தது. இம்முறை லீக் சுற்றில் பாகிஸ்தானிடம் தோல்வி அடைந்தது. ஆஸ்திரேலியாவுடனான போட்டி மழையால் ரத்தானது. வெஸ்ட் இண்டீசுக்கு எதிராக ஆறுதல் வெற்றி பெற்றது. 3 புள்ளிகள் மட்டும் பெற்றதால் லீக் சுற்றோடு பரிதாபமாக வெளியேறியது.


தோனியின் புதிய அவதாரம் :இந்திய கேப்டன் தோனி நேற்று மிதவேகப்பந்துவீச்சில் அசத்தினார். கீப்பர் பொறுப்பை தினேஷ் கார்த்திக்கிடம் ஒப்படைத்த இவர், 17வது ஓவரை வீசினார். முதலிரண்டு பந்தில் டவ்லின் அடுத்தடுத்து பவுண்டரி அடித்தார். நான்காவது பந்தில் டவ்லினை(14) போல்டாக்கிய தோனி, ஒரு நாள் போட்டிகளில் தனது முதல் விக்கெட்டை பெற்றார். ஒரு நாள் போட்டிகளில் முதல் முறையாக பந்துவீசிய இவர், 2 ஓவரில் 14 ரன் கொடுத்து ஒரு விக்கெட் வீழ்த்தினார்.


பிரார்த்தனை வீண் :நேற்றைய லீக் போட்டியில் பாகிஸ்தான் வெற்றி பெற வேண்டுமென இந்திய ரசிகர்கள் விரும்பினர். வெஸ்ட் இண்டீசுக்கு எதிரான போட்டியின் இடைவேளையின் போது சச்சின், டிராவிட் உள்ளிட்ட இந்திய வீரர்கள் அரங்கில் இருந்த "டிவி' முன்பு கூடி, ஆஸ்திரேலியா- பாகிஸ்தான் போட்டியை பரபரப்புடன் பார்த்தனர். கடைசி பந்தில் ஆஸ்திரேலியா வெற்றி பெற, இந்தியாவின் அரையிறுதி கனவு தகர்ந்தது. ரசிகர்களின் பிரார்த்தனையும் வீணானது.