நாளை நடக்கும் பெர்த் டெஸ்டில் வெல்வது எப்படி? யுவராஜ் ஆலோசனை

புதுடில்லி: ""பெர்த் டெஸ்டில் சேவக், சச்சின், டிராவிட் மற்றும் லட்சுமண் ஆகிய நால்வரும், பேட்டிங்கில் எழுச்சி பெற்றால் இந்திய அணி வெற்றி பெறலாம்,'' என, ஆலோசனை கூறியுள்ளார் யுவராஜ் சிங்.

இந்தியா, ஆஸ்திரேலியா அணிகள் இடையிலான மூன்றாவது டெஸ்ட் போட்டி, நாளை பெர்த்தில் துவங்குகிறது. இதுகுறித்து தற்போது ஓய்வில் உள்ள இந்திய வீரர் யுவராஜ் சிங் கூறியது: ஆஸ்திரேலிய அணியின் சமீபத்திய வெற்றிக்கு பாண்டிங், ஹசியை பாராட்ட வேண்டும். இவர்கள் அவ்வளவு தான் என, "மீடியா'வில் விமர்சிக்கப்பட்டது. ஆனால், சிட்னி டெஸ்டில் கேப்டன் கிளார்க்குடன் சேர்ந்து பாண்டிங்கும் சதம் அடித்து அசத்தினார். "பேட்டிங்' முக்கியம்: பெர்த் டெஸ்டில் இந்திய அணியின் சீனியர்கள் சச்சின், டிராவிட், சேவக் மற்றும் லட்சுமண் ஆகியோர் பேட்டிங்கில் எழுச்சிபெற வேண்டும்.சிறப்பான "பார்ட்னர்ஷிப்' அமைத்து ரன் குவிப்பில் ஈடுபட வேண்டும். இது சரியாக நடந்து விட்டால், வெற்றி உறுதிதான்.

உண்மை தெரிந்தது: எப்போதும் டெஸ்ட் போட்டிகளில் பங்கேற்பது குறித்து மிகுந்த ஆர்வத்துடன் உள்ளேன். நுரையீரலில் கட்டி என்ற செய்தியை கேள்விப்பட்ட பின், முழு உடற்தகுதி அடைந்த பின் கிரிக்கெட் விளையாட வேண்டும் என்று நினைத்தேன். வெஸ்ட் இண்டீசிற்கு எதிரான டெஸ்ட் தொடரில் பங்கேற்றிருக்கக் கூடாது. தேசம் தான் பெரிது என்பதால் விளையாடினேன். பின் தான், உடற்தகுதியில்லை என்றால், தேசத்துக்காக சிறப்பான ஆட்டத்தை வெளிப்படுத்த முடியாது என்பதை உணர்ந்தேன். மீண்டும் தேசத்துக்காக திறமை வெளிப்படுத்த தயாராக உள்ளேன். எதிர்வரும் முத்தரப்பு தொடரில் வாய்ப்பு கிடைத்தால், சிறப்பாக செயல்படுவேன். இவ்வாறு யுவராஜ் சிங் தெரிவித்தார்.

தாக்குதல் ஆட்டம்: பெர்த்தில், இந்தியவீரர்கள் தற்காப்பு முறையில் அல்லாமல், தாக்குதல் ஆட்டத்தை கையாண்டால் ரன்கள் சேர்க்கலாம். இதற்கு பல சம்பவங்கள் உதாரணமாக உள்ளன. தற்போது தேர்வுக்குழு உறுப்பினராக உள்ள மொகிந்தர் அமர்நாத், வேகப்பந்தை துணிச்சலாக எதிர்கொள்வார். வேகப்பந்து வீச்சை சந்திப்பது என்பது, குத்துச்சண்டை போல அங்கும் இங்கும் ஓடி தப்பிக்க முடியாது. பந்தை எதிர்கொண்டே ஆகவேண்டும் என, அடிக்கடி கூறுவார்.

* இவர், 1980-82ல் பாகிஸ்தானின் இம்ரான் கான், சர்ப்ராஸ் நவாஸ், வெஸ்ட் இண்டீஸ் அணியின் மைக்கேல் ஹோல்டிங், மால்கம் மார்ஷல், ஜோயல் கார்னர் போன்ற வேகப்பந்து வீச்சாளர்களை எதிர்கொண்டு, 11 டெஸ்டில் 5 சதம் உட்பட 1200 ரன்கள் வரை எடுத்துள்ளார்.

* 1982-83ல் வெஸ்ட் இண்டீஸ் மண்ணில், இந்திய அணி எடுத்த ரன்களில் 50 சதவீதம் இவர் தான் எடுத்தார். ஒருமுறை மார்ஷலின் பந்து, அமர்நாத்தின் முகத்தில் பட்டு ரத்தம் கொட்டியது. உடனடியாக தையல் போட்டு திரும்பிய இவர், மீண்டும் தாக்குதல் பாணியில் விளையாடி 80 ரன்கள் எடுத்தார்.

* 1983ல் வெஸ்ட் இண்டீஸ் தொடரில் கான்பூர் டெஸ்டில் ஏமாற்றிய கவாஸ்கர், அடுத்து டில்லியில் மார்ஷல் போன்ற வேகங்களுக்கு எதிராக 128 பந்துகளில் 121 ரன்கள் எடுத்தார்.

* வேகப்பந்து வீச்சாளர்கள் எப்போதும், மிரட்டவே பயன்படுவர். இவர்களால் விக்கெட் வீழ்த்த முடியாது என்று நம்புபவர் முன்னாள் வீரர் வெங்சர்க்கார். 1983-84ல் நடந்த வெஸ்ட் இண்டீஸ் தொடரில் இவர் இரு சதம் அடித்தார். இதனால் நாளைய போட்டியில் இந்திய வீரர்கள் தாக்குதல் ஆட்டத்தை கையில் எடுத்து, ஆஸ்திரேலியாவுக்கு பதிலடி தரவேண்டும்.

தினமலர்