சுவையா? ஆரோக்கியமா? - நோய்கள் தயார்!

**சிவா** · **சிவா** Fri Dec 30, 2011 4:12 pm

ஆர்டர் கொடுத்துவிட்டு அரைமணி நேரம் காத்திருக்க வேண்டாம். "அண்ணே, நாலு இட்லி, ஒரு ஆம்லெட்' என்று நாமே ஆர்டர் செய்ய, "என்ன தம்பி, ஒரு வாரமா ஆளையே காணோம்' என்று பரபரப்பிலும் விசாரிப்போடு விரைவாகவும் சாப்பாடு கிடைக்கும் இடம்தான் கையேந்திபவன்கள்.

படுஃப்ரெண்ட்லியாகப் பரிமாறும் பல அண்ணன்கள், வியாபார அவசரத்தில் சுத்தத்தை அடியோடு மறந்துவிடுவதுதான் பிரச்னை.

ராயப்பேட்டையில் உள்ள ஒரு கையேந்திபவனில், பரோட்டா போடும் டேபிள், கூரை இல்லாமல் வானத்தைப் பார்த்தபடி இருந்தன. பீட்டர் சாலையில் உள்ள ஒரு கடைக்கு மிக அருகில் பொதுக்கழிப்பறை! அசோக் நகர் சிகனல் பக்கத்தில் உள்ள கையேந்திபவனில் புழுதியைப் பற்றி கவலையே படாமல், பூரிகளைக் கண்காட்சி ரேஞ்சுக்குக் குவித்திருந்தார்கள்.

"பல கடைகளில் ஒரு முறை பயன்படுத்தின எண்ணெய்யை மாறி மாறி பயன்படுத்துறாங்க. நாள்பட்ட மாவில் பண்றதால், புளிச்ச தோசைதான் கிடைக்கும். கறிக்கடைகளில் மீந்துபோன சிக்கனை வாங்கிட்டு வந்து குருமாவுல போடுறாங்க. பரோட்டா குருமாவும் பீஃப் போடுற கடைகளைக்கூட எனக்குத் தெரியும். அடிக்கடி வயிற்றுக் கோளாறுகள் வந்ததால், முன்பின் தெரியாத தள்ளுவண்டிக் கடைகளில் சாப்பிடுறதை இப்போ நான் நிறுத்திட்டேன்' என்று தனி லிஸ்டே போடுகிறார் திருவல்லிக்கேணி மேன்சன் ஒன்றில் வசிக்கும் தயாளன்.

"சுகாதாரம் இல்லாத உணவால் பரவலாக ஏற்படுற உடல் நலக்கோளாறு "ஃபுட் பாய்சனிங்.' ஹைபடைட்டீஸ் ஏ கிருமியால் உண்டாகும் மஞ்சள் காமாலை, டைபாய்டு ஆகிய நோய்களும் மோசமான உணவால் உண்டாகும். மறுபடியும் மறுபடியும் கொதிக்க வைக்கப்பட்ட எண்ணெயில் தயாரான உணவை நீண்ட காலம் சாப்பிடுறவங்களுக்குப் புற்றுநோய் வரவும் வாய்ப்பு இருக்கு. இது அறிவியல்பூர்வமா நிரூபிக்கப்பட்ட உண்மை' என்று எச்சரிக்கிறார் இரைப்பை, குடல் அறுவை சிகிச்சை நிபுணர் சந்திரமோகன்.

சுவை, சிம்பிளிசிட்டி, மலிவான விலை எல்லாம் உடல் ஆரோக்கியத்தை விட மேலானதல்ல. இதை மக்கள் முதலில் உணர வேண்டும்.

ஆனந்த் செல்லையா