முல்லைப் பெரியாறு அணை உடைக்கப்பட்டால் கடும் விளைவுகள் ஏற்படும்-பிரதமரிடம் வைகோ எச்சரிக்கை

டெல்லி: முல்லைப் பெரியாறு அணை மிகவும் பலமாக, உறுதியாக உள்ளது. இப்படிப்பட்ட அணையை உடைத்தால், உடைக்க முயற்சி நடந்தால் கடும் விளைவுகள் ஏற்படும் என்று பிரதமர் மன்மோகன் சிங்கிடம், மதிமுக பொதுச் செயலாளர் வைகோ நேரில் எச்சரித்துள்ளார்.

டெல்லி வந்த வைகோ இன்று காலை பிரதமரை அவரது இல்லத்தில் சந்தித்துப் பேசினார். முல்லைப் பெரியாறு அணை விவகாரம் தொடர்பாக நடந்த இந்த சந்திப்பு 20 நிமிடங்கள் நீடித்தது.

பின்னர் செய்தியாளர்களிடம் பேசிய வைகோ, முல்லைப் பெரியாறு அணை விவகாரம் தொடர்பாக தமிழக, கேரள மாநிலங்களுக்கு இடையிலான சுமூக உறவு பாதிக்கபப்ட்டுள்ளது. கேரளா கூறுவதைப் போல முல்லைப் பெரியாறு அணை பலவீனமாக இல்லை. மிகவும் பலமாக,வலுவாக உள்ளது. நிலநடுக்கத்தால் அணையில் பாதிப்பு என்ற கேரளாவின் வாதம் பொய்யானதாகும்.

அணையின் பலம் மற்றும் பாதுகாப்பு குறித்து கேரளா கூறி வரும் பொய்ப் பிரசாரத்தையும், பொய்யான குற்றச்சாட்டுக்களையும் பிரதமர் நம்பக் கூடாது என்று அவரிடம் தெரிவித்தேன்.

கடந்த சில நாட்களாக கேரள அரசியல் கட்சியினர் சிலர் அணைப் பகுதியிலேயே போராட்டங்களில் குதித்துள்ளனர். அணையை சேதப்படுத்த முயல்கின்றனர். அப்படி நடந்தால் கடும் விளைவுகள் தமிழகத்தில் ஏற்படும் என்பதை எச்சரிக்கையாக பிரதமரிடம் தெரிவித்தேன்.

அணையின் பாதுகாப்பு கருதி அங்கு மத்திய படையை நிறுத்த வேண்டும் என்று முதல்வர் ஜெயலலிதா வலியுறுத்தி பிரதமருக்கு கடிதம் எழுதியிருப்பதை அவரிடம் சுட்டிக் காட்டி அந்தப் பாதுகாப்பை செய்யுமாறு கேட்டுக் கொண்டேன்.

கேரள போலீஸார் அணைக்குப் பாதுகாப்பாக இருப்பது பொருத்தமானதல்ல. இரு மாநில உறவுகளும் சீர்கெடாமல் இருக்க வேண்டும் என்றால் அங்கு மத்திய பாதுகாப்புப் படையினரின் பாதுகாப்புக்கு உத்தரவிடுவது அவசியம் என்று அவரிடம் கூறினேன். இதுகுறித்து உரிய அதிகாரிகளுடன் பேசுவதாக பிரதமர் தெரிவித்தார்.

முல்லைப் பெரியாறு அணை தொடர்பாக கேரள அரசு கூறி வரும் அனைத்துமே பொய்யானவை, தவறான தகவல்கள். எனவே கேரள அரசின் பேச்சுக்களையும், பிரசாரத்தையும் கேரள மக்கள் நம்ப வேண்டாம் என்று கேட்டுக் கொள்கிறேன் என்றார் வைகோ.

thatstamil