பான் கீ மூன் பேசுகையில் செய்தியாளர்களின் கேள்விகளுக்கு தடை: 'இன்னர் சிற்றி பிரஸ்' விசனம்

இலங்கை விவகாரத்தை உரியமுறையில் கையாளாகாதமை குறித்து விமர்சனத்திற்குள்ளான ஐ.நா. சபை பொதுச்செயலாளர் பான் கீ மூன், அடுத்த வாரம் நடைபெறவிருக்கும் பொதுச் சபைக் கூட்டத்திற்கு முன் எழக்கூடிய விமர்சனங்களை தவிர்ப்பதற்காக செய்தியாளர்களின் கேள்விகளுக்குத் தடை விதித்துள்ளது என்று இன்னர் சிற்றி பிறஸ் குற்றம் சாட்டியுள்ளது.

இது குறித்து இன்னர் சிற்றி பிரஸ் ஸ்தாபனம் தெரிவித்துள்ளதாவது:-



ஐக்கிய நாடுகள் ஸ்தாபன ஊடகங்களுடன் பான் கீ மூன் வியாழக்கிழமை கேள்வி பதில் எதுவுமின்றி நடத்திய மாநாட்டில் இலங்கை விவகாரங்கள் உட்பட பல விடயங்கள் உட்பட்ட அறிக்கை ஒன்றை வாசிக்க ஆரம்பித்தார்.

இதனையடுத்து பானின் பேச்சாளர் மிசேல் மொன்ராஸ் இலங்கை பற்றிய கேள்விகளை ஏற்றுக் கொள்ளாததுடன் ஊடகவியலாளர்கள் அத்தகைய கேள்விகளை கேட்கவும் அனுமதிக்கவில்லை.

ஐக்கிய நாடுகள் ஸ்தாபனத்தினால் முக்கியமானதொரு செயலாளர் நாயகத்தின் ஆரம்ப அறிக்கையில் கருதப்படும் ஒரு விடயம், அது இலங்கை சம்பந்தப்பட்டதாயினும் அது பற்றிய கேள்விகள் அனுமதிக்கப்பட வேண்டும்.

இலங்கை இராணுவம் நீதி விசாரணையின்றி புரிந்த படுகொலைகளை சித்தரிப்பதாக கூறி சில வாரங்களுக்கு முன் ஒளிபரப்பப்பட்ட வீடியோ காட்சிகள் பற்றி செயலாளர் நாயகத்தின் ஆரம்ப உரையில் எதுவும் குறிப்பிடப்படவில்லை. இது பற்றி இன்னர் சிற்றி பிரஸ் அவரது பேச்சாளடம் கேட்டபோது, நேரடியாக அன்றி சுற்றிவளைக்கப்பட்ட பதிலே கிடைத்தது.

வியாழக்கிழமை வெளியிடப்பட்ட அடக்கமான ஆரம்ப அறிக்கைக்கு நீண்ட நாட்களுக்கு முன் இடம்பெற்ற சம்பவம் பற்றி அதாவது வவுனியாவிலுள்ள கட்டாய தடுப்புக் காவல் முகாமிலிருந்து 10,000 பேர் அகற்றப்பட்டமை பற்றியோ அவர்களில் ஏறத்தாழ அரைவாசிப் பேர் தூர உள்ள வேறு முகாம்களுக்கு நகர்த்திச் செல்லப்பட்டமை பற்றியோ எதுவும் தெரிவிக்கப்படவில்லை என்றும் இன்னர் சிற்றி பிரஸ் சுட்டிக் காட்டியுள்ளது.

முகாம்கள் குறித்து செயலாளர் நாயகத்தின் அறிக்கை வெளிவர முதல் நாள் பிரித்தானிய 'கார்டியன்' பத்திரிகையில் வெளியிடப்பட்ட ஒரு செய்தியில் ஒருவர் பின்வருமாறு தெவித்திருந்தார். "ஐக்கிய நாடுகள் செயலாளர் நாயகம் அங்கு வந்தபோது நான் அங்கு நின்றிருந்தேன்.

பத்து நிமிடங்கள் மட்டும் அவர் அங்கிருந்துவிட்டு திரும்பி விட்டார். அவர் முகாமுக்குள் சென்று சிறிது நேரம் அங்கிருந்து மக்களுடன் பேசி அவர்களுக்கு உள்ள பிரச்சினை என்னவென்று ஏன் அவர்களிடம் கேட்கவில்லை? அவருக்கு சில பொறுப்புக்கள் உண்டு. மக்கள் அவரிடமிருந்து எதையாவது எதிர்பார்த்திருப்பார்கள். ஆனால் அவர் 10 நிமிடங்கள் மட்டுமே அங்கு தங்கியிருந்தார். இவ்வாறு பிரித்தானிய கார்டியன் பத்திரிகையில் தெரிவித்திருந்தார்.