கவனிப்பாரில்லாத கல்லாறு பழப்பண்ணை :பொட்டல் காடாக மாறிவரும் அவலம்

மேட்டுப்பாளையம் : முன்னாள் பிரதமர்கள்,
கவர்னர்கள் பார்த்துப் பாராட்டிய, பாரம்பரிய சிறப்பு மிக்க கல்லாறு
பழப்பண்ணை, தற்போது கவனிப்பாரின்றி பொட்டல் காடாக மாறி வருகிறது. நீலகிரி
மலையடிவாரத்தில் உள்ள கல்லாற்றில் 23 ஏக்கரில், தோட்டக்கலைத் துறைக்கு
சொந்தமான அரசு பழப்பண்ணை உள்ளது. 1900ல் அமைக்கப்பட்ட இப்பண்ணையில்,
"பழங்களின் ராணி' என்று அழைக்கப்படும் மங்குஸ்தான், துரியன், லிட்சி,
ரம்பூட்டான், மலேயன் ஆப்பிள், வெல்வெட் ஆப்பிள் உட்பட 33 வகை பழமரங்கள்
இருந்தன.


வாசனை திரவிய பயிர்களான
மிளகு, ஜாதிக்காய், கிராம்பு, லவங்கப்பட்டை, வெனிலா உட்பட எட்டு வகை
செடிகள் மற்றும் பாக்கு, காபி, கோகோ, முந்திரி உட்பட 19 வகை இதர செடிகள்
இருந்தன. இங்கு வரும் சுற்றுலா பயணிகள் மரம், செடி நாற்றுகளை விலைக்கு
வாங்கிச் செல்கின்றனர். முன்னாள் பிரதமர்கள் நேரு, இந்திராகாந்தி,
முன்னாள் முதல்வர்கள் காமராஜர், எம்.ஜி.ஆர்., வெளிநாட்டு அமைச்சர்கள்
மற்றும் ஆராய்ச்சியாளர்கள், கல்லாறு பழப்பண்ணையை பார்வையிட்டு
பாராட்டியுள்ளனர். அரியவகை பழ மரங்கள், வாசனை செடிகள் இருந்ததால், கல்லாறு
பழப் பண்ணை தனி இடத்தை பெற்றிருந்தது. சுற்றுலா பயணிகளின் எண்ணிக்கை
நாளுக்கு நாள் அதிகரித்து, வருவாயும் அதிகளவில் கிடைத்தது.


கடைசியாக,
2003 -04 ல் செலவு போக ஏழு லட்சம் ரூபாய் லாபம் கிடைத்தது. 2004 -05 ல்
லாபத்தொகை ரூ. 94 ஆயிரத்து 600 ஆக குறைந்தது. 2005 -06 ல் ரூ. 31 ஆயிரம்
நஷ்டத்திற்கு தள்ளப்பட் டது. இவ்வளவு சிறப்பு மிக்க இப்பண்ணையை அதிகாரிகள்
கண்டுகொள்ளாததால், தற்போது பொட்டல் காடு போல் சீரழிந்து வருகிறது. கடந்த
2006 நவம்பர் 13ம் தேதி இரவு பெய்த கனமழையால், இப்பண்ணையில் மூன்று
இடங்களில் பெரிய நிலச்சரிவு ஏற்பட்டு, மண் மூடியது.


முதல்
கட்டமாக, போர்க்கால அடிப்படையில் வழித்தடங்கள் சரிசெய்து, 2007 ஏப்ரல்
14ல் மீண்டும் பண்ணை திறக்கப்பட்டது. ஆனால், நிலச்சரிவுக்கு பின்
பண்ணையில் எவ்வித வளர்ச்சிப்பணியும் நடக்கவில்லை.கல்லாற்றில் இருந்து
தண்ணீர் வரும் வாய்க்கால் பல இடங்களில் உடைப்பு ஏற்பட்டு, வீணாகி
வருகிறது. முறையான நீர்ப்பாசனம் செய்யாமல் வாய்க்காலில் வரும் தண்ணீர்,
மீண்டும் ஆற்றுக்கே செல்லும் நிலை உள்ளது. பண்ணை துவங்கியபோது இருந்த
மரங்கள், செடிகள் பெயர்கள் எழுதி சுற்றுலா பயணிகளின் பார்வைக்கு
வைக்கப்பட்டுள்ளன. அதில் உள்ள நாற்றுகளை கேட்டால், 75 சதவீதம் நாற்றுகள்
இல்லை என்று கூறுகின்றனர். போதிய பராமரிப்பு இல்லாததால், பழப்பண்ணை
பொலிவிழந்து காணப்படுகிறது.


கல்லாறு
பழப்பண்ணை மேலாளர் ராமகிருஷ்ணன் கூறுகையில், “""நிலச்சரிவு ஏற்பட்ட இடத்தை
சரி செய்து, பண்ணையை சீரமைக்க, அரசு ரூ. 21 லட்சம் நிதி ஒதுக்கியுள்ளது.
இன்ஜினியரிங் துறை தான் நிலத்தை சீர் செய்து கட்டடங்கள் கட்டி வருகிறது.
சில இடங்களில் புதியதாக நாற்று நட்டு வருகிறோம். அவர்கள் பணிகளை
முடித்துக் கொடுத்த பின் தான் மீதமுள்ள இடங்களில் நாற்றுகள் நடப்படும்,''
என்றார்.