உத்தர பிரதேசத்தில் அரை பாட்டில் சாராயத்துக்காக 32 ஆண்டுகள் நடந்த வழக்கு

உத்தர பிரதேசத்தில் அரை பாட்டில் சாராயத்துக்காக 32 ஆண்டுகள் நடந்த வழக்கு

பதிவு செய்த நாள் : 8/6/2011 1:5:15

புதுடெல்லி : அரை பாட்டில் கள்ளச்சாரயம் வைத்திருந்த குற்றத்துக்காக கைது செய்யப்பட்டவரின் வழக்கு 32 ஆண்டுகளாக நடந்துள்ளது. அவரை உடனடியாக விடுவிக்க உச்ச நீதிமன்றம் உத்தரவிட்டுள்ளது. உத்தரப் பிரதேசத்தை சேர்ந்தவர் சிங். அரை பாட்டில் கள்ளச்சாரயம் வைத்திருந்த குற்றத்துக்காக கடந்த 1979ம் ஆண்டு கைது செய்யப்பட்டார். அவர் மீதான வழக்கு கீழ் நீதிமன்றத்தில் கடந்த 32 ஆண்டுகளாக விசாரணையில் இருந்தது. இதையடுத்து, உச்ச நீதிமன்றத்தில் சிங் மேல்முறையீடு செய்தார். அதில், தன் மீதான வழக்கை மாஜிஸ்திரேட் முறையாக விசாரிக்கவில்லை என கூறியிருந்தார். இந்த மனு நீதிபதிகள் பேடி, மிஸ்ரா அடங்கிய பெஞ்ச் முன்னிலையில் விசாரணைக்கு வந்தது. சிங்கின் புகாருக்கு பதிலளித்த உ.பி. அரசு, வழக்கை மீண்டும் விசாரிக்கலாம் என கூறியது. நீதிபதிகள் அதை நிராகரித்தனர்.

பின்னர் பிறப்பித்த உத்தரவில், ‘‘சம்பவம் 1979ம் ஆண்டு நடந்துள்ளது. அதுவும் அரை பாட்டில் கள்ளச்சாரயத்துக்காக சிங் கைது செய்யப்பட்டுள்ளார். 32 ஆண்டுகளாக அவர் வழக்கை சந்தித்துள்ளார். மிகவும் தாமதமான நிலையில், மீண்டும் விசாரணை நடத்த விரும்பவில்லை. இவர் மீது கீழ் நீதிமன்றம் பிறப்பித்த உத்தரவுகளை தள்ளுபடி செய்கிறோம். இந்த குற்றத்துக்காக மனுதாரர் 5 மாதம் 15 நாள் சிறை தண்டனை அனுபவித்துள்ளார். தற்போது சிறையில் இருக்கும் சிங் மீது வேறு எந்த வழக்கும் இல்லை என்றால் அவரை விடுவிக்க வேண்டும்’ என்று நீதிபதிகள் கூறினர்.