குரங்கு - நாய் பிரெண்ட்ஷிப் புத்தகம்!

dsudhanandan · dsudhanandan Mon Jun 27, 2011 1:29 pm

ஜார்ஜ்டவுன் : அமெரிக்காவில் கடந்த 4 ஆண்டுகளாக இணைபிரியாமல் இருக்கும் குரங்கு - நாய் நட்பை கவுரவித்து புத்தகம் வெளியிடப்பட்டுள்ளது. குரங்கே கையெழுத்து போட்டு ரசிகர்களிடம் புத்தகங்களை வழங்கியது. அமெரிக்காவின் தெற்கு கரோலினா மாநிலத்தில் உள்ள நகரம் மிர்ட்டில்பீச். இங்கு ‘டைகர்’ என்ற பெயரில் விலங்குகள் சரணாலயம் உள்ளது. கடந்த 4 ஆண்டுகளுக்கு முன்பு இங்கிருந்து ராஸ்கோ என்ற நாய் எதிர்பாராதவிதமாக தப்பி வெளியேறிவிட்டது.

அப்பகுதியில் சுற்றிக் கொண்டிருந்த உராங்குட்டான் வகை குரங்கு இந்த நாயை பார்த்தது. பொதுவாக, குரங்குக்கும் நாய்க்கும் ஆகாது. ஆனால், நாயை பார்த்ததும் பாசத்துடன் குரங்கு நெருங்கி வந்தது. அதன் பின்னர், அதுவும் ‘டைகர்’ சரணாலயத்துக்கு வந்துவிட்டது. அப்போது தொடங்கிய நட்பு, 4 ஆண்டுகளாக நீடித்து வருகிறது. ராஸ்கோ நாயும் ‘சூரியா’ என்ற பெயரிடப்பட்ட உராங்குட்டானும் தோள் மீது கை போட்டு ஸ்டைலாக போஸ் கொடுப்பதும், ஒருவரை ஒருவர் பாசத்தால் தடவிக் கொடுப்பதும் சரணாலயத்தில் அடிக்கடி காணக் கிடைக்கும் காட்சிகள்.

உலகப் புகழ் பெற்ற அமெரிக்க டிவி நிகழ்ச்சியான ‘வின்பிரே ஓபரா’ பேட்டியிலும் இந்த நட்பு ஜோடி வந்து போயிருக்கின்றன. நேஷனல் ஜியாகரபிக் இதழிலும் இவர்களை பற்றிய சிறப்பு கட்டுரை வந்திருக்கிறது. இந்நிலையில், இவர்களது 4 ஆண்டு நட்பை கவுரவிக்கும் வகையில் ‘சூரியா அண்ட் ராஸ்கோ’ என்ற பெயரில் புத்தகம் வெளியிடப்பட்டுள்ளது. ஜார்ஜ்டவுன் நகரில் உள்ள புத்தக கடையில் வெளியீட்டு விழா எளிமையாக நடந்தது. விஐபிக்கள் புத்தக ரிலீஸ் நிகழ்ச்சி போல இரண்டும் தோளில் கை போட்டுக்கொண்டு போஸ் கொடுத்தன.

உராங்குட்டான் ஒருபடி மேலே சென்று புத்தகங்களில் கையெழுத்து (கிறுக்கல்தான்) போட்டு புத்தகங்களை வழங்கியது. சூரியா பாசத்துடன் வாழைப்பழத்தை நீட்டுவதும், ராஸ்கோ சிணுங்கியபடி தலையை திருப்பிக் கொள்வதும் புத்தகத்தில் இடம் பெற்றிருக்கும் சூப்பர் போட்டோக்களில் ஒன்று. அமெரிக்காவில் இந்த புத்தகம் மிகுந்த வரவேற்பை பெற்றுள்ளது.

- தினகரன்