டிஎபி: பெர்க்காசா மீது அம்னோ நடவடிக்கை எடுக்காதது அதனுடைய உண்மையான முகத்தைக் காட்டுகிறது

நேற்று தேசத் துரோக, இனவாத அறிக்கையை விடுத்த பெர்க்காசா தலைவர் இப்ராஹிம் அலி மீது அம்னோ நடவடிக்கை எடுக்காதது, இன வேற்றுமைகளில் உயிர் வாழும் கட்சி என்ற அம்னோ உண்மையான முகத்தை காட்டியுள்ளதாக டிஎபி தலைமைச் செயலாளர் லிம் குவான் எங் கூறியுள்ளார்.

இப்ராஹிம், தம்மை “போர்க்கால ஜெனரல்” என்று பிரகடனப்படுத்திக் கொண்டு சீன சமூகம் பெர்சே ஊர்வலத்தை தொடர்ந்து நடத்துமானால் கடும் விளைவுகள் ஏற்படும் என எச்சரித்ததின் மூலம் இன்னொரு மே 13க்கான மருட்டலை விடுத்துள்ளார் என லிம் விடுத்த அறிக்கை கூறியது.

“உணவுப் பொருட்களை சேமித்து வைக்குமாறு குறிப்பிட்ட ஒரு சமூகத்தை கேட்டுக் கொள்ளும் இனவாத, பொறுப்பற்ற அறிக்கையை மலேசிய வரலாற்றில் இதுவரை யாரும் வெளியிட்டதே இல்லை,” என அந்த அறிக்கை தொடர்ந்து தெரிவித்தது.

“அமைதியை விரும்பும் அனைத்து மலேசியர்களும் அத்தகைய கருத்துக்களை ஏற்றுக் கொள்ள மாட்டார்கள் என்பது தெளிவாகும். ”

அடுத்து லிம் இப்ராஹிம் மீது நடவடிக்கை எடுக்க அம்னோ தவறி விட்டதாகச் சாடினார்.

“இப்ராஹிம் அலி விடுத்துள்ள நாஸி போன்ற -இனவாத மருட்டல்களை அனுமதிப்பதின் மூலம் இன வேற்றுமைகளில் உயிர் வாழும் கட்சி என்ற அம்னோ உண்மையான முகத்தை காட்டியுள்ளது.”

பெர்க்காசா மீது நடவடிக்கை எடுக்க மறுப்பதின் மூலம் அம்னோ அந்த வலச்சாரி அமைப்பையும் அதன் கொள்கைகளையும் ஆதரிப்பதாகக் கருதப்படும்,” என்றும் லிம்மின் அறிக்கை கூறியது.

2009ம் ஆண்டு நிகழ்ந்த மாட்டுத் தலை ஊர்வலம், இந்தியர்களைப் பிச்சைக்காரர்கள் என்றும் சீனப் பெண்களை விபச்சாரிகள் என்றும் பல அம்னோ தலைவர்கள் கூறிய கருத்துக்கள் ஆகியவை மீது நடவடிக்கை எடுக்க அம்னோ தயங்கியது போன்ற பல முந்தைய சம்பவங்களையும் பினாங்கு முதலமைச்சர் நினைவு கூர்ந்தார்.

“ஒரே மலேசியா ஒரு மாயை, பெரிய ஏமாற்று வேலை என்பதை விட வேறு ஒன்றுமில்லை என்பதை அது தெளிவாக உணர்த்துகிறது.”

“அரசியல் ரீதியில் திவாலாகிப் போன அம்னோவிடம் இனம், சமயம் ஆகியவற்றைத் தவிர எழுப்புவதற்கு வேறு பிரச்னை ஒன்றுமில்லை என்பது திண்ணம். மக்களை பயமுறுத்துவதற்கு மட்டுமின்றி தனது பலவீனங்களை மறைப்பதற்கும் இனத்தையும் சமயத்தையும் அது விருப்பம் போல் பயன்படுத்துகிறது,” என லிம் மேலும் சொன்னார்.

பெர்க்காசா ஊர்வலம் குறித்த ஏற்பாடுகள் கோலாலம்பூரில் உள்ள சுல்தான் சுலைமான் கிளப்பில் நேற்று தொடக்கி வைக்கப்பட்ட போது பெர்க்காசா உறுப்பினர்கள் பெர்சே தலைவர் அம்பிகா ஸ்ரீனிவாசனுடைய படங்களை எரித்ததுடன் மிதிக்கவும் செய்தனர்.

கூட்டத்துக்கு பின்னர் நிருபர்களிடம் பேசிய பெர்க்காசா தலைவர் இப்ராஹிம் அலி, எதிர்க்கட்சிகளின் கூட்டணியும் அரசியல் போராளிகளும் ஏற்பாடு செய்துள்ள ஆர்ப்பாட்டம் ரத்துச் செய்யப்படாவிட்டால் குழப்பம் ஏற்படும் என மருட்டல் விடுத்தார்.

“கனவான்களே, சீமாட்டிகளே கற்பனை செய்து கொள்ளுங்கள். பெர்சே பேரணி ரத்துச் செய்யப்படாமல் அதனை அவர்கள் தொடர்ந்து நடத்தினால்- ஜுலை 8-9ல் அவர்கள் ரத்துச் செய்யாவிட்டால் சீன சமூகமும் பலரும் உணவுப் பொருட்களை வீட்டில் நிறைய வாங்கி வைக்க வேண்டியிருக்கும்.”

“அந்தத் தினத்தில் எதுவும் நடக்கும்,”என அவர் மேலும் சொன்னார்.

நியாயமான சுதந்திரமான தேர்தல்களை வலியுறுத்தும் பொருட்டு ஜுலை 9ம் தேதி பேரணி ஒன்றை நடத்தப் போவதாக பெர்சே 2.0 அமைப்பு அறிவித்த பின்னர் ‘அமைதி ஊர்வலம்’ என்ற பெயரில் போட்டிப் பேரணியை அதே நாளன்று நடத்தப் போவதாக பெர்ச்காசா கூறியது.

அதே வேளையில் நடப்பு தேர்தல் முறையை தற்காக்கும் வகையில் ஒரே நேரத்தில் பேரணியை நடத்தப் போவதாக அம்னோ இளைஞர் பிரிவும் அறிவித்துள்ளது.

மலேசியாஇன்று

தகவலுக்கு நன்றி !!!!

தகவலுக்கு நன்றி தல