ஐஸ்அவுஸ் மார்க்கெட்டில் குடிபோதையில் ரகளை செய்த பெண் போலீஸ் சஸ்பெண்டு

ஐஸ்அவுஸ் மார்க்கெட்டில் குடிபோதையில் ரகளை செய்த பெண் போலீஸ் சஸ்பெண்டு! பேக்கரியில் ஓசிக்கு பொருள் வாங்கி தகராறு


சென்னையில் குடிபோதையில் ரகளையில் ஈடுபட்ட பெண் போலீஸ் `சஸ்பெண்டு' செய்யப்பட்டார்.

ஐஸ்அவுஸ் மார்க்கெட்டில் பரபரப்பாக நடந்த இந்த சம்பவம் பற்றிய விவரம் வருமாறு:-

பெண் போலீஸ் ராணி

சென்னை திருவல்லிக்கேணி அனைத்து மகளிர் போலீசில் காவலராக பணிபுரிபவர் ராணி (வயது 38). திருமணமாகாத இவர், மைலாப்பூர் அப்பு தெருவில் உள்ள பெண்கள் விடுதி ஒன்றில் தங்கியிருந்தார். தினமும் அங்கிருந்து வேலைக்கு வந்து செல்வார்.

நேற்று முன்தினம் தலைமை செயலக காவல் பணியில் ராணி இருந்தார். மாலை 3 மணியளவில் பணி முடிந்து விடுதிக்கு சென்றார். மாலை 6 மணியளவில் மீண்டும் இரவு பணிக்காக அவர் புறப்பட்டு வந்தார். வரும் வழியில் ஐஸ்அவுஸ் மார்க்கெட்டில் தனது ஸ்கூட்டியை நிறுத்தினார்.

ஓசியில் பொருள் கேட்டு ரகளை

ஐஸ்அவுஸ் மார்க்கெட்டில் `காமாட்சி ஹாட் சிப்ஸ்' என்ற பெயரில் பிஸ்கட், கேக் போன்ற பொருட்கள் விற்பனை செய்யும் பேக்கரி ஒன்று உள்ளது. பேக்கரியின் உரிமையாளர் வெளியே போய் விட்டார். கடையின் ஊழியராக வேலை பார்த்த சிறுவன் தமிழரசன் மட்டும் அப்போது இருந்தான்.

பெண் போலீஸ் ராணி போலீஸ் சீருடையில் சென்று சிப்ஸ் கடையில் தகராறு செய்தார். தனக்கு வேண்டிய பிஸ்கட், கேக், சிப்ஸ், மிச்சர் போன்ற பொருட்களை எல்லாம் அவரே எடுத்துக் கொண்டார். தான் இது போல் வழக்கமாக பொருட்களை எடுத்துக் கொள்வேன் என்றும், உனது முதலாளி வந்தால் சொல்லிவிடு என்றும் ராணி கடை ஊழியர் தமிழரசனிடம் கூறினார். ஆனால் தமிழரசன் ஓசியில் பொருட்கள் தரமுடியாது என்றும், முதலாளி வந்தபிறகு வாங்கிக்கொள்ளுங்கள் என்றும் கண்டிப்பாக கூறினான்.

இதனால் கோபம் கொண்ட பெண் போலீஸ் ராணி, தமிழரசனை அடித்து உதைத்து ரகளையில் ஈடுபட்டிருக்கிறார். சிறுவன் ஒருவனை, பெண் போலீஸ் ஒருவர் இப்படி அடித்து உதைக்கிறாரே என்று அப்பகுதி மக்கள் கொதித்து போய் திரண்டு வந்தனர்.

நடந்த விஷயத்தை கேட்ட போது, பெண் போலீஸ் ராணி ஓசியில் பொருட்களை அள்ளி போக பார்த்தார் என்று தெரிய வந்ததால், பொதுமக்கள் மேலும் கோபம் கொண்டனர். ராணியை பிடித்து ஐஸ்அவுஸ் போலீசில் ஒப்படைத்தனர். ஐஸ்அவுஸ் போலீசார் ராணியிடம் விசாரித்த போது மேலும் திடுக்கிடும் அதிர்ச்சி அவர்களுக்கு காத்திருந்தது.

போதையில் ராணி

ராணி குடிபோதையில் இருந்தது தெரிய வந்தது. உடனடியாக இது பற்றி உயர் போலீஸ் அதிகாரிகளுக்கு தகவல் தெரிவிக்கப்பட்டது. ராணி மீது கடும் நடவடிக்கை எடுக்க உயர் அதிகாரிகள் உத்தரவிட்டனர். ராணியை ராயப்பேட்டை அரசு மருத்துவமனைக்கு அழைத்து சென்று அவர் மது அருந்தியதற்கான சான்றிதழை போலீசார் வாங்கினார்கள்.

பின்னர் ராணி மீது குடிபோதையில் பொது இடத்தில் ரகளை செய்ததாக வழக்குப்பதிவு செய்யப்பட்டது. ராணி கைது செய்யப்பட்டு பின்னர் சொந்த ஜாமீனில் விடுவிக்கப்பட்டார்.

சஸ்பெண்டு

ராணியின் இந்த அடாவடித்தனம் பற்றி உயர் அதிகாரிகள் விசாரணை நடத்தினார்கள். விசாரணை நடத்திய உயர் அதிகாரி ஒருவர் கூறியதாவது:-

ராணி போதையில் ரகளை செய்வது இது புதிது அல்ல. அவர் ஏற்கனவே கரூரில் வேலை பார்க்கும் போதும், அதன் பிறகு கோவையில் வேலை பார்க்கும் போதும் போதை புகாரில் சிக்கியுள்ளார். கடந்த ஜனவரி மாதம் பணி மாறுதலாகி அவர் சென்னை வந்தார். சென்னையிலும் அவரது பழைய போதை பழக்க வழக்கம் தொடர்ந்தது. உயர் அதிகாரிகள் எவ்வளவோ அவருக்கு அறிவுரை சொல்லியும் அவர் திருந்திய பாடில்லை. மருத்துவ விடுமுறையில் சென்றிருந்த அவர், சமீபத்தில் தான் மீண்டும் பணியில் வந்து சேர்ந்தார். அவரது ஒழுங்கீன நடவடிக்கையால் அவர் மீது `சஸ்பெண்டு' நடவடிக்கை எடுக்கப்பட்டுள்ளது.

இவ்வாறு அந்த உயர் அதிகாரி தெரிவித்தார்.

பெண் போலீஸ் ராணியின் இந்த நடவடிக்கை, சென்னை போலீஸ் வட்டாரத்தில் நேற்று பெரும் பரபரப்பை ஏற்படுத்தியது.