இன்று இலங்கையை சமாளிக்குமா பாகிஸ்தான்

**சிவா** · **சிவா** Sat Feb 26, 2011 9:31 am

கொழும்பு: உலக கோப்பை லீக் போட்டியில் இன்று இலங்கை, பாகிஸ்தான் அணிகள் மோதுகின்றன. இரு அணிகளும் சமபலம் வாய்ந்தவை என்பதால், ரசிகர்கள் ஆக்ரோஷமான ஆட்டத்தை எதிர்பார்க்கலாம்.
இந்திய துணைக்கண்டத்தில் பத்தாவது உலக கோப்பை தொடர் நடக்கிறது. இன்று கொழும்பு பிரேமதாசா அரங்கில் நடக்கும் "ஏ' பிரிவு லீக் போட்டியில்(பகலிரவு) இலங்கை அணி, பாகிஸ்தானை சந்திக்கிறது.

பேட்டிங் பலம்:

இலங்கை அணியை பொறுத்தவரை முதல் போட்டியை வெற்றிகரமாக துவக்கியது. கனடாவுக்கு எதிராக சதம் அடித்த ஜெயவர்தனா, கேப்டன் சங்ககராவை கொண்ட "மிடில் ஆர்டர்' பலமாக உள்ளது. அதிரடிக்கு மாத்யூஸ், பெரேரா கைகொடுக்கத் தயாராக உள்ளனர். இவர்கள் தவிர, கபுகேதரா, சமரவீரா என வரிசையாக ரன்குவிக்க காத்திருக்கின்றனர்.

மலிங்கா வருகை:

முதல் போட்டியில் பங்கேற்காத வேகப்பந்து வீச்சாளர் மலிங்கா, இன்றைய போட்டியில் களமிறங்குவார் என்று தெரிகிறது. கடந்த தொடரில் தென் ஆப்ரிக்காவுக்கு எதிராக 4 பந்தில் 4 விக்கெட் வீழ்த்திய மலிங்கா, இன்றும் சாதிக்க முயற்சிப்பார். இவருடன் குலசேகராவும் மீண்டும் அசத்தலாம். சுழலில் மிரட்ட "ஜாம்பவான்' முரளிதரன் உள்ளார். தவிர, இளம் மெண்டிஸ், தில்ஷனும் தங்கள் பங்கிற்கு, பாகிஸ்தான் அணிக்கு சிக்கல் தரலாம்.

அனுபவ வலிமை:

பாகிஸ்தான் அணியின் பேட்டிங் வரிசையும் சற்றும் சளைத்ததல்ல. மிஸ்பா உல் ஹக், யூனிஸ் கான் போன்ற அனுபவ வீரர்கள் உள்ளனர். கென்யாவுக்கு எதிரான போட்டியில் கம்ரான் அக்மல், உமர் அக்மல் சகோதரர்கள் அரைசதம் கடந்து அசத்தினர். கடந்த போட்டியில் ஏமாற்றிய கேப்டன் அப்ரிடி, அப்துல் ரசாக் இன்று அதிரடி காட்டலாம்.

சுழல் ஜாலம்:

பவுலிங்கில் சோயப் அக்தர், மீண்டும் எழுச்சி கண்டிருப்பது வரவேற்கத்தக்கது. இவருக்கு உமர் குல், அப்துல் ரசாக்கும் உதவுகின்றனர். கனடாவுக்கு எதிராக 5 விக்கெட் வீழ்த்திய அப்ரிதி, இன்றும் அசத்தலாம். அப்துல் ரெஹ்மானும் சிறப்பாக செயல்படலாம்.

வாய்ப்பு யாருக்கு?

இரு அணிகளும் தங்கள் முதல் போட்டியில் வெற்றி பெற்றுள்ளன. பேட்டிங்கில் 300 ரன்களுக்கு மேல் குவித்து திறமை நிரூபித்துள்ளன. உலக கோப்பை தொடரில் இதுவரை பாகிஸ்தானை வென்றதில்லை என்ற வேதனையை, சொந்த மண்ணில் மாற்ற இலங்கை அணி முயற்சிக்கும்.

மழை வாய்ப்பு

இன்று போட்டி நடக்கும் கொழும்புவில் வானம் பெரும்பாலும் மேகமூட்டத்துடன் இருக்கும். குறைந்தபட்சம் 24, அதிகபட்சம் 31 டிகிரி செல்சியஸ் வெப்பநிலை இருக்கும். மழை வருவதற்கு வாய்ப்பு குறைவு.

இரு அணிகளும் இதுவரை...

இரு அணிகளும் 120 போட்டிகளில் பங்கேற்றுள்ளன. இதில் பாகிஸ்தான் 70, இலங்கை 46 போட்டிகளில் வெற்றி பெற்றுள்ளன. 3 போட்டிக்கு முடிவில்லை. ஒரு போட்டி "டை' ஆனது.

* உலக கோப்பை தொடரில் இதுவரை மோதிய 6 போட்டிகளிலும் பாகிஸ்தான் வென்றுள்ளது.

இன்று இலங்கையை சமாளிக்குமா பாகிஸ்தான்

இன்று இலங்கையை சமாளிக்குமா பாகிஸ்தான்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக