ஏழுமலையானை மனநிறைவுடன் தரிசிக்க மாற்று ஏற்பாடு

திருப்பதி வெங்கடேச பெருமாள் கோவிலில், செவ்வாய், புதன் ஆகிய இரு நாட்களில், மூலவரை சிறிது தூரத்திலிருந்தபடி தரிசிக்கும் மாற்று ஏற்பாட்டின் படி, நேற்று முன்தினம் கோவிலுக்கு வந்த பக்தர்கள் மனநிறைவுடன் சுவாமி தரிசனம் செய்து திரும்பினர்.

வெள்ளி, சனி, ஞாயிறு ஆகிய மூன்று நாட்களில், சுவாமி தரிசனத்திற்கு வரும் பக்தர்கள் ஆயிரக்கணக்கில் திருமலையில் குவிந்து விடுகின்றனர். வார விடுமுறை தினம் என்பதாலும், மேலும் சனிக்கிழமைகளில் வெங்கடேச பெருமாளை தரிசித்து வழிபட்டால், குடும்பத்தில் மங்களகரமான திருப்பங்கள் நேரிடும் என்ற நம்பிக்கையில், அவரை தரிசிக்க சனிக்கிழமை மிகவும் சிறந்த நாளாக கருதி தரிசிக்க வருகின்றனர்.

மணிக்கணக்கில்: இந்த முறைப்படி சனியன்று திருப்பதிக்கு புறப்படும் பக்தர்கள், ஞாயிறன்று இங்கு குவிந்து விடுவதால், வெங்கடேச பெருமாளை குறித்த நேரத்தில் தரிசிக்க முடியாமல், வைகுண்டம் காம்ப்ளக்சிலும் கியூவிலும் மணிக்கணக்கில் காத்திருக்க வேண்டிய நிலை ஏற்படுகிறது. திருமலையில் அதிக அளவு கூட்டம் கூடுகின்ற நிலை, ஒவ்வொரு வாரமும் திங்களன்று மாலை வரை நீடிக்கிறது. திங்கள் முதல் வெள்ளி வரை அனைவருக்கும் வேலை நாட்கள் என்பதால் செவ்வாய், புதன், வியாழன், வெள்ளி அன்று பிற்பகல் வரை, சராசரியாக தினமும் 30 ஆயிரம் முதல் 40 ஆயிரம் பக்தர்கள் மட்டுமே சுவாமி தரிசனத்திற்கு வருகின்றனர். இந்நாட்களில் பக்தர்கள் அதிக நேரம் காத்திராமல், தங்கும் விடுதிகளில் ஓய்வு எடுத்தபடி 3 அல்லது 4 மணி நேரத்தில், இலவச கியூவில் சுவாமி தரிசனம் செய்து விட்டு, இருப்பிடத்திற்கு திரும்புகின்றனர்.

தேவஸ்தான நிர்வாகம் ஏற்பாடு செய்துள்ள செவ்வாய், புதன்கிழமைகளில் அருகிலிருந்து தரிசிக்கும் புதிய நடைமுறையில், எந்தவித அதிருப்தியும் பக்தர்கள் சந்திக்க கூடாது என்ற கோணத்தில், அதிகாரிகள் உன்னிப்புடன் கண்காணித்து அதற்கான நடவடிக்கை மேற்கொண்டு வருகின்றனர். இப்புதிய ஏற்பாட்டின் படி இந்த வாரம் செவ்வாய், புதன் கிழமைகளில் திருமலைக்கு வந்த 60 ஆயிரத்துக்கும் மேற்பட்ட பக்தர்கள், மனநிறைவுடன் தரிசனம் செய்து திரும்பியதாக தேவஸ்தான அதிகாரிகள் தெரிவித்தனர். இலவச தரிசனத்தில், இரண்டு அல்லது மூன்று மணி நேரத்தில் நிம்மதியுடன் தரிசிக்க விரும்பும் பக்தர்கள் இனி செவ்வாய், புதன் கிழமைகளில் திருமலைக்கு வந்தால், தேவஸ்தான நிர்வாகத்திற்கு மிகவும் உதவியாக இருக்கும் என, அதிகாரிகள் கருத்து தெரிவித்துள்ளனர்.