வெள்ளைக்கொடி சம்பவம் குறித்து அரசாங்கத்திடம் உறுதிப்படுத்திக் கொள்ள இறுதி வரையில் முயற்சித்தேன் - பெட்ரிக்கா

நிசாந்தன் · நிசாந்தன் Wed Nov 10, 2010 2:22 am

இலங்கையின் சண்டே லீடர் செய்தித்தாளில் வெளியான இறுதியுத்தத்தின் போது வெள்ளைக் கொடிகளுடன் சரணடைய வந்த தமிழீழ விடுதலைப்புலிகளை சுட்டுக்கொல்லுமாறு பாதுகாப்பு செயலாளர் கோட்டாபய ராஜபக்ச உத்தரவிட்டதான செய்தி தொடர்பான விசாரணை இன்றும் கொழும்பு மேல் நீதிமன்றத்தில் இடம்பெற்றது.
இதன்போது பிரதிவாதியான முன்னாள் ராணுவத் தளபதி சரத் பொன்சேகாவின் சார்பில் முன்னிலையாகும் சட்டத்தரணி வழக்;கு விசாரணை இடம்பெறும் நாட்களில் இனந்தெரியாத சிலர் நீதிமன்ற வளாகத்தில் திரிவதாக குறிப்பிட்டார்

இதன் காரணமாக பிரதிவாதியான தமது கட்சிக்காரரின் பாதுகாப்பிற்கு அச்சுறுத்தல் ஏற்பட்டுள்ளதாகவும் அவர் சுட்டிகாட்டினார்.

இதனை அடுத்து விடயத்தை கருத்திற்கொண்ட மூவர் அடங்கி நீதிபதிகள் குழு இந்த விடயம் தொடர்பாக வாழைத்தோட்ட காவல்நிலைய பொறுப்பதிகாரி உடனடியாக விசாரணைகள் மேற்கொள்ள வேண்டும் என உத்தரவிட்டது.

இதேவேளை வெள்ளைக் கொடி சம்பவம் குறித்து அரசாங்கத் தரப்பிடம் உறுதிப்படுத்திக்கொள்ள தாம் இறுதி வரையில் முயற்சித்ததாக சண்டே லீடர் பத்திரிகையின் பிரதம ஆசிரியர் பெட்ரிக்கா ஜேன்ஸ் மேல் நீதிமன்றில் தெரிவித்துள்ளார்.

செய்தியை பிரசுரம் செய்வதற்கான இறுதித் தருணம் வரையிலும் பாதுகாப்புச் செயலாளர் கோதபாய ராஜபக்ஷவை தொடர்பு கொள் தாம் முயற்சித்ததாக அவர் தெரிவித்துள்ளார். சரத் பொன்சேகாவின் சட்டத்தரணி நலீன் லந்துவேஹெட்டி பெட்ரிக்காவிடம் நடத்திய குறுக்கு விசாரணையின் போது அவர் இதனைக் குறிப்பிட்டுள்ளார்.

சட்டத்தரணி நிறுவனமொன்றின் ஊடாக தாம் நீதிமன்றத்தில் அளித்த சாட்சி அறிக்கையை இரண்டாயிரம் ரூபா செலுத்தி பெற்றுக் கொண்டதாகவும் அவர் இதன் போது தெரிவித்துள்ளார்.

எனினும் வழக்கு விசாரணை நடைபெறும் தருணத்தில் சாட்சி அறிக்கையை பெற்றுக்கொள்ளக் கூடாது என்பதனை தாம் அறிந்திருக்கவில்லை என ஜேன்ஸ் குறிப்பிட்டுள்ளார்.

ஆங்கில பத்திரிகையொன்றில் வெள்ளைக் கொடி விவகாரம் பிழையாக செய்தி அறிக்கையிடப்பட்டிருந்ததனை திருத்தும் நோக்கில் தாம் சாட்சி அறிக்கையைப் பெற்றுக் கொண்டதாக அவர் தெரிவித்துள்ளார்.

வழக்கு விசாரணைகள் பதினோராம் நாளாக இன்றைய தினம் நடைபெற்றன நாளைய தினமும் விசாரணை நடைபெறவுள்ளது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக