கப்பல் பயணத்தில் சுக பிரசவம்

கொச்சி : லட்சத்தீவுக்கூட்டங்களில் ஒன்றான மினிக்காய் தீவிலிருந்து
கொச்சிக்கு கப்பலில் பயணித்த பெண் பயணி, அழகான பெண் குழந்தையை
பிரசவித்தார்.
அரபிக் கடலில் லட்சத் தீவுக் கூட்டங்களில் மினிக்காய் தீவும் ஒன்று.
இங்கிருந்து கொச்சிக்கு பயணிகள் கப்பல் சேவை நடந்து வருகிறது. அதேபோல்,
1ம் தேதி பிற்பகல் 2.30 மணியளவில் அங்கிருந்து "எம்.வி. அரேபியன் சீ' என்ற
கப்பல் புறப்பட்டது.அதில் திரளான பயணிகளுடன் டி.ஏ.கிடாவ், அவரது மனைவி
ஹஜூரும்மா மற்றும் ஐந்து குழந்தைகளுடன் கொச்சிக்கு பயணம் மேற்கொண்டனர்.
எட்டு மாத கர்ப்பிணியான ஹஜூரும்மா மினிக்காய் தீவில் மருத்துவ பரிசோதனை
செய்திருந்தார்.இருப்பினும், கொச்சியில் தனது ஆறாவது பிரசவத்தை வைத்துக்
கொள்ளலாம் என்ற ஆசையுடன் அவர் கப்பலில் புறப்பட்டிருந்தார். புறப்பட்ட
தினம் மாலை 5.30 மணியளவில் அவருக்கு பிரசவ வேதனை ஏற்பட்டது.
இதையடுத்து, கப்பலில் இருந்த மருத்துவ பரிசோதனை அறை அவரது
பிரசவத்திற்காக மாற்றி அமைக்கப்பட்டது. கப்பலின் கேப்டன் சி.பி. ஜெர்ரி
மட்டம் இதற்கான ஏற்பாடுகளை செய்தார். கப்பலின் மருத்துவ அதிகாரி டாக்டர்
ஜஸ்டின் பெரைரா மற்றும் உதவியாளர்கள் அப்பெண்ணுக்கு பிரசவ சிகிச்சை
அளித்தனர்.வேதனை அதிகமாகி இரவு 7.40 மணிக்கு அப்பெண் பயணி அழகான பெண்
குழந்தையை பிரசவித்தார். குழந்தை 2.3 கிலோ எடை இருந்தது.
நேற்று முன்தினம் காலை 7.30 மணிக்கு கொச்சி துறைமுகத்தை வந்தடைந்த
அக்கப்பலில் இருந்து தாயும், குழந்தையும் ஆம்புலன்ஸ் வேனில் உடனடியாக
மருத்துவமனைக்கு கொண்டு செல்லப்பட்டனர்.அங்கு தாயும் சேயும் நலமாக
உள்ளனர். கடல் பயணத்தின்போது கப்பலில் அக்குழந்தை பிறந்ததால், கடல்
மற்றும் கப்பல் தொடர்புடைய பெயர் வைக்க அத்தம்பதியிடம் கோரிக்கை
வைக்கப்பட்டது.ஆனால், அதற்கு அப்பெற்றோர் சம்மதிக்காமல் குழந்தைக்கு
ஷாகினா என பெயர் சூட்டினர். ஓராண்டாக சேவை அளித்து வரும் இக்கப்பலில்
நடந்த முதல் பிரசவம் இது என்பது குறிப்பிடத்தக்கது.