"சிலைஸ்' குளிர்பானத்தில் கரப்பான் பூச்சி: மத்திய, மாநில அரசுகளுக்கு நோட்டீஸ்

மதுரை :
"சிலைஸ்' குளிர்பானத்தில் இறந்த கரப்பான் பூச்சி மிதப்பதாகக்
கூறி, அதை விற்க தடை கோரி தாக்கலான வழக்கு குறித்து, மத்திய மாநில
அரசுகளுக்கு நோட்டீஸ் அனுப்ப, மதுரை ஐகோர்ட் கிளை உத்தரவிட்டது.
விசாரணையின் போது பூச்சி மிதக்கும் பாட்டில் ஆஜர் செய்யப்பட்டது.
மதுரை தாசில்தார் நகரை சேர்ந்த வக்கீல் ஆனந்தமுருகன் தாக்கல் செய்த
பொது நல வழக்கு:ஆந்திர மாநிலம் பொதிரெட்டிபள்ளி ஆராதனா புட், ஜூஸ்
லிமிடெட் "சிலைஸ்' குளிர்பானத்தை தயாரித்து விற்கிறது. சிவகாசியிலுள்ள என்
அலுவலகத்திற்கு ஸ்டார் ஏஜன்சீஸ் கடையில் 195 ரூபாய் கொடுத்து, "சிலைஸ்' 24
பாட்டில்கள் வாங்கினேன். 12 பாட்டில்களை குடித்தேன். ஒரு 200 மி.லி.,
பாட்டிலில் இறந்த கரப்பான் பூச்சி மிதந்தது. இந்தியாவில் மனித வளத்தை
சீரழிக்கும் நோக்கத்தில் வெளிநாட்டு கம்பெனிகள் "சிலைஸ்' போன்ற
குளிர்பானங்களை மோசமான நிலையில் விற்கின்றன. ஏற்கனவே வெளிநாடுகளில்
இருந்து கழிவு பொருட்கள் இந்தியாவிற்கு கொண்டு வரப்பட்டு, குப்பைக்
கிடங்காக மாற்றப்பட்டது.
இந்த குளிர்பான விற்பனையை தடை செய்யக் கோரி மத்திய, மாநில அரசு
செயலர்களுக்கு ஜூலை 14ல் மனு கொடுத்தும், நடவடிக்கை இல்லை. மனு மீது
நடவடிக்கை எடுக்க உத்தரவிட வேண்டும். அதற்கு இடைக்காலத் தடை விதிக்க
வேண்டும். குளிர்பானத்தை உற்பத்தி செய்யவும் தடை விதிக்க வேண்டும், என
தெரிவிக்கப்பட்டது.மனுதாரர் வக்கீல்கள் பூவேந்திரராஜன், பாஸ்கரன் ஆகியோர்
கரப்பான் பூச்சி மிதக்கும் பாட்டிலையும் நீதிபதிகளிடம் காட்டி
வாதாடினர்.இதை விசாரித்த நீதிபதிகள் டி.முருகேசன், எம்.துரைசாமி கொண்ட
பெஞ்ச், வழக்கு குறித்து மூன்று வாரங்களுக்குள் பதிலளிக்க மத்திய உள்துறை,
சுகாதார குடும்ப நல துறை செயலர்கள், மாநில உள்துறை மற்றும் சுகாதார
குடும்ப நல முதன்மை செயலர்களுக்கு நோட்டீஸ் அனுப்ப உத்தரவிட்டது.