விபசாரத்தில் கைதான வங்கதேச பெண்கள் தாயகம் திரும்ப; சி.பி.சி.ஐ.டி.,யினர் உதவி

சென்னை: விபசாரத்தில் ஈடுபட்டதாக சென்னையில் கைது செய்யப்பட்ட வங்கதேச
பெண்கள் மீண்டும் தங்கள் சொந்த ஊருக்கு திருப்பி அனுப்பப்பட்டனர். கடந்த
2007-08ம் ஆண்டில் வங்கதேசத்தைச் சேர்ந்த ஏழு பெண்கள், தகுந்த ஆவணங்கள்
இல்லாமல் முறைகேடாக இந்தியாவிற்குள் வந்துள்ளனர். இவர்களை, சில விபசார
புரோக்கர்கள் சென்னைக்கு அழைத்து வந்து விபசாரத்தில் ஈடுபடுத்தினர்.
சென்னை மாநகரம் மற்றும் புறநகர் போலீசார் இவர்களை கைது செய்து,
மயிலாப்பூரில் உள்ள அரசு காப்பகத்தில் 2009ம் ஆண்டு சேர்த்தனர்.
காப்பகத்தில் இருந்த இப்பெண்கள் தப்பிக்க முற்பட்ட போது, போலீசாரால் கைது
செய்யப்பட்டு புழல் ஜெயிலில் அடைக்கப்பட்டனர். கோர்ட்டில் இப்பெண்களின்
குற்றம் நிரூபிக்கப்பட்டு, சிறையில் இருந்த நாட்களை கருத்தில் கொண்டு
அவர்களை சிறையிலிருந்து விடுவித்து, மீண்டும் காப்பகத்தில் வைக்குமாறு
மாஜிஸ்திரேட் உத்தரவிட்டார். இவர்களில் ஐந்து பெண்கள், சி.பி.சி.ஐ.டி.,
போலீசாரின் முயற்சியால் கடந்த ஜூன் மாதம் வங்கதேசத்திற்கு
அனுப்பப்பட்டனர். இவர்களைத் தவிர இதி காட்டூன் மற்றும் அன்னா காட்டூன்
ஆகிய இரண்டு பெண்களையும் சொந்த ஊருக்கு திருப்பி அனுப்புவதற்கான உத்தரவு
தயாராகாததால், அவர்கள் காப்பகத்தில் வைக்கப்பட்டனர். சி.பி.சி.ஐ.டி.,
பரிந்துரையின் பேரில் மத்திய உள்துறை மற்றும் தமிழக அரசு இந்த பெண்களின்
குடியுரிமையை ஊர்ஜிதம் செய்தது. தொடர்ந்து, அவர்களை நாட்டிற்கு திருப்பி
அனுப்ப அனுமதி பெறப்பட்டது.
சி.பி.சி.ஐ.டி., கூடுதல் டி.ஜி.பி.,
அர்ச்சனா ராமசுந்தரம், இதி மற்றும் அன்னா காட்டூனை மயிலாப்பூர்
காப்பகத்தில் சந்தித்து அறிவுரை வழங்கினார். தொடர்ந்து இருவரும் நேற்று
முன்தினம் ரயில் மூலம் வங்கதேச எல்லைப் பகுதியான கல்யாணி சென்றனர். அங்கு,
வங்கதேச அதிகாரிகளிடம் ஒப்படைக்கப்பட்டனர்.