கட்சி தொடக்க விழா: முஷாரப் பங்கேற்க மாட்டார்

இஸ்லாமாபாத்,

தனது கட்சியின் தொடக்க விழாவில் பாகிஸ்தான் முன்னாள் அதிபர் பர்வேஸ் முஷாரப் பங்கேற்க மாட்டார் என தெரிகிறது.பாகிஸ்தானின்
முன்னாள் அதிபரான பர்வேஸ் முஷாரப் இப்போது லண்டனில் வசித்து வருகிறார்.
அரசியல் கட்சி தொடங்குவதன் மூலம் மீண்டும் பாகிஸ்தானுக்குள் நுழைய முடிவு
செய்துள்ளார்.இந்நிலையில் சிந்து மாகாண உயர் நீதிமன்றத்தில்
பர்வேஸ் முஷாரபுக்கு எதிரான வழக்கில் அவரை தேடப்படும் குற்றவாளியாக
அறிவித்து தீர்ப்பு வழங்கப்பட்டுள்ளது.செப்டம்பர் மாதம் முஷாரபின்
அகில பாகிஸ்தான் முஸ்லிம் லீக் கட்சியின் தொடக்க விழா நடைபெற உள்ளது.
கட்சியின் தொடக்க விழாவில் அவர் பங்கேற்க மாட்டார் என "டெய்லி டைம்ஸ்'
செய்தி வெளியிட்டுள்ளது.இப்போது பாகிஸ்தானில் நிலவும் அரசியல்
சூழல் தனக்குச் சாதகமாக இல்லை என்பதால் லண்டனிலிருந்து கட்சியை நடத்தத்
திட்டமிட்டுள்ளதாக முஷாரபுக்கு நெருக்கமானவர்கள் தெரிவித்ததாக அந்த
செய்தியில் குறிப்பிடப்பட்டுள்ளது.புதிதாக உருவாக்கப்பட்ட இந்த
கட்சியின் கொள்கை உள்ளிட்டவற்றை தயாரிப்பதற்காக சட்ட வல்லுநர்கள் கொண்ட
குழு ஒன்று ஏற்படுத்தப்பட்டுள்ளது. ரம்ஜானுக்குப் பிறகு இக்கட்சி லண்டன்,
பாகிஸ்தான், துபை, அமெரிக்காவில் தொடங்கப்படும் என்று தெரிவித்துள்ளனர்.சமீப
காலமாக பாகிஸ்தான் தொலைக்காட்சிகளில் பர்வேஸ் முஷாரபின் முகம் அடிக்கடி
காட்டப்படுகிறது. அண்மையில் பாகிஸ்தானில் ஏற்பட்ட பெரு வெள்ள
நிவாரணத்துக்கு முஷாரப் | 1 கோடி அளிப்பதாக அறிவித்துள்ளார். இத்தொகை
கட்சி அதிகாரிகளிடம் அளிக்கப்பட்டு பாதிக்கப்பட்டவர்களுக்கு செலவிடப்படும்
என்றும் அறிவிக்கப்பட்டுள்ளது.துபை மற்றும் லண்டனில் கட்சி
அலுவலகம் தொடங்க வேண்டியதன் அவசியம் என்ன? என்று கேட்டதற்கு தனது
ஆதரவாளர்களையும் உயர் தலைவர்களையும் பாகிஸ்தானில் சந்திக்க முடியாத சூழல்
உள்ளது. எனவே இவர்களை லண்டன் அல்லது துபையில் சந்திப்பதற்காக இங்கு
அலுவலகம் தொடங்கப்பட்டுள்ளது என்று அக்கட்சியின் முக்கிய தலைவர்கள்
தெரிவித்தனர். இது தவிர, முஷாரபின் ஆதரவாளர்கள் சிலர் அமெரிக்காவின்
டல்லாஸ் நகரில் உள்ளனர். இதனால் இங்கும் அலுவலகம் தொடங்க வேண்டியுள்ளது
என்று கட்சியினர் தெரிவித்தனர்.முஷாரபின் அகில பாகிஸ்தான் முஸ்லிம்
லீக் கட்சி இந்த ஆண்டு தொடக்கத்தில் ஆரம்பிக்கப்பட்டு, அரசியல் கட்சியாக
பாகிஸ்தானில் உள்ள அனைத்து மாகாணங்களிலும் பதிவு செய்யப்பட்டுள்ளது.அதிபர்
பதவியிலிருந்து 2008-ம் ஆண்டு விலகிய முஷாரப், ஆளும் பாகிஸ்தான் மக்கள்
கட்சி தன் மீது வழக்கு தொடரும் என்பதால் தொடர்ந்து லண்டனில் வசித்து
வருகிறார்.