அயோடின் கலக்காத உப்பு விற்பனை செய்தால் கடும் நடவடிக்கை

தூத்துக்குடி,:
அயோடின் கலக்காமல் உப்பு விற்பனையில் ஈடுபடுபவர்கள் மீது
கடும் நடவடிக்கை எடுக்கப்படும் என கோவில்பட்டி சுகாதாரப் பணிகள் துணை
இயக்குநர் தெரிவித்துள்ளார். கோவில்பட்டியில் மைக்ரோ நியூட்ரண்ட்
இனிசியேட்டிவ் இந்தியா அமைப்பு சார்பில் தூத்துக்குடி மாவட்டம்
கோவில்பட்டி சுகாதார ஆய்வாளர்களுக்கு அயோடின் உப்பு ஆய்வு முறை குறித்து
பயிற்சி நடந்தது. பயிற்சி முகாமினை கோவில்பட்டி சுகாதாரப் பணிகள் துணை
இயக்குநர் ரால்ப்செல்வின் தலைமை வகித்து துவக்கி வைத்தார். மைக்ரோ
நியூட்ரண்ட் இனிசியேட்டிவ் இந்தியா அமைப்பின் தமிழ்நாடு, கர்நாடகா மாநில
பொறுப்பாளர் சரவணன், அயோடின் சத்தின் அவசியம் குறித்தும், அயோடின் ஆய்வு
முறைகள் குறித்தும் பயிற்சி அளித்தார். பயிற்சியின் போது துணை இயக்குநர்
ரால்ப்செல்வின் பேசியதாவது, சுகாதார ஆய்வாளர்கள் அனைத்து கடைகளில்
உடனடியாக உப்பில் அயோடின் உள்ளதா? இல்லையா என்பதை ஆய்வு செய்து அறிக்கை
அனுப்ப வேண்டும். அயோடின் கலக்காமல் உப்பு விற்பனையில் ஈடுபடுபவர்கள் மீது
கடும் நடவடிக்கை எடுக்க சுகாதார ஆய்வாளர்களை கேட்டுக் கொண்டார். மேலும்
சுகாதார ஆய்வாளர்கள் தொடர் கண்காணிப்பில் ஈடுபட வேண்டும் எனவும்
வலியுறுத்தி பேசினார். சுகாதாரத்துறை மாவட்ட தாய்சேய் நல அலுவலர்
விஜயலெட்சுமி அயோடின் உப்புகள் குறித்து பொதுமக்களிடம் எவ்வாறு
விழிப்புணர்வு ஏற்படுத்த வேண்டும் என்பதை பற்றி பேசினார்.முன்னதாக துணை
இயக்குநர் (சுகாதாரப் பணிகள்) பகவதிபெருமாள் வரவேற்றார்.பயிற்சியில்
சுகாதார ஆய்வாளர்கள், உணவு ஆய்வாளர்கள், வட்டார சுகாதார
மேற்பார்வையாளர்கள், மருத்துவம் அல்லாத மேற்பார்வையாளர்கள் மற்றும் மைக்ரோ
நியூட்ராண்ட் இனிசியேட்டிவ் இந்தியா அமைப்பாளர் சார்பில் சாலமன்,
அருண்குமார், கோயில்ராஜ் உட்பட பலர் கலந்து கொண்டனர். சுகாதார
மேற்பார்வையாளர் கணேசன் நன்றி கூறினார்.